ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލަ ބަލައިގަތުމާމެދު ގޮތް ނިންމުމުގެ އިޚްތިޔާރު އެމަނިކުފާނަށް ލިބިގެން ނުވާ ކަމަށް، އެމްޑީޕީ ޕާލިމެންޓްރީ ގުރޫޕުގެ ލީޑަރު އަދި މަޖިލީހުގެ މެޖޯރިޓީ ލީޑަރު އައްޑޫ ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް ވިދާޅުވެއްޖެއެވެ.
ނަޝީދުގެ އިތުބާރު ނެތް ކަމުގެ މައްސަލަ މަޖިލީހަށް ހުށަހަޅަން އެމްޑީޕީގެ ޕާލިމަންޓް ގުރޫޕުން ފާސްކުރީ އިއްޔެ ބޭއްވި ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާގުންނެވެ. އަދި އެ މައްސަލަ އިއްޔެ ހަވީރު މަޖިލީހަށް ހުށައެޅީ 48 މެންބަރުންގެ ސޮޔާއިއެކުއެވެ.
އެހެން ނަމަވެސް އެ މައްސަލަ އަކީ ކުރިން ވެސް ހުށަހެޅުމަށްފަހު އަނބުރާ ގެންދިޔަ މައްސަލައަކަށް ވުމުން ދެން އަލުން ހުށަހެޅުމުން މަޖިލީހަށް ބަލައިގަންނަން އުނދަގޫ ވާނެ ކަމަށް ނަޝީދު ވަނީ ވިދާޅުވެފަ އެވެ. އަދި އެ މައްސަލަ ދެން ކުރިއަށްގެންދެވޭނީ އަންނަ ދައުރެއްގައިކަމަށް ފެނިވަޑައިގަންނަވާ ކަމަށްވެސް ނަޝީދު ވިދާޅުވި އެވެ.
އެކަމާއި ގުޅިގެން، އެމްޑީޕީގެ ޕާލިމަންޓަރީ ގުރޫޕުގެ ފަރާތުން މިއަދު ރައްޔިތުންގެ މަޖިލީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އަސްލަމް ވިދާޅުވީ އެ މައްސަލަ ކުރިއަށްގެންދެވިދާނެކަން ނުވަތަ ނޫންކަން ނިންމެވުމުގެ އިޚުތިޔާރު ލިބިވަޑައިގަންނަވާ ފަރާތަކީ މަޖިލީހުގެ ރައީސް ނޫން ކަމަށެވެ.
"އެ މައްސަލަ (އިތުބާރު ނެތް ކަމުގެ މައްސަލަ) ކުރިއަށްގެންދެވިދާނެކަން ނުވަތަ ނޫންކަން ނިންމެވުމުގެ އިޚުތިޔާރު ލިބިވަޑައިގަންނަވާ ފަރާތެއް ނޫން މަޖިލީހުގެ ރައީސް އަކީ. އާންމު ހަމަތަކާއި އުސޫލުތަކަށް ބަލާއިރުވެސް އެފަރާތެއްގެ އިތުބާރުނެތްކަމުގެ މައްސަލައެއް ހުށަހެޅުނީމައި އެފަރާތަކުން، މަޖިލީހުގެ ރައީސްކަމުގައިވާނަމަ މަޖިލީހުގެ ރައީސް އަދި މަޖިލީހުގެ ނައިބުރައީސް ކަމުގައިވާނަމަ މަޖިލީހުގެ ނައިބުރައީސް، އިސްވެ ބަސްބުނުމުގެ އުސޫލަކީ އާންމު އުސޫލާ ޚިލާފު ހަމައެއް. އެކަން ނިންމަވާނީ މަޖިލީހުގެ އަމީން އާއްމު"
މެޖޯރިޓީ ލީޑަރު މުހައްމަދު އަސްލަމް
އަސްލަމް ވިދާޅުވީ އިތުބާރު ނެތް ކަމުގެ މައްސަލާގައި ގޮތެއް ނިންމުމުގައި މަޖިލީހުގެ ކައުންސިލް ޖެނެރަލްގެ ލަފާ ހޯއްދަވާނެ ކަމަށްވެސް ގަބޫލުފުޅުކުރައްވާ ކަމަށެވެ.
އަދި މަޖިލީހުގެ ރައީސްގެ އިތުބާރުގެ ނެތް ކަމުގެ ގަރާރެއް ހުށަނޭޅޭނެ ކަމަށް މަޖިލީހުގެ ގަވާއިދުގެ އެއްވެސް މާއްދާއެއްގައި ނޯންނަ ކަމަށާ، އަދި މައްސަލަ ހުށަނޭޅޭނެ ކަމަށް ބުނެވޭނެ އެއްވެސް ހުއްޖަތެއްވެސް ނެތް ކަމަށް އަސްލަމް ވަނީ ވިދާޅުވެފަ އެވެ.
ރައީސް ނަޝީދުގެ އިތުބާރު ނެތްކަމަށް ނިންމި ސަބަބުތަކުގެ ތެރޭގައި، މަޖިލީހުގެ އެޖެންޑާ ކަނޑައެޅުމާއި މަޖިލީހުގެ ތަޅުމަށް ކަންކަން ގެނައުމުގައި ރައީސް ނަޝީދުގެ އަމިއްލަ މަސްލަހަތު އިސްކޮށް ވަކި ފަރާތަކަށް ބުރަވެ، މަޖިލީހުގެ ގަވާއިދާ ހިލާފަށް ކަންކަން ނިންމަމުންދާކަމަށް ޕާލަމެންޓްރީ ގްރޫޕުން ފާހަގަކޮށްފައިވެއެވެ.
އަދި މަޖިލީހުގެ ޖަލްސާތައް އެތައް ދުވަހެއް ވަންދެން ރައީސް ނަޝީދު ހުއްޓުވިކަމަށާއި، އަލުން ޖަލްސާތައް ފެށީ ރައީސް ނަޝީދު ނިސްބަތްވެވަޑައިގަންނަވާ ޕާޓީ ދަ ޑިމޮކްރެޓްސް އަދި އެމަނިކުފާނު މަސްލަހަތު އޮތް މައްސަލަތަކެއް މަޖިލީހަށް ތާވަލު ކުރުމަށް ފަހުކަމަށްވެސް ބުނެފައިވާއިރު އިސްލާހުގެ ނަމުގައި މަގާމުގެ ދަހިވެތިކަން އިސްކޮށް އެމަނިކުފާނު އެމްޑީޕީއަށް ގެއްލުން ދެމުންދާ ކަމަށްވެސް ތުހުމަތު ކޮށްފައި ވެއެވެ.
Advertisement
This content is created and paid for by advertisers and does not involve Voice Journalists
