ވެރިކަމުގެ ނިޒާމަށް ބަދަލު ގެނައުމަށް ވޯޓަކަށް ދިޔުމަށް ގޯވާލެއްވުމަށް ފަހު ގިނަ ބައެއްގެ ނުރުހުމާއި އެކު ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ގޮތް ދޫކުރައްވައިފިއެވެ.

މިއަދުގެ ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން ރައީސް ނަޝީދު ވިދާޅުވީ ވެރިކަމުގެ ނިޒާމު ބަދަލުކުރުމުގެ މަސައްކަތް މަޑުޖައްސާލާ، އިންތިޚާބީ ރައީސް ޑރ މުޙައްމަދު މުޢިއްޒަށް ޤައުމު ހިންގުމުގެ ފުރުސަތު ދިނުމަށް ނިންމަވައިފައިވާ ކަމަށެވެ.

ރައީސް ނަޝީދު ވިދާޅުވީ ރިޔާސީ ނިޒާމެއްގައި ވެރިކަން ކުރުމުގެ ފުރުސަތު އިންތިޚާބީ ރައީސް ޑރ. މުޙައްމަދު މުޢިއްޒަށް ދޭން ޑިމޮކްރެޓްސް ނިންމައި އެކަން އެމަނިކުފާނަށް ދަންނަވާފައިވާނެ ކަމަށެވެ. އެކަމަކު، ނިޒާމު ބަދަލުކުރުމުގެ ވާހަކަ ރައްޔިތުންގެ މެދުގައި ހުއްޓި ނުދާނެ ކަމަށް މުޢިއްޒަށް ދެންނެވި ކަމަށް ރައީސް ނަޝީދު ވިދާޅުވި އެވެ.

މިކަން މަޖިލީހުގައި އިޢުލާނު ކުރައްވައި މިއަދުގެ ޖަލްސާއަށް އެޖެންޑާ ކޮށްފައިވާ ނިޒާމީ ވޯޓުގެ މަސައްކަތް ނުކުރައްވާ  ރައީސް ނަޝީދު ވަނީ ދޫކޮށްލައްވައި ފައެވެ.

ވެރިކަމުގެ ނިޒާމު ބަރުލަމާނީ ނިޒާމަށް ބަދަލު ކުރުމަށް ތާއީދު ނުކުރުމަށް ރާއްޖޭގެ އެންމެ ބޮޑު ސިޔާސީ ޕާޓީ އެމްޑީޕީ އިން ވަނީ ނިންމައިފައެވެ. ޢަދާލަތު ޕާޓީ އަދި ޖޭޕީ އިންވެސް ވަނީ ބަރުލަމާނީ އަށް ނޫނެކޭ ބުނެފައެވެ.