ރިޔާސީ އިންތިހާބުގެ ފުރަތަމަ ބުރުގައި ވާދަ ކުރި، އެމްއެންޕީ އިން ޕީޕީއެމް/ޕީއެންސީގެ ކެންޑިޑޭޓް ޑރ މުހައްމަދު މުއިއްޒަށް ތާއީދު ކުރަން ނިންމައިފިއެވެ.
އެމްއެންޕީން މި ނިންމުން ނިންމާފައިވަނީ އެ ޕާޓީ ކައުންސިލްއިން މިރޭ ބޭއްވި ބައްދަލުވުމުގައެވެ. މިބައްދަލުކުރެއްވުމުގައި ރިޔާސަތު ބެލެހެއްޓެވީ، ކުރީގެ ޑިފެންސް މިނިސްޓަރު އަދި އެމްއެންޕީގެ ފަރާތުން ރިޔާސީ އިންތިހާބުގައި ވާދަކުރެއްވި މުހައްމަދު ނާޒިމް އެވެ.
ނިމިދިޔަ ރިޔާސީ އިންތިހާބުގައި ނާޒިމް އަށް ލިބިފައިވަނީ، 1907 ވޯޓެވެ.
ނާޒިމްގެ ޕާޓީން މުޢިއްޒަށް ތާއީދު ކޮށްފައި ވާއިރު، އިންތިހާބުގެ ދެވަނަ ބުރުގައި އެކުގައި މަސައްކަތް ކުރުމަށް ހުރިހާ ސިޔާސީ ޕާޓީތަކަށް ރޭ ބޭއްވި ޖަލްސާގައި މުޢިއްޒު ވަނީ ދައުވަތު އަރުވައިފައެވެ.
މި އަހަރުގެ ރިޔާސީ އިންތިހާބުގެ ފުރަތަމަ ބުރުގައި އެއްވެސް ކެންޑިޑޭޓަކަށް 50 އިންސައްތަ ވޯޓު ލިބިފައި ނުވުމުން އިންތިހާބު ދެވަނަ ބުރު މި މަހުގެ 30 ވަނަ ދުވަހު ބޭއްވުމަށް ހަމަޖެހިފައިވާއިރު ދެވަނަ ބުރުގައި ޑރ މުއިއްޒު ގެ އިތުރުން ދެން ވާދަކުރާނީ ދެވަނަ އަށް އެންމެ ގިނަ ވޯޓު ލިބުނު އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިހެވެ.
ރައީސް ޞާލިހް ވެސް މިއަދު ވަނީ ރިޔާސީ އިންތިހާބުގެ ދެވަނަ ބުރުގައި 3 ފަރާތަކުން ކޯލިޝަން ހަދާނެކަމުގެ އިޝާރާތެއް ކޮށްފައިވާކަމުގައި ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
