ފަލަސްޠީނުގެ ދިފާޢުގައި ހަނގުރާމަ ކުރަމުންދާ ހަނގުރާމަވެރިން އިޒްރާއިލް ޔަހޫދީންނަށް ދިން ކުއްލި ހަމަލާ ތަކާއި ގުޅިގެން ފެށިފައިވާ ވަރުގަދަ ހަނގުރާމައިގެ ތެރެއިން އިޒްރާއިލުން ލުބްނާންއަށް ހަމަލާދޭން ފަށައިފިއެވެ.
ލުބްނާންގައި ހަރަކާތްތެރިވާ ހަނގުރާމެވެރި ޖަމާޢަތެއްކަމަށްވާ ހިޒްބުالله އިން ބުނެފައިވަނީ އިޒްރާއިލުން ދިން ހަމަލާތަކެއްގައި ހިޒްބުالله ގެ ބައެއް ހަނގުރާމަވެރިން ޝަހީދު ވެފައިވާ ކަމަށެވެ.
އިޒްރާއިލުން ލުބްނާންއަށް ދިން ހަމަލާތަކާއި ގުޅިގެން ލުބްނާނާއި ފަލަސްޠީން ގުޅޭ ބޯޑަރު ކައިރީގައި ހަމަލާބަދަލުކުރުން ތަކެއް ކުރިއަށް ގޮސްފައިވެއެވެ.
ދެފާރާތުން ބަދަލުކުރި ހަމަލާތަކުގައި އިޒްރާއިލްގެ ޔަހޫދީ ސިފައިންގެ އިސް މީހަކު ވެސް ވަނީ މަރައިލެވިފައެވެ.
ހިޒްބުالله އިން ވަނީ އިޒްރާއިލާއި ހަމާސް އާއި ދެމެދު ހިނގަމުންދާ ހަނގުރާމައިގެ ތެރެއަށް އެމީހުން ވަންނާނެ ކަމަށް ބުނެ އިންޒާރު ދީފައެވެ. އަދި އެއިންޒާރާއި އެކު ހިޒްބުالله އިން ވަނީ އާދީއްތަ ދުވަހު އިޒްރާއިލަށް ހަމަލާތަކެއް ދީފައެވެ. އެހަމަލާތަކުގެ ސަބަބުން މީހަކު މަރުވި ކަމެއް ނުވަތަ ޒަޚަމްވި ކަމެއް ވެސް އެނގިފައެއް ނުވެއެވެ.
ރޭ އިޒްރާއިލުން ލުބްނާން އަށް ދިންް މިހަމަލާތަކަކީ އާދީއްތަ ދުވަހު ހިޒްބުالله އިން ދިން ހަމަލާތަކަށް ދިން ރައްދެއް ކަމަށް ބެލެވެއެވެ.
ހިޒްބުالله އާއި އިޒްރާއިލާއި ދެމެދު ހަމަލާބަދަލުކުރުން ތަކެއް ކުރިއަށް ގޮސްފައިވާއިރު ރޭވެސް އިޒްރާއިލްގެ ޔަހޫދީން ވަނީ ޣައްޒާއަށް އެތައް ހަމަލާތަކެއް ދީފައެވެ.
ޣައްޒާއަށް އިޒްރާއިލުން ދޭން ފަށައިފައިވާ ހަމަލާތަކުގެ ސަބަބުން ޝަހީދުވި މީހުންގެ ޢަދަދު 704 އަކަށް އަރައި އެކިވަރިގެ ޒަޙަމް ލިބުނު މީހުންގެ ޢަދަދު 3900 އިން މައްޗަށް އަރައިގެން ގޮސްފައިވާ ކަމަށް ފަލަސްޠީނުގެ ސިއްޚީ ވުޒާރާއިން ބުނެފައިވެއެވެ.
Advertisement
This content is created and paid for by advertisers and does not involve Voice Journalists
