މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ލީޑަޝިޕުން އެންމެ ފުރަތަމަ ކުރައްވަން ޖެހިވަޑައިގަންނަވާނެ ކަމަކީ ތައުބާވުންކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑާ) ވިދާޅުވެއްޖެ އެވެ. 

ބޮންޑާ މިފަދައިން ވިދާޅުވެފައިވަނީ ރައީސް އިބްރާހިމް މުހައްމަދު ޞާލިހުގެ ވެރިކަން ބަދަލުކުރީ މަޖިލީހުގެ ރައީސް މުހައްމަދު ނަޝީދުކަމަށް އެމްޑީޕީގެ ލީޑަޝިޕްގެ ބައެއް ބޭފުޅުން ވިދާޅުވެ ދައްކަވަމުންދާ ވާހަކަތަކަށް މަޖިލީހުގެ މިއަދުގެ ޖަލްސާގައި ރައްދުދެއްވަމުން ނެވެ. 

ބޮންޑާ ވިދާޅުވީ ބޮޑެތި ގޯސްތަކެއް ހެދުމުގެ ސަބަބުން ވެރިކަން ގެއްލިގެން ދިޔައިމާ އެކަމުގެ އިލްތިޒާމު އުފުލުމަށް ރައީސް ނަޝީދުގެ އިސްތަށިފުޅުގައި އަޅުވާ ވާހަކަދެއްކުމަކީ ތައުބާވާން ޖެހޭ ކަމެއް ކަމަށެވެ.

ވެރިކަމަކީ މާތް الله ދެއްވާ އެއްޗެއްކަމަށާއި، އެ ވެރިކަން އަތުލައްވަނީ ވެސް އެކަލާންގެކަން މުސްލިމުން ޤަބޫލުކުރާ ކަމަށާއި، އެ ނޫން ގޮތަކަށް އެ ވާހަކަތައް ދެއްކުމަކީ ކުށެއްކަމަށް ބޮންޑާ ވިދާޅުވި އެވެ.

ބޮންޑާ ވިދާޅުވީ ގޯހެއް ހެދުނީމާ އޭގެ ޒިންމާ އެހެން ބަޔަކު އުފުލަން ޖެއްސުމަކީ އެމްޑީޕީން މިފަހުން ކަންކަން ކުރަމުން އަންނަ ގޮތް ކަމަށެވެ.

ކުނިމެނޭޖުކުރުމުގެ ޤާނޫނަށް އެ ގެނައި އިސްލާހުގެ ސަބަބުން އެތައް ރައްޔިތުންނަކަށް ތަކުލީފު އުފުލަން ޖެހިފައިވާއިރު، އެކަމުގެ ފުރިހަމަ ޒިންމާ ނެގުމުގެ ބަދަލުގައި އެހެން ބައެއްގެ ބޮލަށް ކަންކަން ޖެހުމުގެ އުސޫލު އެމްޑީޕީން ގެންގުޅޭތީ ހިތާމަކުރައްވާކަމަށް ބޮންޑާ ވިދާޅުވި އެވެ. 

އެއާއެކު އޭނާ ވިދާޅުވީ އެމްޑީޕީއަށް ބޮޑެތި ބަދަލުތަކެއް އަންނަން ޖެހޭ ކަމަށެވެ. ހުރިހާ ލެވެލްއެއްގައި ވެސް އެ ބަދަލުތައް އައިސްގެން ނޫނީ އެމްޑީޕީއަށް ކުރިއެރުމެއް ނެތްކަން އޭނާގެ ވާހަކައިގައި ފާހަގަކުރެއްވި އެވެ.