ވޯޓު އޮޅުވާލަން މަސައްކަތް ކުރަމުންދާއިރު، ސަރުކާރުގެ މުއައްސަސާތަކަށް އިތުބާރުކޮށްގެން ޕްރޮގްރެސިވް ކޮންގްރެސް ކޯލިޝަން މަޑުން އޮވެދާނެކަމަށް ދެކިގެން ނުވާނެކަމަށް އެ ކޯލިޝަނުން ބުނެފި އެވެ. 

މި މަހުގެ 30 ވަނަ ދުވަހު ބާއްވާ ރިޔާސީ އިންތިޚާބުގެ ދެވަނަ ބުރުގައި ވޯޓުލުމަށް ރަޖިސްޓްރީވެފައިވާ ތަން ނޫން އެހެން ތަނެއްގައި ރަޖިސްޓްރީވުމަށް 25000 އަށް ވުރެ ގިނަ ފޯމު އިލެކްޝަނަށް ހުށައަޅާފައިވާ ކަމަށް ބުނުމާއެކު އިދިކޮޅު ލީޑަޝިޕްގެ ބޭފުޅުން ވަނީ ވޯޓު އޮޅުވާލަން މަސައްކަތްކުރާކަމުގެ ގިނަ ކަންބޮޑުވުންތަކާއެކު އިލެކްޝަންސް ކޮމިޝަނަށް ވަޑައިގެންފަ އެވެ. 

މިއަދު މެންދުރު އިލެކްޝަންސް ކޮމިޝަންގެ މެމްބަރުންނާއި އެކު ވަރަށް ދިގުކޮށް ކުރިއަށް ގެންދިޔަ ބައްދަލުވުން ނިންމަވާލެއްވުމަށްފަހު، ނޫސްވެރިންނަށް މައުލޫމާތު ދެއްވަމުން އިދިކޮޅު ކޯލިޝަންގައި ހިމެނޭ ޕީއެންސީގެ ނައިބު ރައީސް މުޙައްމަދު ސައީދު ވިދާޅުވީ ރީ-ރަޖިސްޓްރޭޝަނަށް ހުށައެޅި ގިނަ ފޯމުތައް ހުށައަޅާފައި ވަނީ އޮންލައިންކޮށް ކަމަށެވެ.

އެގޮތުން ސިޔާސީ ޕާޓީތަކުން 2000 އެއްހާ ފޯމު ހުށައަޅާފައި އޮތް އިރު އޮންލައިންކޮށް 22000 ފޯމު ހުށައަޅާފައިވާކަމަށް އީސީން ހާމަކޮށްފައިވާކަމަށް ސައީދު ވިދާޅުވި އެވެ. 

އެކަން ފާހަގަކުރައްވާ ސައީދު ވިދާޅުވީ، މިއީ ހަމަ ޞައްހަ ފޯމުތަކެއްކަމަށް ބަލައިގަންނަން ދަތި އަދަދެއް ކަމަށެވެ. ވަކިން ޚާއްސަކޮށް، އިލެކްޝަންސް ކޮމިޝަންގެ ވެބްސައިޓު ހެކު ކުރުމަށް މަސައްކަތްކުރަމުންދާކަން އެ ކޮމިޝަނުން ވެސް ހާމަކޮށްފައިވާއިރު، އެހާ ގިނަ އަދަދެއްގެ ފޯމު އޮންލައިންކޮށް ހުށައަޅާފައި އޮތް އޮތުމަކީ އެތައް ސުވާލެއް އުފެދޭ ކަމެއްކަމަށް ސައީދު ވިދާޅުވި އެވެ. 

އޭނާ ވިދާޅުވީ ވޯޓުލާން ރަޖިސްޓާވުމުން، ބައެއް ސަރަހައްދުތަކުގައި ވޯޓު ފޮށި ހުރި ނަމަވެސް ވޯޓު ފޮއްޓެއް ނެތްކަމަށް ބުނެ އީސީގެ މެސެޖުތައް ވަކިވަކި ފަރުދުންނަށް ފޮނުވަމުންދާ ކަމަށެވެ. އަދި އެހެން ފޮށިތަކަށް އެމީހާ ރަޖިސްޓާކުރަމުންދާކަން ވެސް ފާހަގަކުރެވިފައިވާ ކަމަށެވެ. 

މިފަދަ އެތައް މައްސަލަތަކެއް ހުރުމުގެ ސަބަބުން، މި ކަންކަން ބަލާ ރައްޔިތުންނަށް ވޯޓުލުމުގެ ފުރިހަމަ ހައްގު ކަށަވަރުކުރުމަކީ ކޮންމެހެން ކުރަން ޖެހޭ ކަމެއްކަމަށް ސައީދު ވިދާޅުވި އެވެ. 

ސައީދުގެ ވާހަކައަށްފަހު ޕީއެންސީގެ ނައިބު ރައީސް ހުސެއިން މުޙައްމަދު ޝަރީފު (މުންދު) ވިދާޅުވީ އިންތިޚާބާއި ގުޅުންހުރި ކަންކަމުގައި އިދިކޮޅު ކޯލިޝަނުން އެއްވެސް މުއައްސަސާއަކަށް އިތުބާރުކޮށްގެން ނުތިއްބަވާނެ ކަމަށެވެ. 

ރިޔާސީ އިންތިޚާބުގައި ރައްޔިތުންލާ ވޯޓަކީ ޞައްހަ ވޯޓެއްކަން ކަށަވަރުކުރުމަށް އިދިކޮޅުން ކުރެވެން އޮތްހާ މަސައްކަތެއް ކުރައްވާނެ ކަމުގެ ޔަގީންކަން ދެއްވަމުން މުންދު ވިދާޅުވީ، ވޯޓުލާން ރަޖިސްޓްރީ ވެފައި އޮތީ ރަނގަޅު ތަނުގައިތޯ ދުރާލާ ރައްޔިތުން ބައްލަވައިގެން ތިއްބެވުމަށް އެދިވަޑައިގަންނަވާ ކަމަށެވެ. 

ރީ-ރެޖިސްޓްރޭޝަނާއި ގުޅިގެން ޝަކުވާއަށް ހުޅުވާލުމުން، އެ މައްސަލަތައް އީސީއަށް ހުށައަޅާ، ކޮންމެ ރައްޔިތަކަށް ވެސް ލިބިދީފައިވާ ވޯޓުލުމުގެ ހައްގުން ރައްޔިތުން މަހުރޫމު ނުވާނެފަދަ ގޮތަކަށް މަސައްކަތްކޮށްދެއްވާނެކަމަށް މުންދު ވިދާޅުވި އެވެ. 

އެއާއެކު އޭނާ ވަނީ މި އިންތިޚާބުގައި މުއައްސަސާތަކަށް އިތުބާރުކޮށްގެން ވޯޓު އޮޅުވާލުމުގެ ފުރުސަތު ދީގެން ޕްރޮގްރެސިވް ކޮންގްރެސް ކޯލިޝަނުން މަޑުން ތިބެދާނެކަމަށް ބަލައިގެން ނުވާނެކަމަށް ވިދާޅުވެފަ އެވެ.