ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި "ޤައުމިއްޔަތަކީ" ވަކި މާއްދާއެއްގެ ގޮތުގައި ކިޔަވައިދިނުމަށް ޤައުމީ މަންހަޖުގައި ހިމަނުއްވާނެކަމަށް އެ ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ވިދާޅުވެއްޖެ އެވެ. 

ޑރ މުއިއްޒު މިފަދައިން ވިދާޅުވެފައި ވަނީ އާޓިފިޝަލް ބީޗުގައި ބޭއްވި "މަވެސް ޕީޕީއެމް" ޖަލްސާގައި ވާހަކަދައްކަވަމުން ނެވެ. 

އެގޮތުން މުއިއްޒު ވިދާޅުވީ ސުކޫލުތަކުގައި ކިޔަވައިދޭ އިސްލާމް މާއްދާ އިނގިރޭސިބަހުން ކިޔަވާ ދިނުމަށް ސަރުކާރުން ނިންމި ނިންމުމަކީ ވަރަށް ހިތާމަކުރައްވާ ކަމެއް ކަމަށެވެ.

Advertisement

އެގޮތުން ގައުމިއްޔަތުގެ އެންމެ މުހިންމު ބަހާ އަކީ ބަސް ކަމަށް ވެފައި، ދިވެހިރާއްޖެ އަކީ އަމިއްލަ ވަންތަ ބަހެއް އޮންނަ ގައުމަކަށް ވުމުން، އެ ބަސް ދޫކޮށް އިނގިރޭސިބަހުން ދަރުވަރުންނަށް އިސްލާމް ކިޔަވައިދިނުމަށް ނިންމި ނިންމުމަކީ ޤައުމިއްޔަތާއި ދުރަށް ދަރިވަރުންގެ ވިސްނުން ގެންދިއުމަށް ކުރެވޭ ކަމެއްކަމަށް ޑރ މުއިއްޒު ސިފަކުރެއްވި އެވެ. 

އެވާހަކައާއި ގުޅުވާ ޑރ މުއިއްޒު ވިދާޅުވީ އިސްލާމް މާއްދާ އިނގިރޭސިބަހުން ކިޔަވައިދިނުމަކީ އެއްވެސް ބެލެނިވެރިއަކު ބޭނުންފުޅުވާނެ ކަމެއް ނޫން ކަމަށެވެ. އެހެންކަމުން އެކަން ބަދަލުކޮށް، ޤައުމިއްޔަތާއި ދިވެހި ބަހަށް ޚާއްސަ އިސްކަމެއް ދީ، ބަސް ކުރިއެރުވުމަށް މުހިންމު ކަންތައްތަކެއް ކުރައްވަން ގައްދުކުރައްވާ ކަމަށް ޑރ މުއިއްޒު ވިދާޅުވި އެވެ. 

އެއާއެކު އެމަނިކުފާނު ވިދާޅުވީ ޤައުމިއްޔަތަކީ ވަކި މާއްދާއެއްގެ ގޮތުގައި ކަނޑައަޅާ ދަރިވަރުންނަށް ދިވެހި ޤައުމިއްޔަތާއި ގުޅުންހުރި މުހިންމު ކަންކަން ކިޔަވައިދިނުމަށް ގައުމީ މަންހަޖުގައި ހިމަނުއްވާނެ ކަމަށެވެ. އަދި ސުކޫލު ދަރިވަރުންނަށް ދިވެހި ގައުމުގެ މިނިވަންކަމާއި އިސްތިގުލާލުގެ ދިފާއުގައި ގުރުބާންވި އަބްތާލުންގެ ވާހަކަތަކާއި، ދިވެހި ތާރީޚާއި ގައުމިއްޔަތާއި ގުޅުންހުރި ކަންކަން ތައުލީމީ މަންހަޖުގެ ތެރެއިން ކިޔަވައިދީ އޮޅުންފިލުވައިދެއްވާނެ ކަމަށް ޑރ މުއިއްޒު ވިދާޅުވި އެވެ. 

ޑރ މުއިއްޒު ވިދާޅުވީ ސުކޫލު ދަރިވަރުންނަށް، ބޮޑުވަމުން އަންނަ ޒުވާނުންނަށް ޤައުމިއްޔަތާއި ގުޅުންހުރި މުހިންމު ވާހަކަތައް ބުނެދީ ދަސްކޮށްދިނުމަކީ ދިވެހިރާއްޖޭގެ އަމިއްލަވަންތަކަން ނެގެހެއްޓުމަށް ކޮންމެހެން މުހިންމު ކަމެއް ކަމަށެވެ. އަދި އެއީ ދިވެހީންގެ ރާއްޖެ، އަންނަން އޮތް ޖީލުތަކަށް އަމާނާތްތެރި ކަމާއެކު ފޯރުކޮށްދިނުމަށް ކޮންމެހެން ކުރަން ޖެހޭ ކަމެއްކަމަށް ދެކެވަޑައިގަންނަވާ ކަމަށް ޑރ މުއިއްޒު ވިދާޅުވި އެވެ.