ފަލަސްޠީނުގެ ޣައްޒާ އަށް އިސްރާއިލްގެ ޔަހޫދީން ދެމުންދާ ވަރުގަދަ ހަމަލާތަކުގެ ސަބަބުން ޒަޚަމްވާ މީހުންގެ  ޢަދަދު މައްޗަށް ގޮސް ޣައްޒާގެ ހޮސްޕިޓަލްތައް ފުރިފައިވާ ކަމަށް ފަލަސްޠީނުގެ ސިއްޚަތާއި ބެހޭ ވުޒާރާއިން ބުނެފިއެވެ.

ފަލަސްޠީނުގެ މިނިވަން ކަމަށްޓަކައި ހަނގުރާމަ ކުރަމުންދާ ހަނގުރާމަވެރިން މިމަހުގެ  7 ވީ ހޮނިހިރު ދުވަހު އިޒްރާއިލްގެ ޔަހޫދީން ގަދަކަމުން ވެރިވެގަނެ ދިރިއުޅެމުންދާ ސަރަހައްދަށް ވައިގެ މަގުން ދިން ރޮކެޓް ހަމަލާތަކާއި ގުޅިގެން  ފެށިފައިވާ ހަނގުރާމައިގައި އިޒްރާއިލްގެ ޔަހޫދީން ދަނީ ޣައްޒާ އަށް ގަދަފަދަ ހަމަލާތައް ދެމުންނެވެ.

އިޒްރާއިލް ސިފައިންގެ ގިނަ ހަމަލާތައް އަމާޒުވަމުން ދަނީ ޣައްޒާގެ ޢާންމުން ދިރިއުޅޭ ސަރަހައްދުތަކަށް ކަން ފާހަގަކޮށްލަން ޖެހެއެވެ.

ފަލަސްޠީނުގެ ސިއްޚީ ވުޒާރާއިން އެންމެ ފަހުން ހާމަކުރި އަދާހަމަތަކުން ދައްކާގޮތުން އިޒްރާއިލްގެ ހަމަލާތަކުގެ ސަބަބުން މިހާތަނަށް 1055 މީހުން ވަނީ ޝަހީދުވެފައެވެ.

އަދި އެކިވަރުގެ ޒަޚަމްތައް ލިބުނު މީހުންގެ ޢަދަދު 5000އަށް ވަނީ އަރައިފައެވެ.