ނިޒާމީ ވޯޓު ފަދަ ހިޔާލު ހޯދުމުގެ ވޯޓު ނެގުމުގައި ރައީސުލްޖުމްުހޫރިއްޔާގެ ދައުރެއް ނޯންނާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރާއްޖޭގައި ވެރިކަން ކުރުމުގެ ނިޒާމު ބަދަލުކުރަން ރައްޔިތުންގެ ފެންނަ ނުފެންނަ ވޯޓެއް ނަގަން ގޮވާލައި ހުޅުދޫ ދާއިރާގެ ޑިމޮކްރެޓްސްގެ މެމްބަރު އިލްޔާސް ލަބީބް ހުށަހަޅުއްވާފައިވާ ގަރާރަށް ބަހުސް ކުރުމަށް ފުރުސަތު ހުޅުވާލެއްވުމުގެ ކުރިން ރައީސް ނަޝީދު ވަނީ ރާއްޖޭގެ ޖުމްހޫރިއްޔާގެ ގާނޫނު އަސާސީގެ 78 ވަނަ މާއްދާގެ ދަށުން ރައްޔިތުންގެ މަޖިލީހަށް ލިބިގެންވާ އާންމު ބާރުގެ ތެރެެއިން ރައްޔިތުންގެ ހިޔާލު ހޯދުން މުހިންމުކަމަށް މަޖިލީހަށް ފެންނަ ކަންކަމުގައި އާާންމުގެ ހިޔާލު ހޯދުމުގެ ވޯޓު ނެގުމުގެ ބާރު މަޖިލީހަށް ލިބިގެންވާ ކަމަށް ވިދާޅުވެފައެވެ. 

އަދި ވަކި ކަމެއް ކުރުމަށް ރައްޔިތުންގެ މަޖިލީހުން ފާސްކޮށްފި ނަމަ ދެން އެކަމުގައި އަމަލުކުރަންޖެހޭނެ ގޮތަކީ ރައްޔިތުންގެ ހިޔާލު ހޯދުމުގެ އާންމު ވޯޓެއް ނެގުމަށްޓަކައި އިލެކްޝަންސް ކޮމިޝަން (އީސީ) އަށް ހުށަހެޅުން ކަމަށް ނަޝީދު ވިދާޅުވި. އަދި ގާނޫނު އަސާސީގެ މަތިން އެކަން ކުރަން ގާނޫނު އަަސާސީން ލާޒިމްވާ ކަމަށްވެސް ނަޝީދު ވިދާޅުވި އެވެ. 

Advertisement

މިއާއެކު ނަޝީދު ވިދާޅުވީ މި ގަރާރުގެ ބަހުސް ނިންމައި ވޯޓާ ހަމައަށް ގެންދެވެންދެން މިއަދުގެ ޖަލްސާ ނުނިންމައި ކުރިއަށް ގެންދަވާނެ ކަމަށެވެ.

އިލްޔާސްގެ އެ ގަރާރުގައި މިމަހު 30 ގެ ކުރިން ފެންނަ ނުފެންނަ ވޯޓު ނަގަން ކުރިން ހިމެނި ނަމަވެސް މިއަދު ހުށަހެޅުއްވި އިރު އެ ގަރާރު އިސްލާހު ކުރައްވައި އަންނަ އޮކްޓޯބަރު 30 ގެ ކުރިން ނިޒާމީ ވޯޓު ނެގުމަށް ވަނީ ހިމަނުއްވައިފަ އެވެ.