މާދަމާގެ ރައްޔިތުންގެ މަޖިލީހުގެ ޖަލްސާ ބާއްވަން މަސައްކަތް ކުރާނީވެސް އެމްޑީޕީ މެންބަރުންނާ މަޝްވަރާކުރެއްވުމަށް ފަހު އެ މެންބަރުންނަށް ޖަލްސާއަށް ހާޒިރު ވެވޭނެނަމަ ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ. 

މިއަދުގެ ރައްޔިތުންގެ މަޖިލީހުގެ ޖަލްސާގެ އެޖެންޑާގައި އޮތީ ދިވެހިރާއްޖޭގައި މިހާރު އޮތް ވެރިކަމުގެ ނިޒާމު ބަދަލުކުރުމާ ގުޅޭގޮތުން ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމަށް މަޖިލީހުން ފާސްކޮށްފައިވާ ޤަރާރާ ގުޅޭގޮތުން އިލެކްޝަންސް ކޮމިޝަނުން ފޮނުވާ ފައިވާ ސިޓީއާ ގުޅޭ މައްސަލައާ ގުޅޭގޮތުން ވާހަކަ ދެއްކުމެވެ. 

އެގޮތުން، ނިޒާމީ ވޯޓާއި ގުޅޭ ގޮތުން މަޖިލީހުން މިދިޔަ ހަފްތާގައި ފާސްކުރި ގަރާރާއި އެއްގޮތައް ވޯޓް ކުރިއަށް ގެންދަން އިލެކްޝަންސް ކޮމިޝަނުން ނިންމި ނަމަވެސް ރައްޔިތުންގެ ފެންނަ ނުފެންނަ ވޯޓްގައި ކުރާނެ ސުވާލުގެ އިބާރާތް ސާފުކޮށްދޭން އިލެކްޝަންސް ކޮމިޝަނުން އޮތީ މަޖިލީހުގައި އެދިފައެވެ. އެހެންކަމުން މިއަދުގެ ޖަލްސާގައި ނިޒާމީ ވޯޓްގައި އަހާނެ ސުވާލުގެ އިބާރާއި ގުޅޭ ބަހުސް ކުރިއަށް ގެންދަވާނެ ކަމަށް ނަޝީދު ވަނީ ވިދާޅުވެފައެވެ.

ނަމަވެސް މިއަދުގެ ޖަލްސާ ވެސް ފަށައި އެތައް އިރެއް ވީއިރުވެސް ކޯރަމް ހަމަވެފައެއް ނުވެއެވެ. އެހެންކަމުން މަޖިލީހުގެ ރިޔާސަތުގައި އިންނެވި މަޖިލީހުގެ ރައީސް ނަޝީދު ވަނީ މިއަދުގެ ޖަލްސާ ނިންމަވާލައްވަން ގަސަތުކުރައްވާކަމަށް ވިދާޅުވެ، މާދަމާ ޖަލްސާ ތާވަލް ކުރައްވާނީވެސް އެމްޑީޕީ އާއި މަޝްވަރާ ކުރުމަށް ފަހު އެ މެންބަރުން ޖަލްސާ އަށް ވަޑައިގަންނަވާނެ ނަމަ ކަމަށް ވިދާޅުވެފައެވެ. 

މަޖިލީހުގެ މިދިޔަ ހަފްތާގެ ޖަލްސާތައްވެސް ކުރިއަށް ނުގެންދެވި ލަސްވެފައި ނޫނީ ނިންމާލަން ޖެހުނީ އެމްޑީޕީ މެންބަރުން މަޖިލީހުގެ ތަޅުމަށް ވަޑައިނުގެންނެވުމުން ކަން ފާހަގަކުރެއްވިއެވެ.