ރިޔާސީ އިންތިހާބުގެ ދެވަނަ ބުރުގެ ކެމްޕެއިންގެ ފުރަތަމަ ހަރަކާތެއްގެ ގޮތުގައި އިދިކޮޅުން ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ހެނވޭރުގެ ގެތަކަށް ޒިޔާރަތްކުރައްވާ އެ ގެތަކުގައި ދިރިއުޅޭ ފަރާތްތަކާއި ބައްދަލުކުރައްވައިފިއެވެ. 

ރިޔާސީ އިންތިހާބުގެ ފުރަތަމަ ބުރުގެ ވޯޓްލުން ނިމި ވަގުތީ ނަތީޖާ އިއުލާންކޮށްފައިވާއިރު ވަގުތީ ނަތީޖާއިން ވޯޓުލީ މީހުންގެ 46 އިންސައްތަ ވޯޓާއެކު ކުރީގައި އުޅެނީ އިދިކޮޅު ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒެވެ. 

Advertisement

ޑރ މުއިއްޒު ހެންވޭރުގެ ގެތަކަށް ކުރިއަށް ގެންދިޔަ ޑޯޓުޑޯ 

ގާނޫނު އަސާސީ ބުނާގޮތުން ރިޔާސީ އިންތިހާބު އެއްބުރުން ކާމިޔާބު ކުރެވޭނީ ވޯޓުލާ މީހުންގެ 50 އިންސައްތަ ވޯޓު ކާމިޔާބުކޮށްގެންނެވެ. 

އެހެންނަމަވެސް މި އަހަރުގެ ރިޔާސީ އިންތިހާބުގެ ފުރަތަމަ ބުރުގައި އެއްވެސް ކެންޑިޑޭޓަކަށް 50 އިންސައްތަ ވޯޓު ލިބިފައި ނުވުމުން އިންތިހާބު ދެވަނަ ބުރު މި މަހުގެ 30 ވަނަ ދުވަހު ބޭއްވުމަށް ހަމަޖެހިފައިވާއިރު ދެވަނަ ބުރުގައި ޑރ މުއިއްޒު ގެ އިތުރުން ދެން ވާދަކުރާނީ ދެވަނަ އަށް އެންމެ ގިނަ ވޯޓު ލިބުނު އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިހެވެ. އެމަނިކުފާނަށް ފުރަތަމަ ބުރުގައި ލިބިވަޑައިގަތީ ވޯޓުލީ މީހުންގެ 38 އިންސައްތަ ވޯޓެވެ.