ޒިންމާދާރު އިދިކޮޅު ޕާޓީއެއްގެ ގޮތުގައި އެމްޑީޕީ މަސައްކަތް ކޮށްދެއްވުމަށް ތައްޔާރުވުމަށް އެދޭ ކަމަށާއި، އެއީ އެމަނިކުފާނު މަރުހަބާ ކިޔާނެ ކަމެއް ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެެއެވެ.
ރިޔާސީ އިންތިހާބުގެ ދެވަނަބުރުގެ ވޯޓުން ލިބުނު ކާމިޔާބީ ފާހަގަ ކުރުމުގެ ގޮތުން ރޭ ސޯޝަލް ސެންޓަރުގައި ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުން ޑރ މުއިއްޒު ވިދާޅުވީ، ޒިންމާދާރު އިދިކޮޅު ޕާޓީއެއްގެ ގޮތުގައި އެމްޑީޕީ މަސައްކަތް ކޮށްދެއްވުމަށް އެދޭ ކަމަށާއި، އެއީ އެމަނިކުފާނު މަރުހަބާ ކިޔާނެ ކަމެއް ކަަމަށެވެ.
އަޅުގަނޑު މިހާރުގެ ސަރުކާރަށް އެމްޑީޕީއަށް 17 ނޮވެމްބަރަށް ފަހު އިދިކޮޅު ޕާޓީއަށްވާ ޕާޓިއަށް، މިއީ ޑިމޮކްރެސީއޭ، ޑިމޮކްރެސީގެ ރީތި ހަމަތަކުގެ މަތިން އަޅުގަނޑަށް މަރުހަބާ ކިޔުއްވި ކިޔުއްވުމުގައި ޝުކުރު ދަންނަވާ، އަޅުގަނޑާއި އިއްޔެ ބައްދަލު ކުރެއްވި ބައްދަލު ކުރެއްވުމުގައި ޝުކުރު ދަންނަވާ ހާލު އަޅުގަނޑު އެދެނީ. ރެސްޕޮންސިބަލް އޮޕިޒިޝަނެއްގެ ގޮތުގައި މަސައްކަތް ފެއްޓެވުމަށް ތައްޔާރުވާށޭ، އެއީ އަޅުގަނޑު މަރުހަބާ ކިޔާ ކަމެކޭ
ޑރ މުހައްމަދު މުއިއްޒު
މީގެ އިތުރުން ރޭގެ ޖަލްސާގައި ޑރ މުއިއްޒު ވަނީ ސަރުކާރަކަށް ޒިންމާދާރު އިދިކޮޅު ޕާޓީއެއް ބޭނުންވާނެ ކަމަށާއި ޒިންމާދާރު އިދިކޮޅު ޕާޓީއަކުން ސަރުކާރު ކުރާ ކަންކަމަށް ފާޑު ކިޔާނެ ކަަމަށާއި، އެއަށްވުރެ ރަނގަޅު ކަންކަން ގެނެސްދެއްވާނެ ކަަމަށް އެމަނިކުފާނު ވިދާޅުވިއެވެ.
އެހެން ނަމަވެސް ގައުމަށް މުހިންމު ކަމެއްގައި، ނޫނީ ގައުމަށް ބޮޑުވެގެން އަންނަ ކަމެއްްގައި ޒިންމާދާރު އިދިކޮޅު ޕާޓީތައް އެއްގަލަކަށް އަރާނެ ކަމަށާއި އެގޮތަށް އެކަން ކޮށްދިނުމަށް އިންތިހާބީ ރައީސް ޑރ މުހައްމަދު މުއިއްޒު ވަނީ ގޮވާލައްވާފައެވެ.
ޑރ. މުއިއްޒު މިގޮތަށް ރޭ ވިދާޅުއިިރު، އިއްޔެ ހެނދުނު ރައީސް އިބްރާހިމް މުހައްމަދު ޞާލިހް ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، ދެން ކުރިއަށް އޮތީ އެމްޑީޕީ ވަރުގަދަ އޮޕަޒިޝަނަކަށް ހެދުން ކަމަށެވެ.
މިގޮތުން ރައީސް ވިދާޅުވީ ރާއްޖޭގެ ޑިމޮކްރެސީ ހަރުދަނާކޮށް ފައްކާ ކުުރުމަށްޓަކައި ވަރުގަދަ އޮޕަޒިޝަނެއް އޮންނަން ޖެހޭ ކަމަށެވެ.
Advertisement
This content is created and paid for by advertisers and does not involve Voice Journalists
