ރިޔާސީ އިންތިޚާބުގެ ދެވަނަ ބުރުގައި ދަ ޑިމޮކްރެޓްސްއިން ވަކި ކެންޑިޑޭޓަކަށް ތާއީދުނުކޮށް، ނުވަތަ ވަކި ފަރާހަތަކަށް ނުޖެހި ތިބިކަމަށް ވާނަމަ ވެރިކަމުގެ ނިޒާމު ބަދަލުކުރުމަށް ރައްޔިތުންގެ "ފެންނަ ނުފެންނަ" ވޯޓު ނެގުމަށް އެއްބާރުލުން ދޭނެކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީން) އޭރު ބުނެފައިވާކަމަށް މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެ އެވެ.
ނަޝީދު މިފަދައިން ވިދާޅުވެފައި ވަނީ ރައްޔިތުންގެ މަޖިލީހުގެ 2023 ވަނަ އަހަރުގެ ތިންވަނަ ދައުރުގެ 7 ވަނަ ޖަލްސާ ސައިގަޑިއަށް މެދުކަނޑާލުމުގެ ކުރިން ވާހަކަދައްކަވަމުން ނެވެ.
ސައިގަޑިއަށް ޖަލްސާ މެދުކަނޑާލިއިރު ކުރިއަށް ދިޔައީ ދިވެހިރާއްޖޭގައި މިހާރު އޮތް ވެރިކަމުގެ ނިޒާމު ބަދަލުކުރުމާއި ގުޅޭގޮތުން ރައްޔިތުންގެ ޚިޔާލުހޯދުމުގެ އާންމު ވޯޓުނެގުމަށް މަޖިލީހުން ފާސްކޮށްފައިވާ ޤަރާރާ ގުޅޭގޮތުން އިލެކްޝަންސް ކޮމިޝަނުން ފޮނުވާފައިވާ ސިޓީއާއި ގުޅޭ މައްސަލައަށް މަޖިލީހުގައި ބަހުސްކުރުމެވެ.
އެ ބަހުސް ސައިގަޑިއަށް މެދުކަނޑާލައްވަމުން ނަޝީދު ވިދާޅުވީ ވެރިކަމުގެ ނިޒާމު ބަދަލުކުރުމާއި ގުޅޭގޮތުން އޭނާއަށް އެނގިހުރި މައުލޫމާތެއް ހާމަކުރުމަކީ މުހިންމު ކަމެއްކަމުގައި ދެކިވަޑައިގަންނަވާ ކަމަށެވެ.
އެގޮތުން ރިޔާސީ އިންތިޚާބުގެ ދެވަނަ ބުރުގައި ވަކި ފަރާތަކަށް ތާއީދުނުކޮށް ދަ ޑިމޮކްރެޓްސްއިން ތިބިކަމަށް ވާނަމަ އެ ޕާޓީން އެދޭގޮތަށް ވެރިކަމުގެ ނިޒާމު ބަދަލުކުރުމަށް ރައްޔިތުންގެ ފެންނަ ނުފެންނަ ވޯޓެއް ނެގުމަށް އެހީތެރިވެދޭނެކަމަށް އެމްޑީޕީން ބުނެފައިވާކަމަށް ނަޝީދު ވިދާޅުވި އެވެ.
އަދި އެކަން އެގޮތަށް ކުރާނެކަން ބަޔާންކޮށް ދަ ޑިމޮކްރެޓްސްގެ ސިޓީއެއް ވެސް އެމްޑީޕީން ހޯދާފައިވާކަމަށް ނަޝީދު ވިދާޅުވިއެވެ.
"އަޅުގަނޑަށް އެނގިފައި އޮތް ގޮތުގައި ޑިމޮކްރެޓްސް ކައިރިން އެދިފައި އޮތީ އެ ޕާޓީން ވަކިބަޔަކަށް ތާއީދުނުކޮށް ތިބެއްޖެ ނަމަ އެމްޑީޕީން ފެންނަ ނުފެންނަ ވޯޓަށް ފުރިހަމައަށް ތާއީދުކުރައްވާނެ ކަަމަށް. އަދި އެމްޑީޕީން ވަނީ ޑިމޮކްރެޓސް އަތުން އަޅުގަނޑަށް މައުލޫމާތު ލިބިފައިވާ ގޮތުގައި ސިޓީއެއް މި މަގަށް ހޯއްދަވާފައި. އެހެން ނަމަވެސް އެބޭފުޅުން އެމްޑީޕީން މި ސިޓީގެ ޖަވާބު ނުދެއްވާ އޮތީ"
މަޖިލީހުގެ ރައީސް މުހައްމަދު ނަޝީދު
އެއާއެކު ނަޝީދު ވިދާޅުވީ އެމްޑީޕީ އަކީ މިއަދު ބަހާއި އަމަލު ދިމާވާ ޕާޓީއެއްކަމަށް ދެންނެވެން ވެސް ނެތް ކަމަށެވެ. އެހެންކަމުން، މީގެ ކުރިން ވެރިކަމުގެ ނިޒާމު ބަދަލުކުރުމަށް އެމްޑީޕީން އެހީތެރިވާނެކަމަށް ބުނި ނަމަވެސް އެ ޕާޓީގެ އެއްބާރުލުން އެކަމުގައި ލިބިދާނެކަން ޔަގީން ނުވާފަދަ މޭރުމަކުން ނަޝީދު ވަނީ ވާހަކަފުޅު ދައްކަވާފައެވެ.
އަނެއްކޮޅުން އެމްޑީޕީގެ އެންމެ އިސްލާޑަރު ރައީސް އިބްރާހިމް މުޙައްމަދު ޞާލިހު އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަނީ އެމަނިކުފާނު ބަރުލަމާނީ ނިޒާމަށް ތާއީދު ނުކުރައްވާކަން އިއުލާނުކުރައްވާފަ އެވެ.
އަދި ވެރިކަމުގެ ނިޒާމު ބަރުލަމާނީއަށް ބަދަލުކުރުމަށް މަޖިލީހުސް ބިލު ފާސްކުރި ނަމަވެސް ރައްޔިތުންގެ ވޯޓަކަށް ނާހާ އެފަދަ ބިލެއް ތަސްދީގު ނުކުރައްވާނެކަމަށް ރައީސް ޞާލިހު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
