ރިޔާސީ އިންތިޚާބުގެ ދެވަނަ ބުރުގެ ރީ-ރެޖިސްޓްރޭޝަން ޕްރޮސެސްއާއި މެދު ފާރަވެރިވެ، އެކަން ކުރަމުންދާގޮތް ސިޔާސީ ޕާޓީތަކުންނާއި، ރިޔާސީ އިންތިޚާބުގެ މޮނިޓަރުންނާއި، އޮބްޒާވަރުން ގާތުން ބައްލަވާދެއްވުމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ގޮވާލައްވައިފި އެވެ.
އިލެކްޝަންސް ކޮމިޝަނުން ވަނީ ދެވަނަ ބުރުގެ ރީ-ރަޖިސްޓްރޭޝަނަށް ހުޅުވާލިފަހުން މިހާތަނަށް 25000 މީހުން ރީ-ރެޖިސްޓާ ކުރަން ހުށަހަޅާފައިވާކަން ހާމަކުރައްވާފަ އެވެ.
އެކަމާއި ގުޅިގެން ޑރ މުއިއްޒު ކުރެއްވި ޓްވީޓެއްގައި ވިދާޅުވީ އެންމެ ދެ ދުވަސްތެރޭގައި 25000 މީހުން ރީ-ރެޖިސްޓްރީކޮށްފާނެ ކަމާއިމެދު ސުވާލު އުފެދޭކަމަށެވެ.
އެހެންކަމުން މި ކަމަކީ ގާތުން ބަލަންޖެހޭ ކަމެއް ކަމަށާއި، ރީ-ރެޖިސްޓްރޭޝަން ޕްރޮސެސްއާއި މެދު ރަނގަޅަށް ފާރަވެރިވުމަށް ޑރ މުއިއްޒު ވަނީ ގޮވާލައްވާފަ އެވެ.
އަދި އެމަނިކުފާނު ވަނީ ރިޔާސީ އިންތިޚާބުގެ ކަންކަން ބަލަމުންދާ އޮބްޒާވަރުންނާއި، މޮނިޓަރުންގެ އިތުރުން ހުރިހާ ސިޔާސީ ޕާޓީއަކުން ވެސް އެ ކަންކަން ގާތުން ބަލާ، މި ރިޔާސީ އިންތިޚާބުގެ ސައްޙަކަން ކަށަވަރުކުރުމަށް މަސައްކަތްކޮށްދެއްވުމަށް އެދިވަޑައިގެންފަ އެވެ.
ރިޔާސީ އިންތިޚާބުގެ ދެވަނަ ބުރުގެ ރީ-ރެޖިސްޓްރޭޝަން ޕްރޮސެސް ކުރިއަށްދާ ގޮތާއި ގުޅޭގޮތުން ސުވާލު އުފެދޭކަމަށް ޑރ މުއިއްޒު ވިދާޅުވެފައިވާއިރު، ރައީސް އޮފީހުގައި ޑެސްކު ބަހައްޓައިގެން ޕްރޮގްރެސިވް ކޮންގްރެސް ކޯލިޝަނަށް ޔަގީނުންވެސް ވޯޓުލާނެ ހީވާ މީހުންގެ ތެރެއިން 8000 އަށް ވުރެ ގިނަ މީހުން ވޯޓުލާން ރަޖިސްޓާކޮށްފައިވާ ތަން ނޫން އެހެން ތަންތަނަށް ރީ-ރަޖިސްޓާކޮށް، ވޯޓުލުމުގެ ފުރުސަތު ގެއްލުވާލުމަށް ރާވަމުންދާކަމަށް ޕީއެންސީގެ ނައިބު ރައީސް އަދި މަޖިލީހުގެ މާވަށު ދާއިރާގެ މެމްބަރު މުޙައްމަދު ސައީދު ވަނީ ތުހުމަތު ކުރައްވާފަ އެވެ.
"ރައީސް އޮފީހުގައި ކުޑަ ޑެސްކެއް ބަހައްޓައިގެން ވައްކަމެއް ކުރަން އެބަ ރާވާ. މި ވައްކަން ކުރަން އެމީހުން ގަސްތުކުރާ ގޮތަކީ. 8 ވަރަކަށް ހާސް ޕީޕީއެމްގެ މީހުން، ޑރ މުއިއްޒަށް ވޯޓު ދެއްވާނެ ކަމަށް ކަށަވަރުވާ މީހުން ރާއްޖޭގެ އެކި ކަންކޮޅުތަކަށް ރީ ރެޖިސްޓާ ކުރަމުން ދަނީ. އެއީ އެމީހުން ކުރާ ކަމަކީ"
ޕީއެންސީގެ ރައީސް މުހައްމަދު ސައީދު
ރިޔާސީ އިންތިޚާބު އޮޅުވާލުމަށް ސަރުކާރުން މަސައްކަތް ކުރާކަމުގެ ސީރިއެސް ތުހުމަތުތަކެއް އިދިކޮޅުން ކުރަމުންދާއިރު، އިދިކޮޅުން ވަނީ ރީ-ރެޖިސްޓްރޭޝަން ޕްރޮސެސްއާއި ދޭތެރޭގައި ރައްޔިތުން ވަރަށް ބޮޑަށް ފާރަވެރިވުމަށް ގޮވާލައްވާފަ އެވެ.
އެގޮތުން ރީ-ރެޖިސްޓާވެފައިވާތަން ބަލައި، ޔަގީންކޮށްގެން ތިއްބެވުމަށް، އަދި އެ ޕްރޮސެސްގައި އެއްވެސް މައްސަލައެއް އުޅޭކަން ފާހަގަވާނަމަ، އެކަންކަން ބައްލަވާ ކުރީބައިގައި އިސްލާހުކުރުމަށް އިދިކޮޅުން ވަނީ ޑރ މުއިއްޒަށް ވޯޓުލާން ނިންމައިގެން ތިއްބެވި ހުރިހާ ފަރާތްތަކުގެ ކިބައިން އެދިލައްވާފަ އެވެ.
Advertisement
This content is created and paid for by advertisers and does not involve Voice Journalists
