ފަލަސްޠީނުގެ މިނިވަންކަމަށް ހަނގުރާމަ ކުރާ ހަމާސް އާއި އިޒްރާއިލާއި ދެމެދު ހިނގަމުންދާ ހަނގުރާމައިގައި ޣައްޒާއަށް އިޒްރާއިލްގެ ޔަހޫދީން ދެމުންދާ ހަމަލާތަކާއި ގުޅިގެން ޣައްޒާގެ ރައްޔިތުން ދާނެ ތަނެއް، ބޯހިޔާވަހި ކަމެއް ނެތި ޙާލުގައި ޖެހިއްޖެއެވެ.

ޣައްޒާގައި ހުންނަ ދެވަނައަށް އެންމެ އުސް ޓަވަރަށް އިޒްރާއިލުގެ ޔަހޫދީން ދިން ހަމަލާގައި އެޓަވަރު ވަނީ ބިމާއި ހަމަވެފައެވެ. އެޓަވަރަކީ ގިނަ ޢަދަދެއްގެ މީޑިއާ އޮފީސްތަކަކާއި ލޯޔަރުންގެ އޮފީސްތަކެއްގެ އިތުރުން ގިނަ ބަޔަކު ދިރި އުޅޭ ވެސް ޓަވަރެކެވެ.

މިޢިމާރާތުގައި ގިނަ ޢާއިލާތަކެއް ދިރިއުޅޭއިރު، އިޒްރާއިލުން ދިން ވައިގެ ހަމަލާ އެޢިމާރާތައް އެރި ވަގުތަކީ އެޢިމާރާތުގައި ދިރިއުޅުނު މާބަނޑު އަންހެނެއް ވިހެއުމަށް ބަނޑުގައި ރިއްސަން ފެށި ވަގުތެވެ.

އެވަގުތު އެޢާއިލާ ހޮސްޕިޓަލަށް ދިޔުމަށް އަވަސް ވެގަތް ނަމަވެސް ވިހައިގެން ތުއްތު ދަރިފުޅާއި އެކު އެނބުރި ވަންނާނެ ތަނެއް ވަނީ ނެތިފައެވެ.

11 ބުރީގެ އެ ޓަވަރަކީ 80 ޢާއިލާއެއް ދިރިއުޅޭ ޢިމާރާތެކެވެ.

އިޒްރާއިލްގެ ހަމަލާތަކުގެ ސަބަބުން ޝަހީދުވި ޣައްޒާގެ ރައްޔިތުންގެ ޢަދަދު ވަނީ 436 އަކަށް އަރައިފައެވެ. އަދި އެކިވަރުގެ ޒަޚަމް ތައް ލިބިފައިވާ މީހުންގެ ޢަދަދު 2300 އިން މައްޗަށް ވަނީ އަރައިގެން ގޮއްސައެވެ.

އިޒްރާއިލްގެ ޔަހޫދީން ފަލަސްޠީނާއި ދެކޮޅަށް ހަނގުރާމަ އިޢްލާނު ކޮށްފައި މިވަނީ ފަލަސްޠީނުގެ މިނިވަން ކަމަށްޓަކައި ހަނގުރާމަ ކުރަމުންދާ ހަނގުރާމަވެރިން އިޒްރާއިލްގެ ޔަހޫދީން އުޅޭ ސަރަހައްދަށް ދިން ރޮކެޓް ހަމަލާތަކުގެ ސަބަބުންއިޒްރާއިލުގެ ޔަހޫދީންނަށް ލިބުނު ސިހުމާއި އެކުއެވެ.