ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ގެ ވެރިކަމުގައި އދ. ދިގުރަށުގައި ތަރައްގީގެ ގިނަ މަޝްރޫއުތަކެއް ހިންގަވާނެ ކަމަށް ވައުދުވެވަޑައިގެންފިއެވެ. 

އިއްޔެ އަރި އަތޮޅަށް ކުރެއްވި ކެންޕެއިން ދަތުރުފުޅުގައި ދިގުރަށަށް ވަޑައިގެން އެރަށު ރައްޔިތުންނާ ބައްދަލުކުރައްވާ ވާހަކަ ދައްކަވަމުން މުޢިއްޒު ވިދާޅުވީ ދިގުރަށަކީ ފަތުރުވެރިކަމުގެ ދާއިރާ ކުރިއަރުވަން ގިނަ އިންވެސްޓްމެންޓެއް ކުރަމުންދާ ރައްޔިތެއް ދިރިއުޅެމުންދާ ރަށެއް ކަމަށެވެ. އެގޮތުން ޓީޖީއެސްޓީ ގެ ގޮތުގައި މުޅި ދިވެހިރާއްޖެއިންވެސް މީހުން ދިރިއުޅޭ ރަށްތަކުން ދެވަނަ އަށް އެންމެ ގިނަ އާމްދަނީ ދައުލަތަށް ލިބެނީ ދިގުރަށުންކަން މުޢިއްޒު ފާހަގަކުރެއްވި އެވެ. 

ދިގުރަށު ބައްދަލުވުމުގެ ތެރެއިން--ފޮޓޯ/ ޕީޕީއެމް 

އެހެން ކަމުން ފަތުރުވެރިކަން ކުރިއެރުވުމަށާއި، ރަށުގެ ތަރައްގީއަށް އެމަނިކުފާނުގެ ވެރިކަމެއްގައި ރައްޔިތުން ބޭނުންވާ ކަންކަން އެ އެދިލައްވާ ގޮތަކަށް ކޮށްދެއްވާނެ ކަމަށް މުޢިއްޒު ވިދާޅުވިއެެވެ. އެގޮތުން ކޮށްދެއްވާނެ ބައެއް ކަންކަމަކީ؛ 

1) ރައްޔިތުން ބޭނުންވާ ގޮތަށް ދިގުރަށު މަގު ހެދުން

2) ދިގުރަށު ސުކޫލު ތަރައްގީ ކުރުން

3) ސިއްހީ ނިޒާމު ހަރުދަނާ ކުރުން

4) އެންމެ ބޮޑު މެރިން ޕްރޮޓެކްޓެޑް އޭރިއާ އޮންނަނީ އެ  ސަރަޙައްދުގައި ކަމަށްވާތީ، އޭގެ މައްޗަށް ބިނާކޮށް އިންޓަރނޭޝަނަލް ޔުނިވަރސިޓީތަކުގެ އެހީތެރިކަމާ އެކީގައި އިންޓަރނޭޝަނަލް ރިސަރޗް ސެންޓަރެއް ދިގުރަށުގައި ޤާއިމްކޮށްދިނުން. 

އެ މަރުކަޒުގެ ސަބަބުން ކައިރި ރަށްތަކަށްވެސް ފައިދާވާނެ ކަމަށާ އަދި އެ ރަށުގެ އިތުރުން ދައުލަތަށް ވަންނަ ފައިސާވެސް އިތުރުވެގެންދާނެކަން މުޢިއްޒު ފާހަގަކުރެއްވި އެވެ. 

5) އިންޓަރނޭޝަނަލް ކޮންފަރެންސްތައް ބޭއްވޭފަދަ ކޮންވެންޝަން ސެންޓަރެއް ޤާއިމްކޮށް މައިސް ޓޫރިޒަމަށް ދިގުރަށް ހުޅުވާލަދިނުން

6) ރައްޔިތުން ބޭނުންވާ ގޮތަށް ރައްޔިތުން ގެދޮރުވެރި ކުރުވުން. ފުލެޓް/ ރޯ ހައުސް ނުވަތަ ގޯތި ދޫކޮށްގެން

7) ގިރާ ސަރަހައްދު ހިމާޔަތް ކުރުން

8) ކުނީގެ މައްސަލަ ހައްލު ކުރުން

މުޢިއްޒު ވިދާޅުވީ ދިގުރަށުގައިވެސް އަދި އެހެންވެސް ރަށްތަކުގައި މި ސަރުކާރުން މިހާރު ފަށާފައިވާ މަޝްރޫޢުތަކެއްވެސް އެމަނިކުފާނުގެ ވެރިކަމުގައި ބާރަށް ކުރިއަށް ގެންދަވާ ނިންމަވާނެ ކަމަށެވެ.