ފަލަސްޠީނުގެ މިނިވަންކަމަށް ހަނގުރާމަ ކުރަމުންދާ ހަމާސް ޖަމާޢަތާއި އިޒްރާއިލްގެ ޔަހޫދީންނާއި ދެމެދު ހިނގަމުންދާ ހަނގުރާމައިގައި އިޒްރާއިލުން ޣައްޒާއަށް ބާރުގަދަ ހަމަލާތަކެއް ދެމުން އެބަގެންދެއެވެ.

ހޮނިހިރު ދުވަހު ފަލަސްޠީނުގެ ހަމާސްއިން އިޒްރާއިލްގެ ޔަހޫދީން ދިރިއުޅޭ ސަރަހައްދުތަކަށް އެތައްހާސް ރޮކެޓެއް ދޫކޮށްލައި ދިން ހަމަލާތަކުގެ ރައްދެއްގެ ގޮތުގައި އިޒްރާއިލުން ދޭން ފަށައިފައިވާ މިހަމަލާތަކުގެ ސަބަބުން ފަލަސްޠީނުގެ އެތައް މީހަކު މިހާރު ވަނީ ޝަހީދު ވެފައެވެ.

އިޒްރާއިލުން ފަލަސްޠީނުގެ ޢާންމުންނަށް އަންގައިފައިވަނީ އެމީހުންނާއި މެދު ދުޝްމަނު ކަމެއް ނެތް ކަމަށެވެ. ނަމަވެސް އިޒްރާއިލްގެ ހަމަލާތައް އަމާޒުކުރަމުންދަނީ ޣައްޒާގެ ޢާންމުން ދިރިއުޅޭ ސަރަހައްދުތަކަށް ކަން ފާހަގަ ކޮށްލަން ޖެހެއެވެ.

އިޒްރާއިލުން ދިން ހަމަލާތަކުގެ ސަބަބުން ޣައްޒާގެ އެތައް އިމާރާތް ތަކެއް ހަލާކުވެފައި ވާއިރު ހަލާކުވެފައިވާ އިމާރަތްތަކުގެ ދަށުގައި ގިނަ ބަޔަކު ތާށިވެފައި ވާކަމަށް ޤަބޫލުކުރެވެއެވެ.

އިޒްރާއިލްގެ ހަމަލާތަކުގެ ސަބަބުން މިހާތަނަށް ޣައްޒާގެ 413 މީހުން ޝަހީދު ވެފައިވެއެވެ. އޭގެ ތެރޭގައި 78 ކުޑަކުދިންނާއި 41 އަންހެނުން ހިމެނެއެވެ.

ހަމަލާތަކުގެ ސަބަބުން ޒަޚަމްވި މީހުންގެ ޢަދަދު 2300 އިން މައްޗަށް ވަނީ ގޮއްސައެވެ.

އިޒްރާއިލްގެ ޔަހޫދީން ވައިގެން މަގުން ހަމަލާތައް ދެމުންދާއިރު ހަމާސްގެ ހަނގުރާމަވެރިން ދަނީ އިޒްރާއިލްގެ ސިފައިންނަށް ބަޑީގެ ހަމަލާތައް ދެމުންނެވެ. މިހަމަލާތަކުގެ ބަދަލުގައި އިޒްރާއިލުންވެސް ދަނީ ބަޑީގެ ހަމަލާތައް ދެމުންނެވެ.

ބަދަލުކުރެވެމުންދާ ބަޑީގެ ހަމަލާތަކުގައި އިޒްރާއިލް ސިފައިންގެ ގިނަ ބަޔަކު ޒަޚަމްވެފައިވެއެވެ.