އިންޑިޔާގެ ދެކުނުގައި ނުރައްކާތެރި ނިޕަ ވައިރަސް ފެތުރެން ފަށައިފި އެވެ.

އެސަރަހައްދުގެ ސަރުކާރުން މަސައްކަތް ފަށައިފައިވަނީ އެ ނުރައްކާތެރި ވައިރަސް އެސަރަހައްދުގައި ފެތުރިގެން ނުދާނެ ފަދަ ގޮތަކަށް އެކަން ކޮންޓްރޯލް ކުރުމަށެވެ.

ދެމީހަކު ނިޕާ އަށް ފައްސި ވެ އެބަލީގައި މަރުވެފައި ވާއިރު އެތައް ސަތޭކަ މީހުން ވަނީ ބައްޔަށް ފައްސިވި މީހުންނާއި ގާތުން ބައްދަލުވެފައިވާތީ ބައްޔަށް ޓެސްޓު ކޮށްފައެވެ.

ނިޕާ ވައިރަސް ފެތުރެމުންދާތީ އިންޑިޔާގެ ކެރެލާގެ ސަރުކާރުން ދަނީ ބަލި ފެތުރުން ކޮންޓްރޯލް ކުރުމަށްޓަކައި ފިޔަވަޅު ތަކެއް އަޅަމުންނެވެ. ޚާއްސަކޮށް ކެރެލާގެ ކަރިކޯ ޑިސްޓްރިކް ފާހަގަ ކޮށްލެވެއެވެ.

ނިޕާ ވައިރަސް ފެތުރެމުން ދާތީ ސްކޫލްތަކާއި ކޮލެޖްތައް ބަންދުކޮށްފައިވާއިރު ސަރުކާރުގެ އޮފީސްތަކާއި ޢާންމު މީހުންގެ ވިޔަފާރިތައް ވެސް ވަނީ ބަންދުކޮށްފައެވެ.

އެސަރަހައްދުގެ މަގުތަކުގައި މީހުން މަދުވެފައި ވާއިރު އެސަރަހައްދުގެ މީހުން ތިބީ ބިރުވެރި ކަމެއްގެ ތެރޭގައެވެ. ކޮވިޑަށް ފަހު އަނެއްކާވެސް އެހެން ވައިރަސް އަކާއި ގުޅިގެން ބިރުވެރިކަން ފެތުރިފައި ވާތީ އެމީހުން ތިބީ ކަންބޮޑުވެފައެވެ.

ނިޕާ ވައިރަސް ފެތުރެނީ އެވައިރަސްގެ އަސަރު ކޮށްފައިވާ ވައު ނުވަތަ އޫރު ފަދަ ތަކެއްޖާއި އޭގެ ޖަރާސީމާއި ކޮންޓެއްކްޓަށް އިންސާނަކު އައުމުންނެވެ.

އެކަމަކީ ވުން މަދު ކަމެއް ކަމުގައިވިޔަސް މީގެ ކުރިންވެސް މިވައިރަސް ވަނީ ފެތުރިފައެވެ. މީގެ ފަސް އަހަރު ކުރިން މިވައިރަސް ފެތުރި 23 މީހުން ބައްޔަށް ފައްސި ވިއިރު އޭގެ ތެރެއިން 21 މީހުން ވަނީ މަރުވެފައެވެ.

ކެރެލާގެ ހެލްތް މިނިސްޓްރީ އިން ބުނެފައިވަނީ މި ފަހަރު ނިޕާ ވައިރަސްގެ ކޭސްތައް ފެތުރެން ފެށުމާއި އެކު ފިޔަވަޅުތައް އެޅިފައިވާ ކަމަށާއި، ބަލި ޖެހުނު މީހުންނާއި އެއްވެސް ގޮތަކުން ބައްދަލުވެފައިވާ މީހަކު ނަމަ އެމީހަކު ހޯދިފައިވާ ކަމަށެވެ.

އަދި އެމީހުން އެހެންމީހުންނާއި އެކު ނުވާނެހެން އެކަހެރި ކުރެވިފައިވާ ކަމަށާއި 700 އަށްވުރެ ގިނަ މީހުން މީގެ ތެރޭގައި ހިމެނޭ ކަމަށްވެސް ބުނެފައިވެއެވެ.

ބަލި ފެތުރެމުންދާ ސަރަހައްދުގައި ރައްކާތެރިކަމުގެ ފިޔަވަޅުތައް ކަށަވަރު ކުރުމަށްޓަކައި ފުލުހުންވެސް ހަރަކާތް ތެރިވަމުންއަންނައިރު ކަމުގެ މާހިރުން ދަނީ ޙާލަތު ދެނެގަނެ ބަލި ފެތުރުނަ ނުދިނުމަށް ކުރާނެ ކަންކަން ހޯދަމުންނެވެ.