ހިޔާ ފްލެޓްތަކުގެ ފިނިޝިން ނިންމަން ރައްޔިތުން ހަރަދުކުރި ލާރީގެ ބަދަލު ދެއްވާނެ ކަމަށް ޕީއެންސީ/ޕީޕީއެމްގެ ރިޔާސީ ކެންޑިޑޭޓް ޑރ މުޙައްމަދު މުޢިއްޒު ވިދާޅުވެއްޖެއެވެ.
ޑރ މުޢިއްޒު މިހެން ވިދާޅުވީ ޕީއެންސީ/ ޕީޕީއެމުން ރޭ ހުޅުމާލޭގައި ބޭއްވި ޖަލްސާގައި ވާހަކަ ދައްކަވަމުންނެވެ.
މުޢިއްޒު ވިދާޅުވީ ރައީސް ޔާމިންގެ ސަރުކާރުން ނިންމަވާފައި އޮތީ ހިޔާ ފްލެޓް ފަސް ޑިޒައިނަކަށް ހެދުމަށް ކަމަށާއި އަދި އޭގެ ތެރެއިން ރައްޔިތުން އިޚްތިޔާރު ކުރާ ޑިޒައިނަކަށް ފިނިޝިން ނިންމައިދޭ ގޮތައް ކަމަށެވެ. އަދި ފިނިޝިން ނިންމަންދާ ފައިސާ ލޯނުގެ ގޮތުގައި އޭރު އޮތް ކުންފުނި ކަމަށްވާ އެޗްޑީސީ އިން ނަގާ ގޮތައް ކަމަށާއި އެގޮތައް ނިންމާފައިވަނިކޮށް މިސަރުކާރުން އެލޯނުވެސް ދޫކޮށްލީ ކަމަށް މުޢިއްޒު ވިދާޅުވިއެވެ.
މުޢިއްޒު އިތުރަށް ވިދާޅުވީ ލޯނު ދޫކޮށްލައި ތަންވެސް ނުނިންމައި ހަމައެކަނި ހަތަރު ފާރު ރައްޔިތުންނާއި ހަވާލުކުރީ ކަމަށެވެ. އަދި އެގޮތައް ހަވާލުކުރުމުގެ ސަބަބުން ރައްޔިތުންނަށް ޖެހުނީ ބޮޑު ތަކުލީފެއް ކަމަށެވެ. ބޮޑެތި ލޯނުތައް ނަގައި ދަރަނީގެ މައްޗަށް ދަރަނި ނަގަން ޖެހުނު ކަމަށް ޑރ މުޢިއްޒު ވިދާޅުވިއެވެ.
އަދިވެސް ނިކަމެތި ބައެއް މީހުން އުޅެނީ ފްލެޓް ނިންމައި ނުލެވިގެން ކަމަށާއި، ތަޅުންމަތީގައި ތަރުފާލު އަޅައިލައިގެން ނިދާ މީހުން އެބައުޅޭ ކަމަށް މުޢިއްޒު ވިދާޅުވިއެވެ.
އެއްބައި ޢާއިލާތަކުން މުޅި ޢާއިލާގެ އާމްދަނީ އެއްކޮށްލައިގެން ލޯނު ނަގައިގެން އެބަ އުޅޭ ކަމަށާއި، ހަމަޖެހޭ ދިރިއުޅުމެއް އެންމެންވެސް ބޭނުންވާ ކަމަށާއި، އެހެން ހަދައިގެންވެސް އެތަންތަނަށް ވަދެ އެތިބީ އެހެންވެ ކަމަށާއި މިއީ އިންސާފެއް ނޫން ކަމަށް ޑރ މުޢިއްޒު ވިދާޅުވިއެވެ.
"އަޅުގަނޑުމެން ކަންކުރާނެ ގޮތަކީ އެވްރެޖް ގޮތެއްގައި އެދިޔަ ޚަރަދަށް ބަލާފަ، އަރބަންކޯއިން އެކޯސްޓް ހަމަ އޮރިޖިނަލީ ޕްލޭން ކުރިގޮތައް މިކުރެވުނު ޚަރަދު އަނބުރާ ދައްކާގޮތައް، އެވްރެޖް އަގަށް" މުޢިއްޒު ވިދާޅުވިއެވެ.
މުޢިއްޒު ވިދާޅުވީ ހިޔާ ފްލެޓް ތަކުގެ ފިނިޝިން ނިންމަން ރައްޔިތުންއަތުން ޚަރަދުވި އެވްރެޖް އަގު ބަލައި އަރބަންކޯއިން ލޯނުނަގައި އެވްރެޖް ޢަދަދަށް ވާވަރަށް ރައްޔިތުންނަށް އަނބުރާ އެފައިސާ ދެއްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
