އެމަނިކުފާނުގެ މަސައްކަތް ހުއްޓުވަން މަސައްކަތް ކުރައްވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ކަމަށާ އެހެން ނަމަވެސް، މަސައްކަތް ނުހުއްޓުވަައި ކުރިއަށް ގެންދަވާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ އިއްޔެގެ ޖަލްސާވެސް ކޯރަމް ހަމަނުވެގެން ކުރިއަށް ނުގެންދެވުނު އިރު، އޭރުވެސް އެމްޑީޕީ މެންބަރުން ތިއްބެވީ މަޖިލީހުގެ ބޭރުގައި ކުޑަ ދަށުގައެވެ.
އަދި މިއަދުގެ ޖަލްސާވެސް 9 އިން ފެށިގެން 10 ޖަހަންދެންވެސް ކުރިއަށް ނުގެންދެވުނީ ކޯރަމް ހަމަ ނުވެގެން ކަމަށްވާއިރު، އޭރުވެސް އެމްޑީޕީ މެންބަރުން މަޖިލިސް ޗެންބަރުން ބޭރުގައި ތިއްބެވިއެވެ.
އެކަމާއި ނުރުހުން ފާޅުކުރައްވައި ވާހަކަދައްކަވަމުން ރައީސް ނަޝީދު ވިދާޅުވީ ރައްޔިތުންގެ މަޖިލީސް ސަބަޓާޖް ކުރައްވާފައިވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ބައިވެރިވެވަޑައިގެން ކަމަށެވެ. އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މަސައްކަތް ކުރައްވަނީ ދައުލަތުގެ ބާރުތައް އަތްޕުޅު މައްޗަށް ނަންގަވައިގެން ދައުލަތް ހުއްޓުވާލުމަށް ކަމަށްވެސް ނަޝީދު ވިދާޅުވި އެވެ.
"ރައްޔިތުންގެ މަޖިލިސް ސަބަޓާޖްކޮށް ހުއްޓުވާފައި މި ބަހައްޓަނީ ރައީސުލްޖުމްހޫރިއްޔާ ކަނޑައެޅިގެން މިކަމާ ބައިވެރިވެވަޑައިގެން. އަޅުގަނޑު ރައީސުލްޖުމްހޫރިއްޔާ އަށް އިލްތިމާސްކުރަން، ދަންނަވަން، ދިވެހި ދައުލަތުގެ ބާރުތައް, މަނިކުފާނުގެ އަތްޕުޅަށް ނަންގަވައި، ދިވެހި ދައުލަތް ހުއްޓުވާލައްވަން ތި ކުރައްވާ މަސައްކަތް ހުއްޓުވާލުމަށް. އަދި އަޅުގަނޑުގެ މަސައްކަތް، އަޅުގަނޑު ނުހުއްޓާނެ ކަމަށް، މަނިކުފާނަށް ވަރަށް ސާފުކޮށް ދަންނަވަން."
މަޖިލީހުގެ ރައީސް މުހައްމަދު ނަޝީދު
މިއާއެކު ރައީސް ނަޝީދު ވަނީ، ރައްޔިތުންގެ މަޖިލީސް ހުއްޓުނަ ނުދީ ކުރިއަށް ގެންދަވާނެ ކަމުގެ ޔަގީންކަން ރައީސް ނަޝީދު ވަނީ ރައްޔިތުންނަށް އަރުއްވާފައެވެ.
Advertisement
This content is created and paid for by advertisers and does not involve Voice Journalists
