އިޒްރާއިލް ސިފައިން އަލް އަޤްސާ އަށް ވަދެގަނެ އެތަނުގައި އަޅުކަން ކުރަން ތިބި ފަލަސްޠީނުގެ ބަޔަކަށް ހަމަލާދީފިއެވެ.
އަލްޖަޒީރާގައި ބުނެފައިވަނީ އިޒްރާއިލް ސިފައިން ހަމަލާ ދީފައިވަނީ އަލް އަޤްޞާ މިސްކިތުގެ މައި އެއްދޮރޯށި ކަމަށްވާ ބާބް އަލް ސިލްސިލާގެ ހަރިންމަ ތެރޭގައި ތިބި ބަޔަކަށް ކަމަށެވެ.
އިޒްރާއިލް ސިފައިންވަނީ އިއްޔެ އަޤްޞާގެ ސެކިޔުރިޓީ ވަރަށް ވަރުގަދަ ކޮށްފައެވެ. ފަލަސްޠީނުގެ މީހުންނަށް އަޤްޞާ އަށް ނުވަދެވޭ ގޮތް ހަދައި އެތަނުގެ ކައިރީގައި ތިބުންވެސް މަނާ ކުރިއެވެ. 50 އަހަރުން މަތީގެ މީހަކަށް މެނުވީ މިސްކިތަށް ނުވަދެވޭނެ ކަމަށް އިޒްރާއިލް ސިފައިން ވަނީ އަންގައިފައެވެ.
އިޒްރާއިލް ސިފައިން ބުނެފައިވަނީ އެމީހުން މަސައްކަތް ކުރީ ޔަހޫދީންގެ ދީނީ މުނާސަބާއެއް ކަމަށްވާ "ރޯޝް ޙަޝާނާ" ފާހަގަ ކުރުމަށް ޓަކައި އެއްވާ ޔަހޫދީންނަށް ޓަކައި މިސްކިތުގެ ހަރިންމަތެރެ އަމާން ކުރުމަށް ކަމަށެވެ.
އިޒްރާއިލް ސިފައިން އަލް އަޤްޞާގައި އަޅުކަން ކުރަން ތިބި ފަލަސްޠީނުގެ ރައްޔިތުންނަށް އަނިޔާކުރި ޚަބަރު ލިބުމާއެކު ފަތިހުގެ ނަމާދަށް ފަހު ފަލަސްޠީނުގެ ބަޔަކު ވަނީ އިޒްރާއިލް ސިފައިންގެ އެޢަމަލުތަކާއި ދެކޮޅު ހެދުމަށް އެއްވެފައެވެ.
ގަދަކަމުން ފަލަސްޠީނުގެ ބިމަށް ވެރިވެގަނެގެން ތިބި އިޒްރާއިލް މީހުން އަޤްސާގެ ހުރުމަތް ކެނޑޭގޮތައް ނަށައި ލަވަކިޔައި އަޑުގަދަކޮށް ހަދާ މަންޒަރުތައް ދައްކުވައިދޭ ވީޑިއޯތައް ވަނީ އާންމުވެފައެވެ.
ފަލަސްޠީނުގެ މީހަކު ވަފާ ނިއުސް އަށް ބުނެފައިވަނީ އިޒްރާއިލް ސިފައިން ވަނީ މިސްކިތުގެ ހަރިންމަ ތެރޭގައި ތިބި މީހުންނަށް ޖިސްމާނީ އަނިޔާތައް ދީފައި ކަމަށާއި އެގޮތުން ތިން މީހެއްގެ ގައިގައި ތަޅައި އަނިޔާކޮށްފައި ވާ ކަމަށެވެ. މީގެ އިތުރުން ޢުމުރުން ދުވަސްވީ އަންހެނަކާއި ފިރިހެނަކު ކޮއްޕާލުމުގެ ސަބަބުން އެދެމީހުންނަށް އަނިޔާވެފައިވާ ކަމަށްވެސް ބުނެއެވެ.
މިސްކިތުގެ ހަރިންމަ ތެރެއިން ދެމީހަކު ހައްޔަރު ކޮށްފައިވާ ކަމަށާއި އެދެމީހުން ގެންދިޔައީ ކޮންތާކަށްކަން ސާފު ނުވާ ކަމަށް ވެސް ބުނެފައިވެއެވެ.
Advertisement
This content is created and paid for by advertisers and does not involve Voice Journalists
