ކުރީގެ ރައީސް ޔާމީން އަބްދުލްގައްޔޫމް ގެ ވެރިކަމުގައި ހުޅުމާލެ ދެވަނަ ފިޔަވީގައި ތަރައްގީ ކޮށްފައިވާ ވިނަރެސް ފްލެޓުތަކާއި، އެނޫންވެސް ސޯޝަލް ހައުސިންގް ޔުނިޓް ތަކުގެ އަގު މިސަރުކާރުން ދެމުންދާ އަގު ކުޑަ ކުރެވޭނެ ކަމަށާ، އެމަނިކުފާނުގެ ވެރިކަމެއްގައި އެކަން ކުރައްވާނެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ. 

ރޭ މާވެޔޮ މަގުގައި ބޭއްވި ކަންމަތީ ބައްދަލުވުމުގައި ވާހަކަ ދައްކަވަމުން މުޢިއްޒު ވިދާޅުވީ، މިހާރު ވިނަރެސް ގެ ނަމުގައި ނަން ބަދަލު ކޮށްފައިވާ ނަމަވެސް، އެ އެޕާޓްމަންޓް ތަކަކީ ކުރީ ސަރުކާރުން، އެމަނިކުފާނުގެ ހައުސިންގް މިނިސްޓަރު ކަމުގައި އަޅާފައިވާ އެޕާޓްމަންޓް ތަކެއް ކަމަށާ، އެ މަޝްރޫއުގެ އެގްރީމަންޓް ގައި ސޮއި ކުރެއްވީވެސް އެމަނިކުފާނު ކަމަށެވެ. 

އެހެންކަމުން، އެ އެޕާޓްމަންޓް ތަކުގެ އަގުތައް އެމަނިކުފާނަށް ރަނގަޅަށް އެނގިލައްވާ ކަމަށްވެސް މުޢިއްޒު ވިދާޅުވިއެެވެ. 

Advertisement

ކަންމިހެން ހުރި ނަމަވެސް، މިސަރުކާރުން އެ އެޕާޓްމަންޓް ތަކުގެވެސް އަގު އަސްލު އަގަށްވުރެ ބޮޑު ކޮށް، ޑައުންޕޭމަންޓް ގެ ގޮތުގައިވެސް ބޮޑު އެއްޗެއް ދެގޮތައް ނިންމާފައިވާ ކަން މުޢިއްޒު ވިދާޅުވިއެެވެ. 

”އަޅުގަނޑު އިރާދަކުރެއްވިއްޔާ ވިނަރެސް ފްލެޓްތަކުގެ ޑައުންޕޭމަންޓަށް ދައްކަމުންދާ ބޮޑު އަގާއި މަހުން މަހަށް ދައްކަންޖެހޭ އަގު ކުޑަ ކޮށްދީ ރައްޔިތުންގެ އަތްފޯރާފަށަށް ކުޑަ ކޮށްދޭނަން. މިހެން މި ބުނަނީ އެކަން އެގޮތަށް ކުރެވޭނެތީ." މުއިއްޒު ވިދާޅުވިއެވެ.

މުޢިއްޒު އިތުރަށް ވިދާޅުވީ ވިނަރެސްގެ އިތުރުން ހިޔާ ސަރަހައްދުގައި ސަރުކާރުގެ ކުންފުނިތަކުން އަޅާފައިވާ ފުލެޓު ތަކުގެ އަގުވެސް އެނގިލައްވާ ކަމަށާ، އެ ފުލެޓް ތަކުންވެސް ކޮމާޝަލްރޭޓުގެ އެންމެ މަތީ އަގު ނަގަމުންދާ ކަމަށެވެ. ނަމަވެސް ރައީސް ޔާމީން ގެ ސަރުކާރުން އެ މަޝްރޫއު ފެށްޓެވީ އެފަދަ ވިޔަފާރި އެއް ކުރަން ނޫން ކަމަށްވެސް އެމަނިކުފާނު ވިދާޅުވި އެވެ. 

"އެތަންތަނުގެ އަގު ކުޑަކުރެވޭނެ. އެހެންވީމާ ސަރުކާރުގެ އެކި ކުންފުނިތަކުން، ހުޅުމާލޭ ދެވަނަ ފިޔަވަހީގައި އަޅާފައިވާ ފުލެޓު ތަކުގެ ވެސް އިރާދަކުރެއްވިޔާ އަގު ކުޑަ ކޮށްދޭނަން." ޑރ. މުޢިއްޒު ވިދާޅުވިއެެވެ.