ފަލަސްޠީނުގެ މިނިވަންކަމަށްޓަކައި ހަނގުރާމަ ކުރާ ހަނގުރާމަވެރިން މިމަހުގެ ހަތެއް ވީ ހޮނިހިރު ދުވަހު އިޒްރާއިލްގެ ޔަހޫދީންނަށް ދިން ކުއްލި ހަމަލާތަކުގެ ސަބަބުން ފެށައިގެން އުޅޭ ފަލަސްޠީން އިޒްރާއިލް ހަނގުރާމައިގައި އިޒްރާއިލުން ރޭ ޣައްޒާއަށް އިޒްރާއިލްގެ ޔަހޫދީން ދިން ހަމަލާތައް ކުރީގެ ހަމަލާތަކަށް ވުރެ ވަރުގަދަ ކަމަށް ޣައްޒާއިން "ވޮއިސް" އަށް މަޢުލޫމާތު ދެއްވި މުރާސިލް ވިދާޅުވެއްޖެއެވެ.
"ވޮއިސް"ގެ މުރާސިލް ވިދާޅުވީ ރޭގެ ހަމަލާތައް ވަރަށް ވަރުގަދަ ކަމަށާއި އަދި އެފަދަ ބާރުގަދަ ހަމަލާތަކެއް ދިން މަންޒަރު ދެކެފައިވިނުވާ ކަމަށެވެ.
އިޒްރާއިލްގެ ހަމަލާތަކުގައި ޝަހީދުވި މީހުންގެ ޢަދަދު 900 އަށް އަރައިފައިވާ ކަމަށް ފަލަސްޠީނުގެ ސިއްޚީ ވުޒާރާގެ އަދާހަމަތަކުގައި ބުނެފައިވެއެވެ.
އިޒްރާއިލްގެ އަނިޔާވެރިކަން ހައްދުފަހަނަ އަޅައިފައިވާ އިރު އިޒްރާއިލަށް ވާގިވެރިވާ އެމެރިކާއިން ރޭ ވަނީ އިޒްރާއިލަށް އަލުން ނުރައްކާތެރި ހަތިޔާރު ފޯރުކޮށްދޭން ފަށައިފައެވެ.
އެމެރިކާއިން ބުނެފައިވަނީ ހަމާސް ޖަމާޢަތާއި ހަނގުރާމަ ކުރުމަށް އިޒްރާއިލަށް ހަތިޔާރު ފޯރު ކޮށްދޭނެ ކަމަށް ބުނެފައެވެ.
ޣައްޒާއަށް ބާރުގަދަ ހަމަލާތައް ދިނުމުގެ އިތުރުން އިޒްރާއިލުން ވަނީ ޣައްޒާއަށް ފޯރުކޮށްދޭ ކަރަންޓާއި، ތެޔޮ އަދި ފެންވެސް ކަނޑައިލައިފައެވެ. އަދި ކާބޯތަކެތި ވެއްދުމަށް ބޭނުންކުރާނެ ބޯޑަރ ހުރަސް ކުރާ ދޮރުތައްވެސް ވަނީ ބަންދުކޮށްފައެވެ.
އިޒްރާއިލުން ފެން ކަނޑާލައިފައި ވީނަމަވެސް ﷲގެ ރަޙްމަތާއި އެކު ޣައްޒާ ފެނައް ނުޖެހޭނެކަމަށް ޣައްޒާއިން "ވޮއިސް" އަށް މަޢުލޫލާތު ދެއްވި މުޙައްމަދު ޙަސްނާ ވަނީ ވިދާޅުވެފައެވެ.
އޭނާ ވިދާޅުވީ ޣާއްޒާގައި ފުދޭވަރަކަށް ފެން ވަޅުތައް އެބަހުރި ކަމަށާއި މީގެ ކުރިން ފެން ދޫކުރިއިރު ރައްކާ ކުރެވިފައިވާ ފެންވެސް އެބަހުރި ކަމަށެވެ.
ޣައްޒާއަށް ރޭގެ ކުރިން ރޭ ވަނީ ހުއްޓައި ނުލައި ވަރަސް ބޯކޮށް ވާރޭވެސް ވެހިފައިވެއެވެ.
ނަމަވެސް ޣައްޒާގެ އެތެރޭގައި ހުރި އިންޖީނުގެތަކަށް ބޭނުންވާ ތެޔޮ ނުލިމިއްޖެނަމަ އެތަންތަން ބަންދުކޮށް މުޅި ޣައްޒާ ރޭގަނޑަށް ކަނު އަނދިރިވެގެން ހިނގައިދާނެ ކަމަށް ކަރަންޓުދޫކުރާ އިންޖީނު ގެތަކުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
