ރިޔާސީ އިންތިޚާބުގެ ދެވަނަ ބުރުގައި އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުޙައްމަދު ޞާލިހަށް ތާއީދު ހޯދުމަށް ދަ ޑިމޮކްރެޓްސްއާއި އެކު އެއްވެސް އެއްބަސްވުމަކަށް އައިސްފައި ނުވާނެކަމަށް އެމްޑީޕީން ބުނެފިއެވެ.
އެމްޑީޕީން މިފަދައިން ހާމަކޮށްފައިވަނީ ރިޔާސީ އިންތިޚާބުގެ ދެވަނަ ބުރުގައި ދަ ޑިމޮކްރެޓްސްއިން ވަކި ކެންޑިޑޭޓަކަށް ތާއީދުނުކޮށް ތިބެއްޖެކަމަށް ވާަނަމަ އެ ޕާޓީން އެދޭގޮތަށް ވެރިކަމުގެ ނިޒާމު ބަދަލުކުރުމަށް ފެންނަ ނުފެންނަ ވޯޓެއް ނެގުމަށް އެމްޑީޕީން ތާއީދުކުރާނެކަމަށް އޭރު ބުނެފައިވާކަމަށް މަޖިލީހުގެ ރައީސް މުޙައްމަދު ނަޝީދު ވިދާޅުވުމާއި ގުޅިގެންނެވެ.
މަޖިލީހުގެ ރައީސް މުހައްމަދު ނަޝީދު
"އަޅުގަނޑަށް އެނގިފައި އޮތް ގޮތުގައި ޑިމޮކްރެޓްސް ކައިރިން އެދިފައި އޮތީ އެ ޕާޓީން ވަކިބަޔަކަށް ތާއީދުނުކޮށް ތިބެއްޖެ ނަމަ އެމްޑީޕީން ފެންނަ ނުފެންނަ ވޯޓަށް ފުރިހަމައަށް ތާއީދުކުރައްވާނެ ކަަމަށް. އަދި އެމްޑީޕީން ވަނީ ޑިމޮކްރެޓސް އަތުން އަޅުގަނޑަށް މައުލޫމާތު ލިބިފައިވާ ގޮތުގައި ސިޓީއެއް މި މަގަށް ހޯއްދަވާފައި"
މަޖިލީހުގެ ރައީސް މުހައްމަދު ނަޝީދު
ނަޝީދު ވިދާޅުވީ އޭރު އެމްޑީޕީން އެހެން ބުނި ނަމަވެސް އެ ޕާޓީއަކީ ބަހާއި އަމަލާ ދިމާވާ ޕާޓީއެއް ކަމަށް މިހާރު ދެންނެވެން ނެތްކަމަށެވެ.
ނަޝީދު މިފަދައިން ވިދާޅުވެފައި ވަނިކޮށް އެމްޑީޕީން ވަނީ އެމަނިކުފާނުގެ އެ ވާހަކަތައް ދޮގުކޮށްފަ އެވެ. އެގޮތުން އެމްޑީޕީން ބުނީ ރިޔާސީ އިންތިޚާބުގެ ދެވަނަ ބުރުގައި ދަ ޑިމޮކްރެޓްސްގެ ތާއީދު ހޯދުމަށް އެމްޑީޕީން އެއްވެސް ކަމަކަށް އެ ޕާޓީއާއި އެކު އެއްބަސްވެފައި ނުވާނެ ކަމަށެވެ.
އެހެން ނަމަވެސް 30 ސެޕްޓެމްބަރުގެ ކުރިން ރައްޔިތުންގެ ފެންނަ ނުފެންނަ ވޯޓެއް ނެގުމަށް އެއްބަސްވާނަމަ ރިޔާސީ އިންތިހާބުގެ ދެވަނަ ބުރުގައި އެމްޑީޕީގެ ރިޔާސީ ކެންޑިޑޭޓަށް ތާއީދުކުރާނެކަމަށް ދަ ޑިމޮކްރެޓްސްގެ ފަރާތުން ހުށައެޅުމެއް އައިސްފައިވާކަމަށް އެމްޑީޕީން ވަނީ ބުނެފައެވެ.
އެ ހުށައެޅުމަށް އެމްޑީޕީން އެއްބަސްވެފައި ނުވާނެ ކަމަށާއި، ރިޔާސީ އިންތިޚާބުގެ ދެވަނަ ބުރުގައި ދަ ޑިމޮކްރެޓްސްއިން ވަކި ފަރާތަކަށް ނުޖެހުމަށް ނިންމީ އެފަދަ އެއްބަސްވުމެއްގެ ސަބަބުން ނޫންކަމަށް އެމްޑީޕީން ވަނީ ހާމަކޮށްފަ އެވެ.
"ރިޔާސީ އިންތިހާބުގެ ދެވަނަ ބުރުގައި އެއްވެސް ކެންޑިޑޭޓަކަށް ތާއީދުނުކުރުމަށް ދި ޑިމޮކްރެޓްސްއިން ނިންމި ނިންމުމަކީ މި ޕާޓީއާއެކު އެއްވެސް އެއްބަސްވުމެއްގެ ދަށުން އެ ޕާޓީން ނިންމާފައިވާ ނިންމުމެއް ނޫނެވެ"
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)
ނިޒާމީ ވޯޓު ނެގުމާއި ގުޅޭގޮތުން ރައީސް އިބްރާހިމް މުހައްމަދު ޞާލިހު ވިދާޅުވީ، އެމަނިކުފާނު ތާއީދު ކުރައްވަނީ ރިޔާސީ ނިޒާމަށް ކަމަށެވެ. އަދި ނިޒާމު ބަދަލުކުރާނަމަ ރައްޔިތުންގެ ބަހެއް ހޯދަން ޖެހޭނެ ކަމަށެވެ.
އެ ނޫންގޮތަކަށް އެކަން ނުކުރެވޭނެ ކަމަށާއި، މަޖިލީހުން ބިލެއްގެ ސިފައިގައި އެކަން ފާސްކުރި ނަމަވެސް، އެ ބިލު ތަސްދީގު ކުރައްވާނީ ރައްޔިތުންގެ ފެންނަ ނުފެންނަ ވޯޓަކަށް އެހުމަށްފަހުގައި ކަމަށް ރައީސް ޞާލިހު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
