އެއްވެސް ސަބަބަކާ ހުރެ އެއްވެސް ކަމެއްގައި ދިވެހިރާއްޖޭގައި އެހެން ގައުމެއްގެ ސިފައިން ތިބެގެން ނުވާނެ ކަމުގައި އިދިކޮޅު ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ.
ރޭ އާޓީފިޝަލް ބީޗުގައި އެ ކޯލިޝަނުން ބޭއްވި ޖަލްސާގައި ވާހަކަ ދައްކަވަމުން މުއިއްޒު ވަނީ މީގެ 460 ކުރިން މި ގައުމުގެ މިނިވަންކަން ގެއްލުނު ދުވަސްވަރަށްވުރެ ބޮޑަށް މިއަދު މިވަނީ މި ގައުމުގެ މިނިވަންކަމުގެ ވާހަކަ ދައްކަން ޖެހިފައިކަމަށް ވިދާޅުވެފައެވެ.
އެޒަމާނުގައި ދިވެހިންގެ މިނިވަންކަން ގެއްލުވާލުމަށް މަސައްކަތް ކޮށްފައިވަނީ ކަނޑި ބަޑި ބޭނުންކޮށްގެން ނަމަވެސް މިހާރު ފެންނަމުން މިދަނީ މުޅިން އެހެން ޒާތަކަށް ދިވެހިންގެ މިނިވަންކަން ޖަހައިގަނެގެން ދިއުމަށް މަސައްކަތް ކުރަމުންދާ މަންޒަރު ކަމުގައި ވިދާޅުވެ ރޭގެ ޖަލްސާގައި މުއިއްޒު ވަނީ، ވުރެ މާ ބޮޑަށް ދިވެހިން މިނިވަންކަމާއިމެދު ލޯ ހުޅުވަން ޖެހިފައިވާކަމަށް ވިދާޅުވެފައެވެ.
އަދި މީގެ އިތުރުންވެސް ރޭގެ ޖަލްސާގައި މުއިއްޒު ވަނީ، މިގައުމުގައި އެހެން ގައުމެއްގެ ސިފައިން ތިބި ވާހަކަ ދެއްކުމުން މި ސަރުކާރުން އެކި ދުވަހު އެކި ވާހަކަ ދައްކާކަމަށް ވިދާޅުވެފައެވެ.
އެކި ދުވަހު އެކި ވާހަކަ، އެއްބައިފަހަރު ދަންނަވާނެ ނެތޭ، އަނެއް ބައި ފަހަރު އެބަ ތިއްބޭ، ތިބީ ހަތިޔާރު ހިފައިގެންނެއް ނޫނޭ، އަނެއް ދުވަހު ނޫނޭ، ހަތިޔާރެއްވެސް ނެތޭ ކުލަ ހެދުމުގައޭ ތިބީ، ތިބީ އިންސާނީ އެހީތެރިކަން ފޯރުކޮށްދޭށޭ، އަނެއް ދުވަހކު ދަންނަވާނެ ނޫނެކޭ ބަދިގޭގަ ކައްކަންށޭ ތިބީ
ޑރ މުހައްމަދު މުއިއްޒު
އެހެންކަމުން ކޮންމެ ސަބަބަކާހުރެ ވިޔަސް މިގައުމުގައި ބޭރުގެ ސިފައިންނަން ތިބެވިގެން ނުވާނެ ކަމުގައި ޑރ މުއިއްޒު ވަނީ ވިދާޅުވެފައެވެ.
ކޮންމެ ގޮތަކަށް ވިޔަސް މިތާ ތިބެވިގެން ނުވާނެ ނޫންތޯ އެހެން ގައުމެއްގެ ސިފައިންނަށް
ޑރ މުހައްމަދު މުއިއްޒު
މީގެ އިތުރުން މުއިއްޒު ވަނީ ޕީޕީއެމް ޕީއެންސީން ވެރިކަމަށް އަންނަނީ މީގެ 460 އަހަރު ކުރިން ބޮޑުތަކުރުފާނު ދިވެހިންގެ ރާއްޖެ ދިވެހިންނަށް ހޯދައިދިންގޮތަށް ދިވެހީންގެ ރާއްޖެ ދިވެހިންނަށް ހޯދައިދޭންކަމަށްވެސް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
