ފަލަސްޠީނުގެ މިނިވަން ކަމަށް ޓަކައި ހަނގުރާ ކުރާ ހަނގުރާމަވެރިންނާއި އިޒްރާއިލްގެ ޔަހޫދީންނާއި ދެމެދު ކުރިއަށްދާ ހަނގުރާމައިގެ ސަބަބުން އެހީއަށް ޖެހެމުންދާ ފަލަސްޠީނުގެ ރައްޔިތުންނަށް އެހީވުމަށް ދިވެހިންނަށް ހުޅުވާލުމުން އެފަންޑަށް އެއްދުވަސް ތެރޭ އެއް މިލިއަން ދިވެހި ރުފިޔާ ލިބިފައިވާ ކަމަށް އިންޓަރނޭޝަނަލް އެއިޑް ކެމްޕޭނުން ބުނެފިއެވެ.

އައިއޭސީ އިން ބުނެފައިވަނީ ހުއްޓުމެއް ނެތި އިޒްރާއިލްގެ ޔަހޫދީން ޣައްޒާއަށް ހަމަލާތައް ދެމުން ދިޔަ ނަމަވެސް އައިއޭސީގެ ވޮލެންޓިއަރުންގެ ޓީމުތަކުން ޣައްޒާގައި ހަމަލާތައް ދެމުންދާ ސަރަހައްދުތަކުގައި ހަރަކާތްތެރިވަމުން ކަމަށެވެ.

މީގެއިތުރުން އައިއޭސީ އިން ބުނެފައިވަނީ ހަނގުރާމައިގައި ގެއްލުން ލިބިފައިވަ ސަރަހައްދުތަކަށް ޒިޔާރަތްކޮށް ހާލުގައި ޖެހިފައިވާ ފަރާތްތަކުގެ ހާލަތު ގާތުން ބަލައި މިވަގުތަށް އެންމެ ބޭނުންވާނެ ޒަރޫރީ ކަންތައްތައް ދެނެގަތުމަށް ހިތްވަރާއި އެކު އެވޮލެންޓިއަރުން މަސައްކަތް ކުރަމުންދާ ކަމަށް އައިއެސީ އިން ބުނެއެވެ.

ފަލަސްޠީނުގެ ރައްޔިތުންނަށް އެހީވުމަށް ހުޅުވާލެވިފައިވާ ފަންޑަށް އަދިވެސް ލާރި ޖަމާކުރަން ވަނީ ހުޅުވާލެވިފައެވެ.

އެހީ ފޯރުކޮށްދިނުމަށް:

ބީއެމްއެލް އިސްލާމިކްއެކައުންޓް ނަމްބަރު: 7770000062741

އެކައުންޓް ނަން: International Aid Campaign

އެކައުންޓް ލޭބަލް: IAC | EMERGENCY  

ހޮނިހިރު ދުވަހު ފަލަސްޠީނުގެ ހަނގުރާމަވެރިން ދިން ހަމަލާތަކުގެ ރައްދުގައި އިޒްރާއިލް ސިފައިން ދަނީ ބާރުގަދަ ހަމަލާތަކެއް ދެމުންނެވެ. ރޭ ދިން ހަމަލާތަކުގައި މަނާ ހަތިޔާރު ވެސް ވަނީ ބޭނުން ކޮށްފައެވެ. އިޒްރާއިލްގެ ހަމަލާތައް އަމާޒުކުރަނީ ފަލަސްޠީނުގެ ޢާންމުން ދިރިއުޅޭ ތަންތަނަށެވެ.

ހަމަލާތަކުގެ ސަބަބުން ޝަހީދުވި މީހުންގެ ތެރޭގައި ގިނަ ޢަދަދެއްގެ ކުޑަ ކުދިންނާއި އަންހެނުންވެސް ހިމެނެއެވެ.

މިހާތަނަށް ޝަހީދުވި މީހުންގެ ޢަދަދެއްގެ ގޮތުގައި ރިކޯޑް ކުރެވިފައިވަނީ 436އެކެވެ. 2271 މީހަކަށް އެކިވަރުގެ ޒަޚަމްތައް ވަނީ ލިބިފައެވެ.