އިންޓަރނޭޝަނަލް އެއިޑް ކެމްޕޭނުން ފަލަސްުޠީނުގެ ޣައްޒާގައި މަސައްކަތް ކުރަމުންދާ ސިއްޚީ އެހީތެރިންނަށް ހޮޓްމީލް ބަހަންފަށައިފި ކަމަށް އެ ކެމްޕޭނުން ބުނެފިއެވެ.

އައިއޭސީ އިން ބުނީ ފަލަސްޠީނުގެ ސިއްޚީ ވުޒާރާއާއި ގުޅިގެން ޣައްޒާގެ ހޮސްޕިޓަލް ތަކުގައި މަސައްކަތް ކުރަމުންދާ ޑޮކްޓަރުންނާއި، ނަރުހުން އަދި ހުރިހާ ސިއްޚީ ޚިދްމަތްތެރިންނަށް ހޮޓް މީލް ބެހުމުގެ މަސައްކަތް ކުރިއަށް ގެންދެވިފައިވާ ކަމަށެވެ.
އައިއޭސީ އިން ބުނީ މިމަސައްކަތް ކުރިއަށް ގެންދަނީ ސިއްޚީ ޚިދްމަތް ތެރިންގެ މަސައްކަތައް ބުރު ނާރައި އެ ޚިދްމަތްތެރިންގެ މަސައްކަތްތައް ކުރިއަށް ގެންދެވޭނެ ހެން މަގުފަހިކޮށް ދިނުމަށް ކަމަށެވެ.

އައިއޭސީ އިން "ވޮއިސް" އަށް ދިން މައުލޫމާތުގައި ބުނެފައިވަނީ 1500 ސިއްޚީ ޚިދްމަތްތެރިއަކަށް ހޮޓް މީލް ފޯރުކޮށްދެވިފައިވާ ކަމަށާއި މިކަންކަން ކުރިއަށް ގެންދިޔުމަށް ވަރަށް ބޮޑަށް މިވަގުތު ދަތިތަކާއި ކުރިމަތި ވެފައިވާކަމަށެވެ.

ޣައްޒާގައި ހަމަލާތައް ކުރިއަށް ދިޔަނަމަވެސް އައިއޭސީގެ ވޮލެންޓިއަރުން ދަނީ ޣައްޒާގައި ހަރަކާތްތެރިވެ ލިބެމުންދާ ގެއްލުންތައް ދެނެގަނެ އެހީބޭނުންވާ މީހުންނާއި ދާއިރާތައް ދެނެގަތުމުގެ މަސައްކަތް ކުރަމުންނެވެ.