އިންތިހާބީ ރައީސް ޑރ. މުހައްމަދު މުއިއްޒުގެ ވެރިކަން ފެއްޓެވުމާ ހަމައަށް މިހާރު މި ހިނގަމުންދާ އިންތިގާލީ މަރުހަލާގެ ރޫހާ ހިލާފު ބައެއް ކަންތައްތައް މުއައްސަސާތަކުން ހިންގަމުންދާ ކަމަށް އިންތިހާބީ ރައީސުލްޖުމްހޫރިއްޔާގެ އޮފީހުން ބުނެފިއެވެ.

އިންތިހާބީ ރައީސްގެ އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި އިންތިގާލީ މަރުހާލާގައި އިންތިޚާބީ ރައީސްގެ ފަރާތުން ކަނޑައަޅުއްވައިފައިވާ ތަރުޖަމާނު މުހައްމަދު ފިރުޒުލް ވިދާޅުވީ މި މުއްދަތުގައި ވަކި ގޮތަކަށް އަމަލު ކުރުމަށް އެދި ސިވިލް ސާވިސް ކޮމިޝަނުން ދައުލަތުގެ އިދާރާތަކަށް އަންގާފައިވަނީ އިންތިގާލީ މަރުހަލާގެ ތެރޭގައި ކަންކަން އޮމާން ކަމާއި އަމާންކަމާއެކު ކުރިއަށް ގެންދިއުމަށް މަގުފަހިކުރުމުގެ ގޮތުން ކަމަށެވެ.

އެހެންކަމުން ކޮމިޝަންގެ އެންގުމުގައިވާ ރޫހާ އެއްގޮތަށް ސިވިލް ސާވިސް ގާނޫނުގައި ނުހިމެނުނު ނަމަވެސް ދައުލަތުގެ ކުންފުނިތަކާއި އަދި އެހެން މުވައްސަސާތަކުން އަމަލު ކުރުމަށް ފިރްޒުލް ވަނީ އެދިވަޑައިގެންފައެވެ.

Advertisement

މީގެ އިތުރުންވެސް ފިރުޒުލް ވިދާޅުވީ އެކި އެކި މުވައްސަސާތަކުން އިންތިގާލީ މަރުހަލާގެ ރޫހާ ހިލާފު ބައެއް ކަންތައްތައް ހިންގުމަށް ނުވަތަ ހިންގަމުން ގެންދާ ކަމަށް މައުލޫމަތު ލިބޭ ކަމަށާއި އެކަމާމެދު ވަރަށް ބޮޑަށް ކަންބޮޑުވެވަޑައިގަންނަވާ ކަމަށެވެ. އެހެންނަމަވެސް ޖުމްލަ ގޮތެއްގައި އިދާރާތަކާއި މުވައްސަސާތަކުން މައުލޫމާތު އެއްކުރުމުގައި މިހާތަނަށް އެއްބާރުލުން ލިބެމުންދާ ކަމަށާއި އުންމީދަކީ މި މުއްދަތުގައި އެގޮތަށް ކަންތައްތައް ކުރިއަށް ދިއުން ކަމުގައިވެސް ފިރުޒުލް ވަނީ ވިދާޅުވެފައެވެ. 

ޕްރައިވަޓައިޒޭޝަން ބޯޑް (ޕީސީބީ) އިންވެސް ވަނީ އިންތިގާލީ މުއްދަތުގައި ސަރުކާރުން ކުންފުނިތަކުން އާންމުކޮށް ހިންގާ ވިޔަފާރީގެ މުއާމަލާތްތައް ފިޔަވައި މުޅިން އަލަށް ޕްރޮޖެކްޓެއް ނުވަތަ ކުންފުނިން ބޮޑު ހަރަދެއް ކުރަންޖެހޭ އައު އެއްވެސް ކަމެއް ނުކުރުމާއި ކުންފުނީގެ އާމްދަނީއަށް އަސަރުކުރާނެ ގަވައިދުތަކާއި އުސޫލުތަކާއި ނިންމުންތަކަށް އެއްވެސް ބަދަލެއް ނުގެނައުމަށް އަންގާފައެވެ.

އަދި ކުންފުނީގެ މުވައްޒަފުންނަށް މުސާރައާއި އިނާޔަތްދިނުމަށް ކަނޑައެޅިފައިވާ އުސޫލުތަކާއި އަދި މުސާރައާއި އިނާޔަތްތަކަށް އެއްވެސް ބަދަލެއް ނުގެނައުމަށްވެސް އެ ބޯޑުން ވަނީ އަންގާފައެވެ.