އިންޑިޔާގެ ސަރުކާރުން ކެނެޑާއަށް ނިސްބަތްވާ ސިކް ލީޑަރަކު މަރާލިކަމުގެ ތުހުމަތުތަކެއް ކެނެޑާގެ ބޮޑު ވަޒީރު ކުރައްވައިފިއެވެ.

ކެނެޑާގައި ދިރި އުޅޭ ސިކް ޖަމާޢަތުން އެއީ ވަކި ދައުލަތެއް ކަމަށް ކަނޑައެޅުމަށް ދިޔައީ ވަކާލާތު ކުރަމުންނެވެ. އެކަމުގެ ލީޑަރެއްގެ ގޮތުގައި ހަރަކާތްތެރިވަމުން ދިޔައީ ހަރްދީޕް ސިންގް ނިއްޖާރު ކިޔާ މީހެކެވެ. އެމީހުން ކެނެޑާގައި ވަކި ދައުލަތެއް ޤާއިމް ކުރަމަށް މަސައްކަތް ކުރަމުން ދިޔުމުން  އެމީހުން ހައްޔަރު ކުރުމަށް އިންޑިޔާއިން ދިޔައީ ކެނެޑާގެ ސަރުކާރަށް ބާރު އަޅަމުންނެވެ. އެކަމާއި ގުޅިގެން ކެނެޑާއާއި އިންޑިޔާ އާއި ދެމެދު އޮތީ ދެބަސްވުންތަކެއް ހިނގައިފައެވެ.

ނިއްޖާރު މަރާލައިފައިވަނީ މިދިޔަ ޖޫން މަހުގެ 18 ވަނަ ދުވަހު، ބްރިޓިޝް ކޮލަމްބިއާގެ ސަރީގައި ހުންނަ ސިޚް ޓެމްޕަލްއެއްގެ ބޭރުގައި ހުއްޓައެވެ. ކެނެޑާގައި  ޚާލިސްތާނުގެ ނަމުގައި ވަކި ދައުލަތެއް ޤާއިމް ކުރަން މަސައްކަތް ކުރި ނިއްޖާރަކީ އިންޑިޔާގެ ސަރުކާރުން ޓެރަރިސްޓެއްގެ ގޮތުގައި ކަނޑައަޅައިފައިވާ މީހެކެވެ.

ކެނެޑާގެ ބޮޑު ވަޒީރު ޖަސްޓިން ޓްރޫޑޯ ހޯމަ ދުވަހު އެޤައުމުގެ ޕާލިމެންޓްގައި ވާހަކަ ދައްކަވަމުން ވިދާޅުވީ ކެނެޑާގެ ރައްޔިތަކު އެހެން ޤައުމެއްގެ ސަރުކާރުން އެހެން މަރާލުމަކީ ބަލައިގަނެވޭނެ ކަމެއް ނޫން ކަމަށާއި، އެއީ އެޤައުމުގެ ސިޔާދަތައް އަރައިގަތުން ކަމަށެވެ.

އަދި އިންޑިޔާގެ ސަރުކާރަށް ޓްރޫޑޯ ގޮވައިލައްވައިފައިވަނީ އެކަން ތަހްޤީޤު ކުރުމަށް ކެނެޑާގެ ސަރުކާރަށް ދެވެން އޮތް އެއްބާރުލެއްވުމެއް އެންމެ ބޮޑަކަށް ދެއްވުމަށެވެ.

އިންޑިޔާގެ ފޮރިން މިނިސްޓްރީ އިން ވަނީ ކެނެޑާގެ ސަރުކާރުން ކުރާ ތުހުމަތުތައް ދޮގު ކޮށްފައެވެ. އަދި އެވާހަކަތަކަކީ އެއްވެސް އަސްލެއް ނެތް ހަދައިގެން ދައްކާ ވާހަކަ ތަކެއް ކަމަށް ބުނެފައެވެ.