ހައްދުފަހަނައަޅާފައިވާ ޔަހޫދީން ފަލަސްތީނުގައި ހިންގަމުންދާ ޢުދުވާނުތަކުގައި ހާލުގައި ޖެހިފައިވާ މުސްލިމު އަޚުންނާއި އުޚުތުންނަށް އެހީވުމަށް އިންޓަނޭޝަނަލް އެއިޑް ކެންޕެއިން، އައިއޭސީން ހުޅުވާލި، "ޣައްޒާ އެމެޖެންސީ ރިލީފް ފަންޑް" އަށް ތިން ގަޑިއިރު ތެރޭގައި އެއް ލައްކަ އަށްވުރެ ގިނަ ފައިސާ ލިބިފައިވާ ކަމަށް އައިއޭސީން ބުނެފިއެވެ. 

ގަދަކަމުން މަސްޖިދުލް އަޤްޞާ ފޭރިގެންފައިވާ ޔަހޫދީންގެ ކިބައިން އެމިސްކިތް ސަލާމަތް ކޮށް، ފަލަސްޠީނުގެ މިނިވަންކަމަށް ޖިހާދު ކުރަމުންދާ މުޖާހިދުންގެ ޖަމާޢަތްކަމަށްވާ ހަމާސްއިން ޔަހޫދީންގެ ދަޢުލަތް، އިސްރާޢީލާ ދެކޮޅަށް ހަނގުރާމަ އިޢުލާނުކޮށް އަސްކަރީ ކެމްޕޭނެއް ފެށުމާ ގުޅިގެން ޔަހޫދީ އިސްރާޢީލުގެ އަސްކަރިއްޔާއިން ޣައްޒާއަށް ބޮން އަޅައި ފަލަސްޠީނުގެ 313 އަށްވުރެ ގިނަ މީހުން މިހާރު ވަނީ ޝަހީދުކޮށްލާފައެވެ.

ޔަހޫދީ އިސްރާޢީލުގެ ޖައްބާރު އަސްކަރިއްޔާއިން ދަނީ ޑްރޯނާއި އާޓިލަރީ ބަޑި ބޭނުން ކޮށްގެން މެދުކެނޑުމެއް ނެތި ޣައްޒާއަށް ބޮން އަޅަމުންނެވެ. މި ހަމަލަތަކުގައި ފަލަސްޠީނުގެ 1990 އަށްވުރެ ގިނަ މީހުން ވަނީ ޒަޚަމްކޮށްލާފައެވެ.

ފަލަސްތީނުގެ ހަލާކުވެފައިވާ އިމާރާތްތަކުގެ ކައިރީގައި ރައްޔިތުން ތަކެއް-- ފޮޓޯ/ ވޮއިސް 

އައިއޭސީން ބުނެފައިވާ ގޮތުގައި، ފަލަސްތީނުގައި އިޒްރޭލުން ހިންގަމުންދާ ޢުދުވާނު ތަކުގައި ހާލުގައި ޖެހިފައިވާ 1000 އަށްވުރެ ގިނަ ޢާއިލާ (ގާތްގަނޑަކަށް 6000 މީހުން) އަށް އެމެޖެންސީ އެހީ ބޭނުންވެފައިވާ ކަމަށެވެ. އެގޮތުން އެފަރާތްތައް ވަނީ ފެނާއި ކާބޯތަކެތީގެ އިތުރުން ދެންވެސް އަސާސީ އެކިއެކި ބޭނުންތައް ފުއްދުމަށް ބޭނުންވާ އެހީއަށް ވަރަށް ބޮޑަށް ބޭނުންވެފައި ކަން އައިއޭސީން ފާހަގަކުރެއެވެ.

އަދި އެ ޢާއިލާ ތަކަށް އެހީވުމަށް ދާނެ ޚަރަދު ގާތްގަނޑަކަށް 5000,000 ޑޮލަރަށް އަރާ ކަމަށްވެސް އެ ޖަމިއްޔާ އިން ފާހަގަކުރެ އެވެ. 

ފަލަސްތީނުގެ ހަލާކުވެފައިވާ އިމާރާތްތަކުގެ ކައިރީގައި މީހެއް-- ފޮޓޯ/ ވޮއިސް 

ފަލަސްތީނުގެ ހާލުގައި ޖެހިފައިވާ އެ މުސްލިމު އަޚުންނާއި އުޚުތުންނަށް އެހީތެރިވުމަށް އިންޓަނޭޝަނަލް އެއިޑް ކެންޕެއިން އިން "ޣައްޒާ އެމެޖެންސީ ރިލީފް ފަންޑް" ގެ ނަމުގައި މިއަދު ފަންޑެއް ހުޅުވާލާފައިވާއިރު، އެ ފަންޑަށް ތިން ގަޑިއިރުތެރޭގައި 1 ލައްކަ އަށްވުރެ ގިނަ ރުފިޔާ ލިބިފައިވާ ކަމަށް އައިއޭސީން ވަނީ "ވޮއިސް" އަށް މައުލޫމާތު ދީފައެވެ. 

ދިވެހިންގެ ފަރާތުން މިފަދަ ކަން ކަމުގައި އަބަދުވެސް ފުރިހަމަ އެހީތެރިކަމާއި އެއްބާރުލުން ލިބޭކަން ފާހަގަކޮށް އައިއޭސީން ވަނީ، އަދިވެސް ހާލުގައި ޖެހިފައިވާ ފަލަސްތީނުގެ ރައްޔިތުންނަށް އެހީތެރިވުމުގެ ފުރުސަތު އެންމެހާ ރައްޔިތުންނަށް ހުޅުވިފައިވާ ކަމަށް ބުނެފައެވެ. 

އެގޮތުން އެހީވާން ބޭނުންވާ ފަރާތްތަކުން އަންނަނިވި އެކައުންޓަށް ފައިސާ ޖަމާކުރުމުން އެކަން ހަމަޖެހިގެންދާނެ ކަމަށް އެ ޖަމިއްޔާ އިން މައުލޫމާތު ދެއެވެ.