ރައީސް ޔާމިން ޢަބްދުލް ޤައްޔޫމްގެ އިރުޝާދާއި ލަފަޔާއި ޚިލާފަށް ޕީޕީއެމް/ޕީއެންސީ ކޯލިޝަނުން ސިޔާސީ އެއްވެސް މަސައްކަތެއް ނުކުރާނެ ކަމަށް ނައިފަރު ދާއިރާގެ މެމްބަރު އަހްމަދު ޝިޔާމް ވިދާޅުވެއްޖެއެވެ.

ޝިޔާމް މިހެން ވިދާޅުވީ އޭނާ ކުރެއްވެވި ޓްވީޓެއްގައެވެ.

ޝިޔާމް މިފަދައިން ޓްވީޓު ކުރައްވައިފައިމިވަނީ ޖުމްހޫރީ ޕާޓީއާއި އެކު ކޯލިޝަން ހެދުމަށް ރައީސް ޔާމިން ދެކޮޅުހައްދަވައިފައިވާ ކަމަށް ބައެއް ނޫސްތަކުން ޚަބަރު ފަތުރައި، އެ އެންގުމާ ދެކޮޅަށް ޕީޕީއެމުން ޖޭޕީ އާއި މަޝްވަރާ ކުރަން ފަށައިފައިވާ ކަމަށް ބުނެ ލިޔެފައިވާ ޚަބަރަކާއި ގުޅިގެންނެވެ.

Advertisement

"ރައީސް ޔާމިންގެ ވިސްނުންފުޅާއި އިރުޝާދުފުޅާއި ޚިލާފަށް ޕީޕީއެމް/ޕީއެންސީ އިން އެއެވެސް ސިޔާސީ މަސައްކަތެއް ނުކުރާނެ، ރިޔާސީ އިންތިޚާބުގައި އަޅުގަނޑުމެން ކަންކުރަންވީ ގޮތުގެ ފުރިހަމަ "ގައިޑެންސް" ރައީސް ޔާމިންގެ ފަރާތްޕުޅުން ބަރާބަރަށް އަޅުގަނޑުމެންނަށް ލިބޭ" ޝިޔާމް ވިދާޅުވެފައިވެއެވެ.

ޝިޔާމް ވިދާޅުވީ މާތް اللهގެ އިރާދަފުޅާއި އެކު ރައްޔިތުން އެދޭ އަމާޒަށް ޕީޕީއެމުން ދާނެ ކަމަށެވެ.  

ސެޕްޓެމްބަރ 9ވަނަ ދުވަހު ބޭއްވި ރިޔާސީ އިންތިޚާބުގައި ވާދަކޮށް އެންމެ ގިނަ ވޯޓް ހޯއްދެވި ޑރ މުޙައްމަދު މުޢިއްޒާއި ރައީސް އިބްރާހިމް މުޙައްމަދު ޞާލިޙް އިންތިޚާބުގެ ދެވަނަ ބުރުގައި ވާދަކުރެއްވުމަށް ހަމަޖެހިފައިވާއިރު، ދެކެންޑިޑޭޓުންވެސް ދަނީ އިންތިޚާބުގައި ވާދަކުރެއްވި އެހެން ކެންޑިޑޭޓުންނާއި ޕާޓީތަކާއި މަޝްވަރާ ކުރައްވަމުންނެވެ.

މިހާރު އެމްއެންޕީ އިން ވަނީ ޕީޕީއެމް/ޕީއެންސީ އާއި އެކު އިންތިޚާބުގެ ދެވަނަ ބުރުގައި މަސައްކަތް ކުރުމަށް އެއްބަސްވެފައެވެ