ރިޔާސީ އިންތިހާބުގެ ދެވަނަބުރުން ނާކާމިޔާބީއާއި ކުރިމަތި ވުމާއެކު ވެރިކަން ކުރާ ޕާޓީ އެމްޑީޕީގެ ފަރާތުން މާލޭ ސިޓީގައި ހަމަނުޖެހުންތައް ހިންގުމަށް ތައްޔާރުވަމުން އަންނަ ކަމުގައި ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަދި ޕީޕީއެމްގެ ނައިބު ރައީސް އަހްމަދް ޝިޔާމް ތުހުމަތު ކުރައްވައިފިއެވެ.
މީގެ ދެ ދުވަހެއް ކުރިން ކުރި ޓުވީޓެއްްގައި ޝިޔާމް ވަނީ ރާއްޖޭގައި ހަމަނުޖެހުން ނަގާލަން ބަޔަކު މީހުން މަސައްކަތްކުރަމުންދާކަމަށް ތުހުމަތުކުރައްވައިފައެވެ.
އެ ޕޯސްޓްގައި ޝިޔާމް ވިދާޅުވީ، 2023 ވަނަ އަހަރުގެ ރިޔާސީ އިންތިހާބު ނޫނީ ކުރިން ބައިގައި ވަކި މީހަކު ކާމިޔާބުކުރާނެކަން ސާފުކޮށް އެނގެން އޮތް އިންތިހާބެއް ނެތްކަމަށެވެ.
ޝިޔާމް މިއަދު ކުރެއްވި ޕޯސްޓެއްގައި އޭނާވަނީ ކުރިން ދެއްވާފައިވާ އިންޒާރުތަކަކީ ހަދަ ހަދައިން ދައްކަވަމުންދާ ވާހަކަތަކެއް ނޫންކަމަށް ތަކުރާރުކުރައްވާފައެވެ. އޭނާ ވިދާޅުވީ، ރައީސް ޞާލިހު ކެމްޕެއިން ޓީމުން އޮތީ އެކަން ކުރުމަށް ރާވާފައިކަމަށާއި، މިހާރު ތައްޔާރީތައް ވަރުގަދަ ކުރަމުންދާކަމަށް އޭނާއަށް އިތުބާރު ކުރެވޭ މަސްދަރަކުން މައުލޫމާތު ލިބެމުންދާކަމަށްވެސް ވިދާޅުވިއެވެ.
އޭނާ ވިދާޅުވީ، ހަމަނުޖެހުންތަކެއް ހިންގައި ހުޅުޖެހުމަށް ރާވާފައިވަނީ މާލޭގައިކަމަށްވެސް މައުލޫމާތު ލިބޭކަމަށާއި، އެހެންކަމުން ދިވެހި ފުލުހުންގެ މުއައްސަސާއިން އެކަން ހުއްޓުވުމަށް ގޮވާލައްވާކަމަށް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
