އިންތިހާބީ ރައީސް ޑރ. މުހައްމަދު މުއިއްޒުގެ ސަރުކާރުގައި ސިޔާސީ މަގާމުތައް 700 އަށްވުރެ އިތުރު ނުކުރުމަށް ނިންމާފައިވާ ކަމަށް އިންތިހާބީ ރައީސުލްޖުމްހޫރިއްޔާގެ އޮފީހުން ބުނެފިއެވެ.
މިއަދު އިންތިހާބީ ރައީސްގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި އިންތިގާލީ މުއްދަތުގެ ތަރުޖަމާނު މުހައްމަދު ފިރުޒުލް ވިދާޅުވީ، ދެން އަންނަ ސަރުކާރެއްގައި ސިޔާސީ މަގާމުތައް 700 އަށްވުރެ އިތުރު ނުކުރުމަށް އިންތިހާބީ ރައީސް ނިންމަވާފައިވާ ކަމަށާއި މި އަދަކީ ހިނގަމުން މިދާ ސަރުކާރުގެ ސިޔާސީ މަގާމުތަކަށްވުރެ މާބޮޑު ތަނުންވެސް މަދު އަދަދެއް ކަމަށެވެ.
އެންމެ ފަހުން މި ސަރުކާރުން ހުށަހެޅި ބަޖެޓުގައިވާ ގޮތުން، ނިމިގެންމިދާ ސަރުކާރުގައި 1،063 ސިޔާސީ މުވައްޒަފުން އެބަ ތިއްބެވެ. އޭގެ ކުރީގެ ރައީސް އަބްދުالله ޔާމީންގެ ސަރުކާރުގައި 808 ސިޔާސީ މުވައްޒަފުން ތިއްބެވެ.
ފިރުޒުލް ވިދާޅުވީ ޑރ.މުއިއްޒުގެ 700 ސިޔާސީ މަގާމަކީ، ރައީސުލްޖުމްހޫރިއްޔާގެ އޮފީހާއި، ގެކޮޅާއި، ނައިބް ރައީސްގެ ގެކޮޅާއި، ވަޒީރުންނާއި ކުންފުނިތައް ހިމެނޭހެން އެތަންތަނަށް އައްޔަން ކުރާ ސިޔަސީ ބޭފުޅުންގެ އަދަދު ކަމަށެވެ.
މީގެ ޑރ މުއިއްޒުގެ ސަރުކާރަކީ މަތިބަރު ސަރުކާރަކަށް ނުހެދުމަށް އެމަނިކުފާނު ނިންމަވައިފިވާކަމަށްވެސް ފިރުޒުލް ވަނީ ވިދާޅުވެފައެވެ.
ފެހި ގާނޫނުއަސާސީގެ ދަށުން މިހާތަނަށް އައިއިރު، ހަތަރު ސަރުކާރެއް ދިވެހިން ތަޖުރިބާ ކުރިއެވެ. އެއީ ކުރީގެ ރައީސް މުހައްމަދު ނަޝީދުގެ ސަރުކާރާއި ކުރީގެ ރައީސް ޑރ. މުހައްމަދު ވަހީދުގެ ސަރުކާރާއި ކުރީގެ ރައީސް ޔާމީންގެ ސަރުކާރު އަދި ރައީސް އިބްރާހިމް މުހައްމަދު ސޯލިހްގެ ސަރުކާރެވެ.
Advertisement
This content is created and paid for by advertisers and does not involve Voice Journalists
