ރިޔާސީ އިންތިޚާބުގެ ދެވަނަ ބުރުގެ ވޯޓު ލުމާއި ގުޅޭ އެކި މައްސަލަ ތަކާއި ގުޅިގެން މިހާތަނަށް 10 މީހަކު ހައްޔަރުކޮށްފައިވާ ކަމަށް ދިވެހި ފުލުންގެ ޚިދްމަތުން ބުނެފިއެވެ.

ފުލުހުން ބުނެފައިވަނީ ވޯޓު ކަރުދާސް ދެއްކުމާއި ވޯޓު ކަރުދާސް ފޮޓޯ ނެގުމާ ގުޅިގެން 10 މީހަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ. އަދި  އެމީހުންގެ ތެރެއިން 7 މީހަކު ވަނީ ދޫކޮށްލާފައި ކަމަށްވެސް ފުލުހުން ވަނީ ބުނެފައެވެ.

ފުވައްމުލަކު ގައި ވޯޓުލާ މަރުކަޒަކަށް ވޯޓު ލާން ދިޔަ މީހަކު ވޯޓު ކަރުދާސް ކޮޅު ފޮޓޯ ނެގި މައްސަލައެއްގައި މީހަކު ހައްޔަރުކޮށްފައިވެއެވެ.

Advertisement

އަދި ލ ފޮނަދޫގައި ވޯޓު ކަރުދާސް ކޮޅު ތަކެއްގައި ކުރަހާފައި ވޯޓުލާ މީހާ އަށް ވޯޓު ކަރުދާސް ކޮޅު ހަވާލުކުރި މައްސަލައެއް ފެންމަތިވެ ބަޔަކު މުޒާހަރާ ކުރުމުން ވޯޓު ލުން މެދުކަނޑައި ލެވުނެވެ. ނަމަވެސް  ވޯޓު ފޮއްޓާއި ހަވާލުވެ ހުރި އޮފިޝަލް ޒިންމާއިން ދުރުކޮށް އަލުން ވަނީ ވޯޓުލުން ފަށައިފައެވެ.

ވޯޓުލުމަށް ކިޔު އަށް އެރެނީ 5 ޖެހުމާއި ހަމައަށެވެ. އެއަށް ފަހު ވޯޓު ކިޔު ބަންދު ވީ ނަމަވެސް 5 ޖެހުމުގެ ކުރިން ކިޔު އަށް އެރި މީހުންނަށް ވޯޓުލެވޭނެއެވެ.

އީސީ އިން ބުނެފައިވަނީ ސަބަބެއް މެދުވެރިވެގެން ވޯޓު ލުން މެދުކެނޑުނު ކަމަށް ވިޔަސް ވޯޓުލުމުގެ ވަގުތު އިތުރުނުކުރާނެ ކަމަށެވެ.