ރިޔާސީ އިންތިހާބުގެ ދެވަނަ ބުރުގައި މޯލްޑިވްސް ނެޝަނަލް ޕާޓީ (އެމްއެންޕީ) އިން އިންތިހާބުގެ ފުރަތަމަ ބުރުގެ އެންމެ ގިނަ ވޯޓު ހޯދި ޕީޕީއެމް/ޕީއެންސީއާ އެކު ކޯލިޝަން އެއްބަސްވުމުގައި ސޮއިކޮށް، ދެ ފަރާތުން އެކުގައި މަސައްކަތް ކުރުމަށް ނިންމައިފިއެވެ. 

މީރުމާގައި މި ވަގުތު ކުރިއަށްދާ އިވެންޓުގައި އެމްއެންޕީގެ ފަރާތުން ބައިވެރިވެވަޑައިގަތީ އެ ޕާޓީގެ ރިޔާސީ ކެންޑިޑޭޓު އަދި ދަނގެތި ދާއިރާގެ މެންބަރު މުހައްމަދު ނާޒިމްގެ އިތުރުން ނައިބު ރައީސުންގެ ގޮތުގައި ތިއްބެވި ތިމަރަފުށި ދާއިރާގެ މެންބަރު އަބްދުالله ރިޔާޒާއި ވިލިމާލެ ދާއިރާގެ މެންބަރު އަހުމަދު އުޝާމެވެ.

ޕީޕީއެމް/ޕީއެންސީގެ ފަރާތުން އިވެންޓުގައި ބައިވެރިވެވަޑައިގަތީ ޕީއެންސީގެ ރައީސް އަދި އެ ކޯލިޝަންގެ އެކްޓިން ލީޑަރު އަބްދުލްރަހީމްގެ އިތުރުން ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒާއި މުއިއްޒުގެ ރަނިން މޭޓު އަދި ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފެވެ.

މި ބައްދަލުވުމުގައި ވާހަކަދައްކަވަމުން އެމްއެންޕީގެ ލީޑަރ ނާޒިމް ވިދާޅުވެފައިވަނީ، އެ ޕާޓީން ތިބީ ޖާނާއި މާލުން ގުރުބާން ވެގެންވެސް ޑރ މުއިއްޒުއަށް އިންތިހާބުގެ ދެވަނަ ބުރު ކާމިޔާބުކޮށްދިނުމަށް ކަމުގައިކަމަށެވެ. 

މީގެ އިތުރުން މިއަދު ވެވުނީ އެއްބަސްވުމަކީ ސަރުކާރުގެ ހިއްސާ ދެވޭ ގޮތާއި ވަޒީފާތަކާއި ސިޔާސީ މަގާމުތައް ދެވޭނެ ގޮތަށްތޯ ކުރެވުނު ސުވާލަށް ޖަވާބުދެއްވަމުން އިދިކޮޅު ކޯލިޝަން ހިންގުމާއި ވަގުތީގޮތުން ހާވާލުވެ ހުންނެވި އަބްދުއްރަހީމް އަބްދުالله ވިދާޅުވީ، އެފަަދަ އެއްވެސް ކަމަކަށް ދެ ޕާޓީގެ ދެމެދުގައި ވެވުނު އެއްބަސްވުމުގައި ނުވާކަމަށެވެ. 

މިކަމާއި ގުޅިގެން އެމްއެންޕީގެ ލީޑަރ ނާޒިމް ވިދާޅުވީ، ކޯލިޝަން ހެދުމަށް އެއްބަސްވެގެން އައީ އެއްވެސް ޝަރުތެއް ކުރިމަތިިނުކޮށް ކަމަށާއީ ޕީއެންސީގެ ކެންޑިޑޭޓު މުއިއްޒަށް ތާއީދުކުރަން ނިންމީ މުއިއްޒުގެ މެނިފެސްޓޯއާއި ނާޒިމްގެ މެނިފެސްޓޯގެ ސިޔާސަތުތަކުގައި ދާދި އެއް ގޮތް ކަންކަން ހުރުމުން ކަމަށެވެ.

ކުރީގެ ޑިފެންސް މިނިސްޓަރު އަދި ދަނގެތި ދާއިރާގެ މެމްބަރު މުހައްމަދު ނާޒިމް ރިޔާސީ ކެންޑިޑޭޓެއްގެ ގޮތުގައި ނެރެގެން ރިޔާސީ އިންތިހާބުގެ ފުރަތަމަ ބުރުގައި ލިބުނީ 1907 ވޯޓެވެ. އެއީ ވޯޓް ލީ މީހުންގެ 0.8 ޕަސެންޓް ވޯޓެވެ. ޕީއެންސީގެ ކެންޑިޑޭޓް ޑރ.މުހައްމަދު މުއިއްޒަށް 101،635 ވޯޓެވެ. އެއީ 46 ޕަސެންޓް ވޯޓެވެ.