ރިޔާސީ އިންތިހާބުގެ ދެ ވަނަ ބުރުގެ ވޯޓުލުން ފެށުމުގެ އެންމެހައި ކަންކަން ކުރިއަށް ދިޔައީ ޖުމްލަކޮށް ރަނގަޅަށް ކަމުގައި ޓްރާންސްޕޭރެންސީ މޯލްޑިވްސް އިން ބުނެފިއެވެ. 

އެގޮތުން އިންތިހާބުގައި ވޯޓުލާން ބަހައްޓާފައި ހުރި ހުރިހާ ފޮއްޓެއް ވެސް 9:00 ގެ ކުރިން ހުޅުވި ކަމަށާއި ވޯޓު ފޮށި ހުޅުވަން ކަނޑައެޅި ވަގުތުގެ 10 މިނެޓް ތެރޭގައި 94 ޕަސެންޓް ފޮށި ހުޅުވާފައިވާކަމަށް އެ ޖަމިއްޔާއިން ބުނެއެވެ. މީގެ އިތުރުން 8:10 އިން 8:30 އާ ދެމެދު 54 ޕަސެންޓު ވޯޓު ފޮށި ހުޅުވި ކަމަށްވެސް ޓްރާންސްޕޭރެންސީން އިން ވަނީ ބުނެފައެވެ. 

މީގެ އިތުރުން ޓްރާންސްޕޭރެންސީން ބުނީ، ވޯޓުލާން ފެށި އިރު ވޯޓުލާ ހުރިހާ މަރުކަޒެއްގައި ވެސް އޮފިޝަލުން ގަޑިއަށް ހާޒިރުވެ ތިބި ކަމަށާއި ވޯޓު ލާން ފެށުމުގެ ކުރިން ވޯޓު ކަރުދާސްތައް ގުނާ ހަމަކުރެވުނު ކަމަށެވެ.ހަމަ އެޔާއެކު ވޯޓު ލާ ފޮށިތަކުގެ 96 ޕަސެންޓު ފޮށިތައް ތައްޔާރުކޮށްފައިވަނީ ލާ ވޯޓުގެ ސިއްރުކަން ކަށަވަރުވާ ގޮތަށް ކަމުގައި ފާހަގަކޮށް އެ ޖަމިއްޔާއިން ބުނެފައިވަނީ ބާކީ ހަތަރު ޕަސެންޓު ފޮށިތަކުން ވޯޓުގެ ސިއްރުކަން ކަށަވަރު ނުކުރެވޭ ކަމަށެވެ.

މިފަހަރުގެ ރިޔާސީ އިންތިހާބުގައި ޓްރާންސްޕޭރެންސީގެ 490 އޮބްޒާވަރުން/ވޮލަންޓިއަރުން 297 ވޯޓު ފޮއްޓެއް ކައިރީގައި ހަރަކާތްތެރިވެ އެވެ.ރިޔާސީ އިންތިހާބުގެ ދެވަނަ ބުރުގައި މާލެ ސަރަހައްދާއި އަތޮޅުތެރެ އާއި ރިސޯޓުތަކާއި ސިނާއީ ސަރަހައްދުތަކާއި ޖަލާއި ބޭރުގެ ފަސް ގައުމެއްގައި 586 ވޯޓު ފޮށި ބަހައްޓާފައިވެ އެވެ.