ކޯރަމް ހަމަ ނުވެގެން ރައްޔިތުންގެ މަޖިލީހުގެ މިއަދުގެ ޖަލްސާވެސް ނުފެށި ނިންމާލަން ޖެހުނު އިރު، މިއަދުގެ ޖަލްސާއަށް މެންބަރުން ހާޒިރު ނުވި ސަބަބު ނުވިސްނޭ ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ. 

މިއަދަކީ ރަސްމީ ބަންދު ދުވަހެއް ނަމަވެސް، ރައްޔިތުންގެ މަޖިލީހަށް ރަސްމީ ދުވަހެއް ކަމަށާއި މިހާރު އާންމުކޮށްފައިވާ އެޖެންޑާއާ އެއްގޮތަށް ރައްޔިތުންގެ މަޖިލީހުގެ ޖަލްސާ އޮންނާނެ ކަމަށް މަޖިލިސް އިދާރާއިން އިއްޔެ ބުނެފައިވެއެވެ.
މިއަދުގެ ޖަލްސާގައި އޮތީ، ނިޒާމު ބަދަލު ކުރަން ރައްޔިތުންގެ ވޯޓަކަށް ކުރިން އަހާފައި ވާނަމަ، އަލުން އެހުމުގެ ބަދަލުގައި މަޖިލީހުގައި ނަގާ ވޯޓަކުން ނިޒާމު ބަދަލު ކުރެވޭގޮތަށް ގާނޫނަށް އިސްލާހު ގެންނަން ޑިމޮކްރެޓްސްގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ހުށަހަޅުއްވާފައިވާ، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީއަށް އިސްލާހު ގެނައުމުގެ ބިލުގެ ފުރަތަމަ ކިޔުން އިއްވުމެވެ.

މިއަދުގެ ޖަލްސާ ފެއްޓެވުމަށްޓަކައި މެންބަރުން ހަމަވޭތޯ މަޑު ކުރެއްވުމަށްފަހު ކޯރަމް ހަމަ ނުވުމުން އެކަމާއި ކަންބޮޑުވުން ފާޅުކުރައްވައި ނަޝީދު ވިދާޅުވީ ކޯރަމްގެ ރަންގަބީލު ޖެހުމަށްފަހުގައި ބަލަންޖެހޭ ވަގުތަށް މެންބަރުން ހަމަވޭތޯ ވެސް ބެލިއްޖެ ކަމަށެވެ. އެހެން ނަމަވެސް ކޯރަމް ހަމަވާ ވަރަށް މެންބަރުން މަޖިލީހަށް ވަޑައި ނުގަންނަވާ ކަމަށް ނަޝީދު ވިދާޅުވި އެވެ. 

އެހެންކަމުން މިއަދުގެ ޖަލްސާ ނިންމަވާ ލައްވަން ޖެހޭ ކަމަށާ، އެހެން ނަމަވެސް މާދަމާވެސް ޖަލްސާ އެއް ބޭއްވޭތޯ މަސައްކަތް ކުރައްވާނެ ކަމަށް އެމަނިކުފާނު ވިދާޅުވި އެވެ. އަދި މިއަދުގެ މަޖިލީހަށް މެންބަރުން ވަޑައި ނުގެންނެވި ސަބަބެއް ނޭނގޭ ކަމަށްވެސް އެމަނިކުފާނު ވަނީ ވިދާޅުވެފަ އެވެ.

އެންމެ ފަހުން މަޖިލީހުގެ ޖަލްސާ ބޭއްވި ދުވަހު ރައީސް ނަޝީދު ވަނީ، މަޖިލީހުގެ ކޯރަމް ހަމަނުވާ މައްސަލައިގައި އެމްޑީޕީއާއި ވާހަކަދައްކަވާނެކަމަށް ވިދާޅުވެފައެވެ.