މި މަހުގެ 30 ގައި އޮންނަ ރިޔާސީ އިންތިހާބުގެ ދެވަނަ ބުރުގައި ބައިބައިވެފައިވާ އެމްޑީޕީ އެކުވެ، އެމްޑީޕީން ވަކިވި ޑިމޮކްރެޓްސް ވެސް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ފަހަތްޕުޅަށް އަރަން އެދި ލެއްވުމުން، "ދެން އެކަން ވާކަށް ނެތް" ކަމަށް ވިދާޅުވެ، އެމްޑީޕީގެ ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދު އެމަނިކުފާނު ވިސްނުންފުޅު ހާމަކުރައްވައިފި އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި، ކޮމިޓީތައް އެކުލަވާލުމާއި ގުޅޭ ގޮތުން ބަހުސް ކުރައްވަމުން ކާށިދޫ ދާއިރާގެ މެންބަރު އަބްދުالله ޖާބިރު ވިދާޅުވީ، ރިޔާސީ އިންތިހާބުގެ ފުރަތަމަ ބުރުގައި، އެމްޑީޕީ އާއި ދަ ޑިމޮކްރެޓްސް އަށް ލިބިފައިވާ ވޯޓަކީ "އެއް ފިކުރަކަށް" ލިބުނު ވޯޓު ކަމަށެވެ. އެހެންކަމުން އެ ދެ ޕާޓީ އެކީގައި މަސައްކަތް ކުރުމަކީ މުހިންމު ކަމެއް ކަމަށް ޖާބިރު ވިދާޅުވި އެވެ.

ޖާބިރު އިތުރަށް ވިދާޅުވީ އިންތިހާބުގެ ފުރަތަމަ ބުރުގައި އިދިކޮޅުު ޕީޕީއެމް/ޕީއެންސީގެ ކެންޑިޑޭޓް ޑރ މުހައްމަދު މުއިއްޒަށް ގިނަ ވޯޓު ލިބިލެއްވީ އެމްޑީޕީ ބައިބައި ވެފައި އޮތުމުން ކަމަށާ، އެހެން ކަމުން، ދެވަނަ ބުރުގައި ދެ ޕާޓީ ގުޅިގެން މަސައްކަތް ކުރުމަށް އެމްޑީޕީގެ އިސް ފަރާތްތަކާއި ދަ ޑިމޮކްރެޓްސް އާއި  ވާހަކަ ދެއްކުމަށް ޖާބިރު ވަނީ އެދިލައްވާފައެވެ.

Advertisement

"ދިމާވި މައްސަލައަކީ އެމްޑީޕީ ދެބައިވުން. އިތުރު މައްސަލައެއް ދިމައެއް ނުވޭ. އޭތި އަލުން ގްލޫ ކޮށްލެވިއްޖެ ކަމަށް ވަންޏާ، އެ ހިސާބުން ދާނީ ބާރަށް ކުރިއަށޭ،"

"...ހުރިހާ ބޭފުޅުން އަވަހަށް ނެގޯސިއޭޝަން ހައްދަވައި، އެއްބުރުން ރައީސް އިބްރާހިމް މުހައްމަދު ސޯލިހު ހޮވާށޭ،"

ޖާބިރުގެ ވާހަކަ މެދު ކަނޑާލުމަށްފަހު ރައީސް ނަޝީދު ވަނީ "ދެނެއް އެކަން އެގޮތަށް ވާކަށް ނެތް" ކަމަށް ވިދާޅުވެފައެވެ.

މި އަހަރުގެ ރިޔާސީ އިންތިހާބުގެ ފުރަތަމަ ބުރުގައި އެއްވެސް ކެންޑިޑޭޓަކަށް 50 އިންސައްތަ ވޯޓު ލިބިފައި ނުވުމުން އިންތިހާބު ދެވަނަ ބުރު މި މަހުގެ 30 ވަނަ ދުވަހު ބޭއްވުމަށް ހަމަޖެހިފައިވާއިރު ދެވަނަ ބުރުގައި ޑރ މުއިއްޒު ގެ އިތުރުން ދެން ވާދަކުރާނީ ދެވަނަ އަށް އެންމެ ގިނަ ވޯޓު ލިބުނު އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިހެވެ.