ފަލަސްޠީނުގެ މިނިވަންކަމަށްޓަކައި ހަނގުރާމަ ކުރަމުންދާ ހަނގުރާމަ ވެރިން އިޒްރާއިލްގެ ޔަހޫދީންނަށް ދިން ހަމަލާތަކުގެ ރައްދުގައި އިޒްރާއިލުގެ ޔަހޫދީން ދެމުންދާ ހަމަލާތަކުގެ ސަބަބުން ޣައްޒަގެ ރައްޔިތުންނަށް މުޅި އިސްލާމީ ޢަރަބި އުންމަތުގެ އެހީއަށް ޖެހިފައިވާ ކަމަށް ޣައްޒާގެ ޑޮކްޓަރެއް ވިދާޅުވެއްޖެއެވެ.
އައިއޭސީގެ ވޮލެންޓިއަރަކު މެދުވެރިކޮށް ޣައްޒާގެ އަލްޝިފާ ހޮސްޕިޓަލުގެ ޑޮކްޓަރަކު ދެއްވި މަޢުލޫމާތުގައި ވިދާޅުވީ އިޒްރާއިލްގެ ޔަހޫދީންގެ ޖަރީމާތައް ހައްދުފަހަނަ އަޅައި ގޮސްފައިވާ ކަމަށެވެ. ޔަހޫދީންގެ ހަމަލާތަކުގައި ޝަހީދުވި މީހުންގެ ޢަދަދު 300 އަށް އަރައިފައިވާ ކަމަށާއި އޭގެ ތެރޭގައި ގިނަ ޢަދަދެއްގެ އަންހެނުންނާއި ކުޑަކުދިން އަދި ޢުމުރުން ދުވަސްވީ މީހުން ހިމެނޭ ކަމަށެވެ.
އަދި ޝަހީދުންގެ ޢަދަދު މިއަށްވުރެ މައްޗަށް ދާނެ ކަމަށް ލަފާ ކުރެވޭ ކަމަށްވެސް ޑޮކްޓަރ ވިދާޅުވިއެވެ. ހަމަމިއާއި އެކު އެކިވަރުގެ ޒަޚަމްތައް ލިބިފައިވާ މީހުންގެ ޢަދަދު 2500 އިން މައްޗަށް އަރާފައިވާ ކަމަށާއި، ލަފާކުރެވޭ ގޮތުން މި ޢަދަދުވެސް ދާނީ އިތުރުވަމުން ކަމަށް އޭނާ ވިދާޅުވިއެވެ.
ޑޮކްޓަރ ވިދާޅުވީ ޒަޚަމްތަކަށް ފަރުވާ ހޯދުމަށް ހޮސްޕިޓަލް ތަކަށް ނުގެނެވޭ މީހުން ވެސް ވަރަށް ގިނަ ކަމަށެވެ.
އޭނާ ވިދާޅުވީ ޣައްޒާގައި މަސައްކަތް ކުރަމުންދާ މެޑިކަލް އޮފިސަރުން މަސައްކަތް ކުރަމުންދަނީ "ރެޑް އެލާޓް" ގައި ކަމަށެވެ.
"އަހަރެމެން މިގޮވާލަނީ ދުނިޔޭގެ ޤައުމުތަކަށް އިޒްރާއިލްގެ ޢަމަލުތައް ކުށްވެރި ކުރުމަށް" ޑޮކްޓަރ ވިދާޅުވިއެވެ.
ކުރިއަށް އޮތް ތަނުގައި ޣައްޒާގެ ހޮސްޕިޓަލް ތަކަށް ބޭސް ފަރުވާއަށް ބޭނުންވާ ތަކެއްޗަށާއި، ބޭސް އަދި ކަރަންޓަށްވެސް ޖެހިދާނެކަމަށް އައިއޭސީ އަށް މަޢުލޫމާތު ދެއްވި އަލްޝިފާ ހޮސްޕިޓަލްގެ ޑޮކްޓަރ ވިދާޅުވިއެވެ.
"އަހަރެމެން ޢަރަބިންނަށް، އަދި ކިއެއްތަ މުޅި އިސްލާމީ އުންމަތައް މިގޯވާލަނީ އަހަރެމެންނަށް އެހީވުމަށް، އަޚްވަންތަ ކަމަށްޓަކައި އިންސާނިއްޔަތަށްޓަކައި އަދި ދީނަށްޓަކައި އަހަރެމެންނަށް އެހީތެރިވެދީ" ޑޮކްޓަރ ވިދާޅުވެފައިވެއެވެ.
މީގެ އިތުރުން ކުވައިތުން ޣައްޒާއަށް ފޮނުވި އެހީއަށްޓަކައި ޑޮކްޓަރ ވަނީ ކުވައިތް އަށް ޝުކުރު އަދާކުރައްވައިފައެވެ.
Advertisement
This content is created and paid for by advertisers and does not involve Voice Journalists
