މި ވަގުތަކީ ހުރިހާ އެންމެންގެ ހިތްތައް ސާފުކޮށް، މާތް الله ހިޔާރުކޮށްދެއްވާފައިވާ ފަރާތްތަކާއެކު މަސައްކަތް ކުރަންވީ ވަގުތު ކަމުގައި އިލްމުވެރިންގެ ގުޅުމުން ބުނެފިއެވެ.

އިއްޔެ ބޭއްވި ރިޔާސީ އިންތިހާބުގެ ދެވަނަބުރުގެ ވޯޓު އިދިކޮޅު ކެންޑިޑޭޓު ޑރ. މުހައްމަދު ޑރ. މުއިއްޒު ކާމިޔާބު ކުރެއްވުމާ ގުޅިގެން އިލްމުވެރިންގެ ގުޅުމުން ނެރުނު ނޫސްބަޔާނެއްގައި ބުނެފައިވަނީ ސައްތައިން ސައްތަ މިއިސްލާމީ ވަތަނުގެ ދީނީ އިލްމުވެރިންގެ ގިނަ އަދަދެއްގެ ބޭފުޅުން ނަޒަރުގައި މިވަގުތު މިގައުމުގެ ވެރިކަމަށް އެންމެ އެކަށީގެންވާ ފަރާތް ކަމުގައި އެއްބަސް ވެވުނު މުއިއްޒު މިގައުމުގެ ރިޔާސަތަށް އިހްތިޔާރުކޮށްދެއްވި ކަމަށްޓަކައި މާތް الله އަށް ހަމްދާއި ޝުކުރު ކުރައްވާ ކަމަށެވެ.

އެގޮތުން މިއަހަރުގެ އިންތިހާބުގައި ވާދަކުރެއްވި ރިޔާސީ ކެންޑިޑޭޓުންގެ ތެރެއިން، ރާއްޖޭގެ ވެރިކަމަށް ގެންނަން މިވަގުތަށް އެންމެ ރަނގަޅު ކަމަށް އިލްމުވެރިންގެ ބޮޑު އަގުލަބިއްޔަތަކުން ނިންމަވައި އެފަރާތަށް ތާއީދު ކޮށްދެއްވުމަށް އިލްމުވެރިން ކުރެއްވި އިލްތިމާސަށް ދިވެހި ލޮބުވެތި ރައްޔިތުން ދެއްވި ފުރިހަމަ އިޖާބައަށްޓަކައި އެހުރިހާ ދީނީ އިލްމުވެރިންގެ ފަރާތުން ނުހަނު އިހްލާސްތެރި ކަމާއެކު ޝުކުރު ދަންނަވާކަމުގައި އެ ބަޔާނުގައި ވެއެވެ. 

Advertisement

މީގެ އިތުރުން އެ ގުޅުމުން ބުނެފައިވަނީ މިވަގުތަކީ އެންމެހާ ރައްޔިތުން ހިތްތައް ސާފުކޮށް ބަދަހިކަމާ އެކު ތެދުވެ، ގައުމު މިއޮތް ހާލަތުން ނަގައި ވެރިންގެ ގޮތުގައި މާތް الله ހިޔާރުކޮށްދެއްވާފައިވާ ފަރާތްތަކާ އެކުގައި ގިނަގުނަ މަސައްކަތްތަކެއް ކުރަން ޖެހިފައިވާ ވަގުތެއް ކަމަށެވެ.
އެހެން ކަމުން މަސްލަަހަތުތައް އެއްފަރާތްކޮށް، ދީނާއި ގައުމުގެ އާންމު މަސްލަހަތުތައް އިސްކުރުމަށާއި، ރައްޔިތުން ބައިބައިކުރުމަށް ޝައިތާނާ ޖަހާ މަޅިތަކުން ރައްކާތެރިވެ ތިއްބެވުމަށް ނަސޭހަތްތެރިވާ ކަމަށް އިލްމުވެރިންގެ ގުޅުމުން ބުނެފައިވެއެވެ.