ކެނެޑާއާއި އިންޑިޔާ އާއި ދެމެދު އުފެދިފައި އޮތް ހަމަނުޖެހުމުގެ ތެރެއިން އިއްޔެ އިންޑިޔާއިން ކެނެޑާއަށް ދަތުރު ކުރުމުގައި ސަމާލުވުމަށް އިލްތިމާސް ނެރުމާއިއެކު ކެނެޑާއިން އޭގެ ރައްދެއްގެ ގޮތުން ކެނެޑާއަކީ ރައްކާތެރި ގައުމެއް ކަމަށް ބުނެ އިންޑިޔާގެ އެއިލްތިމާސް ބަލައިނުގަނެ ރައްދުކޮށްފިއެވެ.

ކެނެޑާގައި ދިރުއުޅޭ އިންޑިޔާގެ ރައްޔިތުން ކެނެޑާގެ ތެރޭގައި އުޅޭ އިރު ސަމާލުވުމާއި، ކެނެޑާގެ ތެރޭގައި ކޮންމެހެން ކުރަން ޖެހޭ ދަތުރެއް ނޫނީ ނުކުރުމަށާއި، ޚާއްސަކޮށް ނުރައްކަލެއް އޮތް ކަމަށް ލަފާކުރެވޭ ސަރަހައްދުތައްކަށް ދަތުރު ނުކުރުމަށް އިންޑިޔާ ސަރުކާރުން ވަނީ އިލްތިމާސް ކޮށްފައެވެ.

މިއިލްތިމާސާއި ގުޅިގެން ކެނެޑާއިން ވެސް ވަނީ އޭގެ ރައްދެއްގެ ގޮތުން އެޤައުމުގެ ރައްޔިތުންނަށް މިފަދަ އިލްތިމާސެއް ކޮއްފައެވެ. އެގޮތުން ކެނެޑާއިން ބުނެފައިވަނީ ދަތުރުފަތުރު ކުރުމުގައި އިންޑިޔާއަށް މަޑުކުރަން ޖެހިއްޖެ ހާލަތެއް ނަމަ ވަރަށް ބޮޑަށް ސަމާލުވުމަށެވެ. ކެނެޑާގެ ރައްޔިތުނަށް އަމާޒުކޮށް އިންޑިޔާއިން ޓެރަރިސްޓު ހަމަލާއެއް ދީފާނެ ތީ އެކަމަށް ވަރަށް ބޮޑު ސަމާލު ކަމެއް ދިނުމަށް ވަނީ އިލްތިމާސް ކޮށްފައެވެ.

އިންޑިޔާއާއި ކެނެޑާއި އާއި ދެމެދު ހަމަނުޖެހުން ތަކެއް އުފުދިގެން މިއުޅެނީ ކެނެޑާގެ ރައްޔިތެއް ކަމަށްވާ ހަރްދީޕް ސިންހް ނިއްޖާރު ގެ މަރުގެ ފަހަތުގައި އިންޑިޔާގެ އަތެއް ވާ ކަމަށް ކެނެޑާގެ ބޮޑުވަޒީރު ޖަސްޓިން ޓްރޫޑޯ ވަނީ ވިދާޅުވެފައެވެ.

ހަރްދީޕް ސިންހް ނިއްޖާރަކީ ސިޚުންގެ ބާރު ހިންގާ ވަކި ދައުލަތެއް އުފެއްދުމަށް ގޮވާލައި ހިންގާ ހަރަކާތުގެ އިސް ލީޑަރެކެވެ.

އެ ހަރަކާތްތަކުގެ ސަބަބުން އެ އެކްޓިވިސްޓުންނާއި ދެކޮޅަށް ފިޔަވަޅު އެޅުމަށް އިންޑިޔާ ސަރުކާރުން ކެނެޑާއަށް ބާރުއަޅަމުން ދިޔަ ނަމަވެސް ކެނެޑާއިން އެކަމަށް ފިޔަވަޅެއް އަޅައިފައެއް ނުވެއެވެ.

ނިއްޖާރު މަރާލައިފައިވަނީ މިދިޔަ ޖޫން މަހުގެ 18 ވަނަ ދުވަހު، ބްރިޓިޝް ކޮލަމްބިއާގެ ސަރީގައި ހުންނަ ސިޚް ޓެމްޕަލްއެއްގެ ބޭރުގައި ހުއްޓައެވެ. ނިއްޖާރު މަރާލި އިރު އޭގެ އެތައް ދުވަހެއް ކުރިން އިންޑިޔާ އިން ވަނީ ނިއްޖާރަކީ ޓެރަރިސްޓެއް ކަމަށް ކަނޑައަޅައިފައެވެ.

ކެނެޑާއިން ކުރި ތުހުމަތު ތަކާއި އެކު އިންޑިޔާއިން ވަނީ އެޤައުމުގައި ހުރި ކެނެޑާގެ ޑިޕްލޮމޭޓް އިންޑިޔާއިން ބޭރުކޮށްލައިފައެވެ.  ހަމައެއާއި ގުޅިގެން ކެނެޑާއިންވެސް ވަނީ ކެނެޑާގައި ހުރި އިންޑިޔާގެ އިސް ޑިޕްލޮމެޓަކު އެޤައުމުން ފޮނުވައިލައިފައެވެ.