ދައުލަތުގެ ހިސާބުކިތާބަށް ބަދަލު ގެންނަން އުޅޭ ކަމުގެ މައުލޫމާތު ލިބޭ ކަމަށް އިންތިޤާލީ މަރުހަލާގައި އިންތިހާބީ ރައީސް ޑރ. މުހައްމަދު މުއިއްޒުގެ އޮފީހުގެ ތަރުޖަމާނު މުހައްމަދު ފިރުޒުލް މިއަދު ވިދާޅުވެއްޖެއެވެ.
އިންތިހާބީ ރައީސްގެ އޮފީހުގައި މިއަދު އޮތް ނޫސްވެރިންގެ ބައްދަލުވުމެއްގައި ވާހަކަދައްކަވަމުން ފިރުޒުލް ވިދާޅުވީ ދައުލަތުގެ ހިސާބުކިތާބަށް، ކުންފުނިތަކާއި މުއައްސަސާތަކުގެ ހިސާބުކިތާބަށް ބަައެއް ބަދަލު ގެނެސް، ކުރީގެ ތާރީހުތަކުގައި ރަސީދުތައް އުފެއްދުމާއި މިފަދަ ކަންތައްތައް ހިނގަމުންދާ ކަމަށް މައުލޫމާތު ލިބެމުންދާ ކަމަށެވެ.
މީގެ އިތުރުން މިއަދުގެ ނޫސްވެރިންގެ ބައްދަލުވުމުގައި އުންތިގާލީ މަރުހަލާގައި ދައުލަތުގެ ބައެއް ކުންފުނިތަކަށް އަލަށް މީހުން ވަޒީފާއަށް ނެގުމާއި ވަޒީފާގެ ކުރިއެރުންތައް ދެމުން އަންނަކަމުގެ މައުލޫމާތު ވެސް ލިބެމުންދާ ކަމަށާއި ސިވިލް ސާވިސް ކޮމިޝަނުގެ ދަށުގައި ނުހިމެނޭ ކުންފުނިތަކާއި އެހެނިހެން ދައުލަތުުގެ އިދާރާތަކުންވެސް އެ ކޮމިޝަނުގެ އެންގެވުމުގެ ރޫޙާ އެއްގޮތަށް މި މަރުހަލާގައި އަމަލުކުރުމަށް ސަމާލުކަން ދިނުމަށް ފިރުޒުލް ވަނީ އަންގާފައެވެ.
އަދި މި މަރުހަލާގައި އެގޮތަށް އަމަލުކުރުމަކީ އިންތިޚާބީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވަރަށް ބޮޑަށް އެދިވަޑައިގަންނަވާ ކަމެއް ކަމަށް ވެސް ފިރުޒުލް ވިދާޅުވިއެވެ.
މީގެ އިތުރުން މިއަދު ވަނީ އިންތިހާބީ ރައީސް ޑރ މުހައްމަދު މުއިއްޒުގެ ހުވާކުރެއްވުމުގެ ރަސްމިއްޔާތު ބޭއްވުމަށް މަސައްކަތް ކުރަމުން އަންނަނީ ނޮވެންބަރު މަހުގެ 17 ވަނަ ދުވަހު ހަވީރު ޖުމްހޫރީ މައިދާނުގައިކަންވެސް އިއުލާނުކުރައްވައިފައެވެ. އަދި ރައީސް އެދިލެއްވި ގޮތަށް ކަންތައް ތަރުތީބުވަމުން އަންނަ ކަމުގެ ޔަޤީންކަން މަޖިލީހުން ދީފައިވާ ކަމަށް ވެސް ފިރުޒުލް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
