އިންޑިޔާ އާއި ކެނެޑާއާއި ދެމެދު އުފެދިފައިވާ ހަމަނުޖެހުން ތަކުގެ ތެރެއިން މައްސަލައަށް ހައްލެއް ގެނައުމެއް ނެތި އިންޑިޔާގައި ތިބި 40 އަށްވުރެ ގިނަ ޑިޕްލޮމެޓުން އެޤައުމުން އަނބުރާ ގެންދިޔުމަށް ކެނެޑާ ސަރުކާރަށް އިންޑިޔާ ސަރުކާރުން އަންގައިފިއެވެ.

އިންޑިޔާ ސަރުކާރުން އަންގައިފައިވަނީ އޮކްޓޫބަރު 10ގެ ކުރިން އިންޑިޔާގައި ތިބި ކެނެޑާގެ 40އަށް ވުރެ ގިނަ ޑިޕްލޮމެޓުން އެޤައުމުން އަނބުރާ ގެންދިޔުމަށް އަންގައިފައެވެ.

އިންޑިޔާއާއި ކެނެޑާއާއި ދެމެދު އުފެދިފައިވާ ހަމަނުޖެހުން ތަކަކީ ކެނެޑާގެ ރައްޔިތެއް ކަމަށްވާ ހަރްދީޕް ސިންހް ނިއްޖާރުގެ މަރުގެ މައްސަލައިގައި، އެމަރުގެ ފަހަތުގައިވަނީ އިންޑިޔާގެ އަތެއް ކަމަށް ކެނެޑާގެ ބޮޑުވަޒީރު ޖަސްޓިން ޓްރޫޑޯ ވިދާޅުވުމުގެ ސަބަބުންނެވެ.

މިކަމާއި ގުޅިގެން ކެނެޑާއާއި އިންޑިޔާއާއި ދެމެދު ޑިޕްލޮމެޓް މައްސަލަތަކެއް ވަނީ އުފެދިފައެވެ.

ހަރްދީޕް ސިންހް ނިއްޖާރަކީ ސިޚުންގެ ވަކި ދައުލަތެއެއް އުފެއްދުމަށް އަޑު އުފުލަމުން ދިޔަ އިސް ލީޑަރެކެވެ. އިންޑިޔާއިން ވަނީ ހަރްދީޕް ސިންހް އަކީ ޓެރަރިސްޓެއް ކަމަށް ކަނޑައަޅައިފައެވެ.

ހަރްދީޕް ސިންހްގެ މަރުގެ މައްސަލަގައި އިންޑިޔާގެ އަތެއްވާ ކަމަށް ޓްރޫޑޯ ވިދާޅުވުމާއި ގުޅިގެން އިންޑިޔާއިން ވަނީ އެވާހަކަ ތަކަކީ އެއްވެސް އަސްލެއް ނެތް ވާހަކަ ތަކެއް ކަމަށް ބުނެފައެވެ.

ދެޤައުމުގެ ދެމެދުގައި އުފެދިފައިވާ ހަމަނުޖެހުން ތަކުގެ ތެރެއިން އިންޑިޔާއިން ވަނީ ކެނެޑާގެ ރައްޔިތުންނަށް ވިސާ ދިނުން ހުއްޓާލައިފިއެވެ.

އިންޑިޔާ ސަރުކާރުން ވަނީ ކެނެޑާއަށް ދިޔުމާއި ގޮސް އުޅުމުގައި ސަމާލުވުމަށް ވަނީ އިންޑިޔާގެ ރައްޔިތުންނަށް އިލްތިމާސް ކޮށްފައެވެ. އެއާއި ގުޅިގެން އޭގެ ޖަވާބެއްގެ ގޮތުން ކެނެޑާއިން ވަނީ ކެނެޑާއަކީ ރައްކާތެރި އަމާން ޤައުމެއް ކަމަށް ބުނެ ކެނެޑާގެ ރައްޔިތުން ދަތުރުކުރުމުގައި އިންޑިޔާއަށް މަޑު ކުރުމުގައި ޓެރަރިސްޓު ހަމަލާއެއް ދީފާނެތީ ޚާއްސަ ސަމާލުކަމެއް ދިނުމަށް އަންގައިފައެވެ.