ދުވަސްވަރަކީ މޫސުން ގޯސް ދުވަސްވަރެއް ކަމުން މޫސުމަށް ސަމާލުވުމަސް ފުލުހުން އިލްތިމާސް ކޮށްފިއެވެ.

ފުލުހުން ވިދާޅުވެފައިވަނީ އެއްގަމު އުޅަނދު ދުއްވާއިރު ސަމާލުވުމަށެވެ. އެގޮތުން ވައިގަދަ ވަގުތުތަކުގައި ކޮންޓްރޯލްކުރެވޭ މިންގަނޑެއްގައި ސައިކަލުގެ ސްޕީޑް ބެހެއްޓުމާއި، ވާރޭގައި އުޅަނދު ދުއްވާއިރު ހެޑްލައިޓް ދިއްލުމަކީ ރައްކާތެރި ކަމެއް ކަމަށް ފުލުހުން ބުނެފައިއެވެ.

މިއާއި އެކު ވަޔާއި އެކު ހަލާކުނުވާ ފަދަ ވިއްސާރަ ކޯޓް ބޭނުން ކުރުމާއި، ބުރުގާ އަޅާ ފަރާތްތަކުން ވަޔާއި އެކު ބުރުގާ މޫނުމައްޗަށް ނުދާނެހެން ބެހެއްޓުމާއި އެކު މަގުމަތީގައި އުޅަނދު ދުއްވާއިރު ހިނގާ މީހުންނަށް ޚާއްސަ ސަމާލުކަމެއް ދިނުމަށް އިލްތިމާސް ކޮށްފައިވެއެވެ.

މީގެ އިތުރުން ކަނޑު ދަތުރުފަތުރު ކުރުމުގައި ސަމާލުވުމަށްވެސް ފުލުހުން އިލްތިމާސް ކޮށްފައިވެއެވެ.

އެގޮތުން ކަނޑުދަތުރު ފަތުރުކުރުމުގައި މޫސުމާއި ބެހޭ އެންމެ ފަހުގެ މަޢުލޫމާއި ހޯދުމާއި، އުޅަނދުގައި ސަލާމަތީ ގޮތުން ފުރިހަމަ ކުރަންޖެހޭ ކަންކަން ފުރިހަމަ ކުރެވިފައިވޭތޯ ބެލުމަށް ފުލުހުން އިލްތިމާސް ކޮށްފައިވެއެވެ.

އަދި އުޅަނދަށް އެކަށީގެންވާ ވަރަށްވުރެ އިތުރަށް މީހުން ނޭރުވުމަށާއި، އުޅަނދަކަށް ކަނޑައެޅިފައިވާ މިންގަނޑަށްވުރެ އިތުރަށް މުދާ ބަރުނުކުރުމަށް ފުލުހުން ވަނީ އިލްތިމާސް ކޮށްފައެވެ.