އަންނަ އަހަރު އޮންނަ ރައްޔިތުންގެ މަޖިލީހުގެ އިންތިޚާބުގައި, ކުރިމަތިލައްވަން ދިޔަރެސް ނޫހުގެ ކޯ-ފައުންޑަރު, ނޫސްވެރިޔާ އަޙްމަދު އަޒާން ވާދަ ކުރަން ނިންމަވައިފިއެވެ.

އަޒާން މީސްމީޑިއާގައި ކޮށްފައިވާ ޕޯސްޓެއްގައި ވިދާޅުވެފައިވާ ގޮތުގައި އޭނާ ވާދަކުރައްވަން ނިންމަވާފައިވަނީ އައްޑޫ ސިޓީގެ ހިތަދޫ މެދު ދާއިރާގެ ޕީޕީއެމް/ޕީއެންސީ ޕްރައިމަރީގައެވެ.

މިހާރު އެ ދާއިރާ ތަމްސީލް ކުރައްވަމުން ގެންދަވަނީ ޑިމޮކްރެޓްސްގެ އަޙްމަދު ރަޝީދު (ޗެކްމާކް ރަޝީދު)އެވެ.

Advertisement

އަޒާންގެ ޕޯސްޓުގައި އިތުރަށް ވިދާޅުވީ, ނޫސްވެރިއެއްގެ އަދި އެކްޓިވިސްޓެއްގެ ހައިސިއްޔަތުން އޭނާ އަބަދުވެސް މަސައްކަތް ކުރައްވާފައި ވާނީ، ބޭރުގެ ނުފޫޒު ތަކުން ރާއްޖެ މިނިވަންކޮށްދީ، ހެޔޮ ވެރިކަމެއް ކުރުމަށް ވަކާލާތު ކުރުމަށް ބާރުއެޅުއްވުމަށް ކަމަށެވެ. 

އަދި އޭނާ މަޖިލީހުގެ ގޮނޑިއަށް ވާދަކުރައްވަނީ ރާއްޖެއަށް ހެޔޮ އިސްލާހީ ބަދަލުތަކެއް ގެނައުމަށް ފެށްޓެވި މަސައްކަތް ކުރިއަށް ގެންދިއުމަށް އެންމެ ރަނގަޅު މަގަކީ 2024 ވަނަ އަހަރު އިންތިޚާބުކުރާ ރައްޔިތުންގެ މަޖިލީހުގެ މެންބަރެއްގެ ގޮތުގައި މަސައްކަތްކުރުންކަމަށް ޤަބޫލުކުރެވޭތީ ކަމަށްވެސް ވިދާޅުވެފައިވެއެވެ. 

"މިކަމުގައި އަޅުގަނޑަށް އެހީތެރިވާން ބޭނުންފުޅުވާ އެންމެހާ ބޭފުޅުން އަޅުގަނޑަށް މެސެޖުކޮށްދިނުން އެދެން." އަޒާންގެ ޕޯސްޓުގައި ވިދާޅުވެފައިވެއެވެ. 

އަޒާންގެ އިތުރުން ދިޔަރެސްގެ ނޫސްވެރިޔާ އައިދާ އަބްދުލްހަކީމް ވެސް ވަނީ މަޖިލީހުގެ އިންތިޚާބުގައި ވާދަކުރައްވަން ނިންމަވާފައިވާކަން އިއުލާން ކުރައްވާފައެވެ. އޭނާ ވާދަކުރައްވަނީ މަޑަވެލި ދާއިރާގެ ގޮނޑިއަށެވެ.