މިއަހަރުގެ މޭމަހު އައްޑޫ ސިޓީ މަރަދޫ ފޭދޫގައި ހިންގި މާރާމާރީގައި މަރުވި މަރަދޫފޭދޫ، ބްލޫސްޓާ، އަހުމަދު ޝުޢައިބުގެ މަރުގެ މައްސަލާގައި ދައުވާ އުފުލާފައިވާ އޭނާގެ ކޮއްކޮ ހުސެއިން މަވާޒް 12 އަހަރަށް ޖަލަށްލާން ކްރިމިނަލް ކޯޓުން މިއަދު ޙުކުމް ކޮށްފި އެވެ.

ޝުޢައިބު އާއި މަވާޒް އާއި ދެމެދު ހިންގި ހަމަނުޖެހުމެއް މާރާމާރީއަކަށް ބަދަލުވެ ޝުޢައިބް މަރާލި 25 އަހަރުގެ މަވާޒްގެ މައްޗަށް ކްރިމިނަލް ކޯޓުން ކޮށްފައިވަނީ އެނގިހުރެ މީހަކު މަރާލި ކަމުގެ ކުށުގެ ދައުވާއެވެ. މިމައްސަލައިގައި ތަހްޤީޤީ މަރުޙަލާގައި ކުށަށް އިޢްތިރާފް ވެ މަވާޒްވަނީ އެ އިޢްތިރާފް ކޯޓުގައިވެސް ދަމަހައްޓައިފައެވެ.

މިއަދު އޭނާގެ ކުށަށް ޙުކުމް އިއްވުމަށް ބޭއްވި ޝަރީޢަތުގެ މަޖިލީހުގައިވެސް އޭނާ ވަނީ ދައުލަތާއި އެކު އެނާ ވެފައިވާ އިޢްތިރާފް ދަމަހައްޓައިފައެވެ.

މަވާޒް އާއި ދައުލަތާއި ދެމެދުގައި ވެފައިވާ އިޢްތިރާފްގައި ބުނެފައިވަނީ މިއީ މީހަކު މަރުވެފައިވާ މައްސަލައަކަށް ވާއިރު އަނިޔާވެރިކަން އިންތިހާޔަށް ފެންނާތީ ކުށުގެ އަދަބުން ދަރަޖައެއް އިތުރު ކޮށްފައިވާ ކަމަށެވެ. އަދި ވޭތުވެ ދިޔަ ހަ އަހަރު ތެރޭ މަވާޒްގެ މައްޗަށް ޑައިމޯފިން ބޭނުން ކުރުމުގެ މައްސަލައަކާއި ރޭޕްގެ މައްސަލައެއް ސާބިތުވެފައިވާތީ އަދަބުގެ ދަރަޖައެއް މަތި ކޮށްފައިވެސް ވެއެވެ. އެއްބަސްވުމުގައި ދައުލަތުން އޭނާގެ މައްޗަށް ކަނޑައަޅާފައި ވަނީ 15 އަހަރުގެ ޖަލު ހުކުމެކެވެ.

ނަމަވެސް ތަހްޤީޤީ މަރުހަލާއިން ފެށިގެން ކުށް ކުރިކަމަށް އެއްބަސްވެ ، އިއްތިރާފް ވެ އަދި އެއްބާރުލުން ދޭތީ އެ އަދަބުން ދަރަޖައެއް ދަށްކޮށް، އޭނާގެ މައްޗަށް 12 އަހަރާއި ހަ މަހުގެ ޖަލު ހުކުމެއް ކަނޑައަޅުމަށް އެއްބަސްވުމުގައި ބަޔާންކޮށްފައިވެ އެވެ.

މަވާޒް އެގޮތައް އެއްބަސްވެފައިވާތީ އިސް ގާޒީ އާދަމް މުހައްމަދު ވަނީ އެއްބަސްވުމުގައި ކަނޑައަޅާފައިވާ ގޮތަށް 12 އަހަރާއި ހަމަސް ދުވަހަށް މަވާޒް ޖަލަށްލުމަށް ހުކުމްކޮށްފަ އެވެ. ހަމައެއާއި އެކު ކައްފާރާގެ ގޮތުގައި 60 ދުވަހު ރޯދަ ހިފަން މަވާޒްއަށް ވަނީ އަންގާފަ އެވެ.