ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވަނީ ދައުލަތުން ވައްކަން ކުރުމަކީ ފެޝަނަކަށް ހައްދަވާފައި ކަމަށް ކުރީގެ ނައިބު ރައީސް ޑރ މުޙައްމަދު ޖަމީލު އަހުމަދު ވިދާޅުވެއްޖެ އެވެ.
ޑރ ޖަމީލު މިފަދައިން ވިދާޅުވެފައި ވަނީ ވެރިކަމަށް ވަޑައިގަތުމުގެ ކުރިން ވައްކަމާއި ކޮރަޕްޝަނަށް ދެއްވާނީ "ޒީރޯ ޓޮލަރެންސް" ކަމަށް ރައީސް ޞާލިހު ވިދާޅުވި ނަމަވެސް އެ ޕޮލިސީ ވެރިކަމުގެ 5 އަހަރުގައި ތަންފީޒު ކުރައްވާފައި ނުވާކަން ހާމަކުރައްވާ ކުރެއްވި ޓްވީޓެއްގަ އެވެ.
ޑރ ޖަމީލު ވިދާޅުވީ ރައީސް ޞާލިހު ވެރިކަމަށް ވަޑައިގެން ފުރަތަމަ ވެސް ކުރެއްވި ކަމަކީ އެމަނިކުފާނުގާއި ގާތް ބޭފުޅުންނަށް ބަދަލުގެ ގޮތުގައި ދައުލަތުގެ ފައިސާ ބެއްސެވުން ކަމަށެވެ.
ހަމަ އެއާއެއްގޮތަށް ސަރުކާރު ކުންފުނިތަކުން ހިންގާ ގިނަ މަޝްރޫއުތައް ވެސް ރައީސް ޞާލިހުގެ ގާތް މީހުންނަށް ބައްސަވާ، އެ މަޝްރޫއުތަކުގެ ތެރެއިން "ކަޓު" ގެ ގޮތުގައި ބޮޑެތި އަދަދުތަކުން ދައުލަތުގެ ފައިސާ ނަގަމުންދާކަމަށް ޑރ ޖަމީލު ތުހުމަތުކުރެއްވި އެވެ.
ދައުލަތުގެ ވައްކަންތައް މެކުހަށް ޖަހާފައިވީ ނަމަވެސް ރައީސް ޞާލިހުގެ "ޒީރޯ ޓޮލަރެންސް" ޕޮލިސީ ތަންފީޒު ކުރައްވާތަން ފެނިވަޑައި ނުގަންނަވާ ކަމަށާއި، މި ވެރިކަމުގައި ދައުލަތުން ވައްކަން ކުރުމަކީ ފެޝަނަކަށް ހަދާފައިވާކަމަށް ޑރ ޖަމީލު ވިދާޅުވި އެވެ.
"އިބޫގެ ކޮރަޕްޝަނަށް ޒީރޯ ޓޮލަންސަށް ވީ ކިހިނެތް؟ ގާތް އެތައް ބަޔަކަށް ބަދަލުގެ ނަމުގައި ބިލިއަނުން ފައިސާ ބަހާ ކަޓް ނެގުން. ގާތް ރަޙްމަތްތެރިން ފެނަކަ، އާރުޑީސީ، ސްޓެލްކޯ، އެމްޓީސީސީ ފަދަ ކުންފުނިތައް ލޫޓްވާލުން. މުޅިދައުލަތުގައި ވައްކަން ފެޝަނަކަށް ހެދުން"
ޑރ ޖަމީލު އަހުމަދު
ޑރ ޖަމީލު މިފަދައިން ވިދާޅުވެފައިވާއިރު، އެމްޑީޕީން ވަކިވެ ވަޑައިގެން އެ ޕާޓީގެ މެމްބަރުން ވެސް ގެންދަވަނީ ސަރުކާރުގެ ތެރެއިން ވައްކަމާއި ކޮރްޕަޝަންގެ ބޮޑެތި ޖަރީމާތައް ހިންގަމުންދާ ކަމުގެ ގިނަ ތުހުމަތުތަކެއް ކުރައްވަމުން ނެވެ.
ވަކިން ޚާއްސަކޮށް ކޯވިޑް ނަވާރައާއި ގުޅިގެން ދިމާވެދާނެ ނުރައްކާތެރި ހާލަތުގައި ރައްޔިތުންނަށް ފަރުވާދިނުމަށް ވެންޓިލޭޓަރުތަކެއް ގަތުމުގެ ނަމުގައި ހިންގި ބިޔަ ކޮރަޕްޝަންގެ މައްސަލަ ނުބަލާ ފައިލްކޮށްފައިވާކަން ފާހަގަކޮށް ގިނަ ފާޑުކިޔުންތަކެއް ވަނީ ސަރުކާރަށް އަމާޒުވެފަ އެވެ.
Advertisement
This content is created and paid for by advertisers and does not involve Voice Journalists
