މި ސަރުކާރުން އެކި ކަންކޮޅުތަކުގައި ފަށާފައިވާ ޕީއެސްއައިޕީ ޕްރޮޖެކްޓުތައް 5 އަހަރުތެރޭ ނުނިންމި، އެ މަޝްރޫއުތަކުގެ އަގުތައް އެތައް ގުނައެއް އުފުލިގެން ދިޔަ ސަބަބު ޕީޕީއެމް ނައިބު ރައީސް އަދި މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ތިލަ އިބާރާތުން ހާމަކޮށްދެއްވައިފި އެވެ. 

އާޓިފިޝަލް ބީޗުގައި އޮތް "މަވެސް ޕީޕީއެމް" ޖަލްސާގައި ވާހަކަދައްކަވަމުން ޝިޔާމު ވިދާޅުވީ ކުޑަ ރަށެއް ބޮޑު ރަށެއް ބެއްލެވުމެއް ނެތި ރާއްޖޭގެ ހުރިހާ ހިސާބެއްގައި ސަރުކާރުން ގިނަ ޕްރޮޖެކްޓުތަކެއް ހިންގަމުންދާކަމަށް ބުނި ނަމަވެސް، އެ މަސައްކަތްތައް ހުރީ ނުނިމި ކަމަށެވެ. 5 އަހަރު ވެގެން ދިޔައިރު ހަގީގަތުގައި ރަށްރަށުގައި ފަށާފައި ހުރި މަސައްކަތްތައް އެކަށީގެންވާ ގޮތެއްގައި ނިންމިފައި ނުވާކަމަށާއި، އެކަމުގެ ޝަކުވާތައް ރައްޔިތުން ކުރަމުންދާކަމަށް ޝިޔާމު ވިދާޅުވި އެވެ. 

އޭނާ ވިދާޅުވީ ފެނާއި ނަރުދަމާ އެޅުމުގެ ނަމުގައި ރަށްރަށުގައި ހިންގާ މަޝްރޫއުތައް ސަރުކާރުން ގިނައިން ދީފައި ހުރީ ސަރުކާރުގެ ވެރިންގެ ގާތް މީހުންނަށް ކަމަށެވެ. އަދި މަޝްރޫއުތައް ދީ އެޑްވާންސްއަށް ފައިސާ ވެސް ދިނުމަށް ފަހު، ދުވަސްކޮޅަކުން އެމީހުން އަތުން އެ މަޝްރޫއު އަތުލާ، ހަމަ ސަރުކާރުގެ ގާތް މީހުންނަށް ދީ އެމީހުންނަށް އެޑްވާންސްގެ ގޮތުގައި ފައިސާދެމުންދާކަން ހާމަވެފައިވާ ކަމަށެވެ. 

5 އަހަރުވެގެންދާއިރު، ރަށްރަށުގައި ފަށާފައިވާ އާދައިގެ ކުދި ކުދި މަޝްރޫއުތައް ނުނިންމި ދިގުލައިގެން ގޮސް، މަޝްރޫއުތަކަށް ކަނޑައަޅާފައިވާ އަގުތައް ދެގުނަ، ތިން ގުނަ އަގުބޮޑުވެގެން ދަނީ އެ ސަބަބާއި ހުރެކަމަށް ޝިޔާމު ވިދާޅުވި އެވެ. އަދި ޕްރޮޖެކްޓުތައް ހިންގުމުގެ ނަމުގައި ހަގީގަތުގައި ސަރުކާރުން ކުރި ކަމަކީ ދައުލަތުގެ ފައިސާ ގާތް މީހުންނަށް ބެހުންކަމަށް ޝިޔާމު ވިދާޅުވި އެވެ. 

ޝިޔާމު މަވެސް ޕީޕީއެމް ޖަލްސާގައި ވާހަކަދައްކަވަނީ

ޝިޔާމު ވިދާޅުވީ މި ސަރުކާރުން ރައްޔިތުންނަށް ވީ އާދައިގެ ކުދި ކުދި ވައުދުތައްވެސް އޮތީ ފުއްދާނުދެވި ކަމަށެވެ. އަދި އަމުދުން 5 އަހަރުވެގެން ދިޔައިރު ހިންގި އެއްވެސް މެގަ ޕްރޮޖެކްޓެއްގެ ވާހަކަ ވެސް ސަރުކާރަށް ދެއްކެން ނެތްކަމަށް ޝިޔާމު ވިދާޅުވި އެވެ. 

އެހެންކަމުން ދެވަނަ ދައުރެއް ހޯއްދެވުމަށް އަދި ނިކުމެ ވަޑައިގެން ހުންނެވި ނަމަވެސް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ރައްޔިތުން އިތުރު ފުރުސަތެއް ނުދެއްވާނެ ކަމަށާއި، މިވެރިކަން މިހާރު އޮތީ ނިމިފައި ކަމަށް ޝިޔާމު ވިދާޅުވި އެވެ. 

އެއާއެކު އޭނާ ވަނީ ދިވެހީންނަށް ބާރު ސްޕީޑުގައި ލިބެމުންދިޔަ ތަރައްގީ އަނބުރާ ހޯދުމަށް، ތަފާތު ބޮޑު ނަތީޖާއަކުން ރިޔާސީ އިންތިޚާބު ޑރ މުއިއްޒަށް ކާމިޔާބުކޮށްދިނުމަށް ރައްޔިތުން މަސައްކަތްކޮށްދިނުމަށް ގޮވާލައްވާފަ އެވެ.