މާލޭގެ އަމީނީ މަގު ޒަމާނީ ފެންވަރަކަށް ތަރައްގީ ކުރުމުގެ މަސައްކަތް ކުރަމުން މިދަނީ ސީދާ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ބެއްލެވުމުގެ ދަށުންކަމަށް އެ މަސައްކަތް މިހާރު ހަވާލުކޮށްފައިވާ ރޯޑް ޑިވެލޮޕްމަންޓު ކޯޕަރޭޝަން (އާރުޑީސީ) ގެ މެނޭޖިން ޑިރެކްޓާ މޫސާ އަލިމަނިކު (މޫކޭ) ވިދާޅުވެއްޖެ އެވެ. 

މޫކޭ މި ފަދައިން ވިދާޅުވެފައި ވަނީ އެމްޑީޕީން ބޭއްވި ކަންމަތީ ބައްދަލުވުމެއްގައި ވާހަކަދައްކަވަމުން ނެވެ. އަމީނީ މަގު އާރުޑީސީއާއި ހަވާލުކޮށްގެން ކުރިއަށް ގެންދިއުމަށް މާލޭ ސިޓީ ކައުންސިލުން ދެކޮޅުހަދަމުން ގޮސްފައިވާކަމަށް މޫކޭގެ ވާހަކައިގައި ފާހަގަކުރެއްވި އެވެ. 

އެއާއެކު އޭނާ ވިދާޅުވީ އަމީނީ މަގުގައި ފެންބޮޑުވާ މައްސަލައަށް މިހާރު ޙައްލު ހޯދިފައިވާ ކަމަށެވެ. އެ މަގު ޒަމާނީ ފެންވަރަކަށް ތަރައްގީކުރުމަށް ފެށި މަސައްކަތުގެ "ބޮޑު ބައި" މިހާރު ނިމިފައިވާ ކަމަށް މޫކޭ ވިދާޅުވި އެވެ. އަދި ވިދާޅުވީ އެ މަގުގެ މަސައްކަތް އާރުޑީސީން ކުރިއަށް ގެންދަނީ ސީދާ ރައީސް ޞާލިހުގެ ބެއްލެވުމުގެ ދަށުން ކަމަށެވެ. 

މޫކޭ އެމްޑީޕީ ޖަލްސާގައި ވާހަކަދައްކަވަނީ/ ފޮޓޯ: ސީއެންއެމް

އެހެންކަމުން މި މާލޭގެ ރައްޔިތުންނަަށް އޮތް ގޮތަކީ ރައީސް އިބްރާހިމް މުޙައްމަދު ޞާލިހަށް ތާއީދުކުރުންކަމަށް މޫކޭ ވިދާޅުވި އެވެ. 

އަމީނީ މަގުގައި ތާރުއެޅުމުގެ މަސައްކަތް ހައުސިން މިނިސްޓްރީން އާރްޑީސީއާ ހަވާލުކޮށްފައިވަނީ މިދިޔަ އަހަރުގެ ޖުލައި މަހުއެވެ. އެ މަޝްރޫއުގެ ދަށުން 1.7 ކިލޯ މީޓަރުގެ މަގުގައި ތާރު އެޅުމަށް ވަނީ ހަމަޖެހިފައެވެ. އެ މަސައްކަތް ހަވާލުކުރީ 10 މަސްތެރޭ ނިންމާ ގޮތަށެވެ. 

އެހެން ނަމަވެސް ޝެޑިއުލާއި އެއްގޮތަށް އެ މަސައްކަތް ކުރިއަށް ނުދާތީ، ދެ ފަހަރެއްގެ މަތިން ޕްލޭނިން މިނިސްޓްރީން ވަނީ މުއްދަތު އިތުރުކޮަށްދީފަ އެވެ.

މި މަސައްކަތް އާރްޑީސީ އަށް ހަވާލު ކޮށްފައި ވަނީ 84.4 މިލިއަން ރުފިޔާ އަށެވެ. އެއީ މާލޭ ސިޓީ ކައުންސިލުން އެ މަގު ތަރައްގީކުރުމަށް ނިންމާފައިވާ އަގަށްވުރެ ދެގުނަ ބޮޑު އަގެއްކަމަށް އެ މަސައްކަތް ހަވާލުކުރުމާއި ގުޅިގެން މާލޭ ސިޓީ ކައުންސިލުން ބޭއްވި ޕްރެސް ކޮންފަރެންސްގައި ވާހަކަދައްކަވަމުން މޭޔަރު ޑރ މުހައްމަދު މުއިއްޒު ހާމަކުރެއްވި އެވެ.