މި ހިނގަމުންދާ އޮކްޓޯބަރ މަހުގެ 7 ވަނަ އަށްވީ ހޮނިހިރު ދުވަހުގެ އިރު އަރައިގެން ދިޔައީ އެންމެހާ މުސްލިމުންނަށްވެސް އުފާވެރިކަން ގެނެސް ދިން، އަދި ފަލަސްތީނުގެ ބިންތަކަށް ގަދަކަމުން ވެރިވެގެން ދިރިއުޅެމުންދާ ޔަހޫދީން ސިއްސުވައިލި ޚަބަރަކާއި އެކުގައެވެ. 

އަމިއްލަ ބިމާއި ގެދޮރުން ނެރެ، ބިކަ ކޮށްލެވި، ހަނގުރާމައިގެ ތެރޭގައި ދިރިއުޅެމުންދާތާ 70 އަށްވުރެ ގިނަ އަހަރުތައް ވެފައިވާ ފަލަސްތީނުގެ އެންމެހާ މުސްލިމުންގެ ހައްގުގައި ހަނގުރާމަ ކުރަމުންދާ ހަމާސް ޖަމާއަތުގެ ހަނގުރާމަ ވެރިން އެދުވަހު ޔަހޫދީންނަށް ދިން ކުއްލި ހަމަލާއާއިއެކު އެމީހުން ވަރަށްވެސް ބޮޑަށް ސިހި ބިރުގަނެގެން "ތެޅެން ފެށި" ތަން ދިޔައީ ފެނިގެންނެވެ. ބިމުން މޮޓޯ ސައިކަލް ތަކާއި, މަތިން ވައިކުޑަ ތަކުން ހަމާސްގެ ހަނގުރާމަ ވެރިން ފެށި ޖިހާދުން، ފަލަސްތީންގެ މުސްލިމުން އަތުން ފޭރުނު ބިމުގެ ބޮޑު ސަރަހައްދެއް ހަމާސްގެ ބާރުގެ ދަށަށް އެމީހުން ގެނައެވެ. 

އެއާއެކު، އިޒްރާއިލްގެ ހަރުކަށި ބޮޑު ވަޒީރު ބެންޖަމިން ނަތަންޔާހޫ ވަނީ، ފަލަސްޠީނާ ދެކޮޅަށް ހަނގުރާމަ އިއުލާންކޮށް، ޔަހޫދީން ބޭނުންހާ ގޮތަކަށް މުސްލިމުންނަށް އަނިޔާދީ ގަތުލް އާއްމު ހިންގުމަށް ދޮރު ހުޅުވާލާފައެވެ. އެކަމަށް އެހީވުމަށް އެމެރިކާއިންވެސް ވަނީ އެމީހުން އެއާކްރާފްޓް ކެރިއާ އެއް ޣައްޒާއަށް ހަމަލާ ދިނުމަށްޓަކައި އިޒްރާއިލަށް ފޯރުކޮށްދީފައެވެ. 

އެހުރިހާ ވަސީލަތްތަކެއް ބޭނުންކޮށްގެން ޔަހޫދީން ހުއްޓުމެއްނެތި މުސްލިމުންނަށް ހަމަލާދެމުންދާއިރު، މިހަމަލާތަކުގެ ޝިކާރައަކަށް ބޮޑަށް ވެފައިވަނީ ކުޑަކުދިންނާއި، އަންހެނުންގެ އިތުރުން އުމުރުން ދުވަސްވީ މީހުންކަން ފާހަގަކޮށްލަންޖެހެއެވެ. އެގޮތުން، މިހާތަނަށް ފަލަސްތީނުގެ 1000 އަށްވުރެ ގިނަ މުސްލިމުން ޝަހީދުވެފައިވާއިރު, އޭގެ ތެރެއިން 300 ވުރެ ގިނައީ ކުޑަކުދިންނެވެ. އަދި އަންހެނުންގެ އަދަދު 170 އަށްވުރެ މައްޗެވެ. 

ކަންމިހެން ހުރި ނަމަވެސް، ހުޅަނގުގެ މީޑިއާ ތަކުން ދައްކަމުންދަނީ މުޅިންވެސް ތަފާތު މަންޒަރެކެވެ. ފަލަސްޠީނުގައި ޝަހީދުވެ ޒަޚަމްވަމުން އެދާ ތުއްތު ތުއްތު ފުރާނަ ތަކާއި އަންހެނުންނާއި، އެމީހުންނާއި ކުދިންނަށް ނަފްސާނީ ގޮތުން ލިބެމުން އެދާ ގެއްލުންތައް އެމީހުންގެ ކެމެރާ އަށާއި ސުރުޚީތަކަށް ނާރާއިރު، އޭގެ ބަދަލުގައި މިފަހަރުވެސް ހުޅަނގުން މަސައްކަތް ކުރަމުންދަނީ މުސްލިމު މުޖާހިދުންގެ އަގު ވައްޓާލައި، މުސްލިމުންނާއި މެދު ނަފްރަތު އުފެއްދުމަށެވެ.

އެގޮތުން އެންމެ ގަދަޔަށް ފަތުރަމުންދާ އެއް ވާހަކަ އަކީ، ހަމާސްގެ ހަނގުރާމަ ވެރިން ޔަހޫދީންނަށް ދިން ހަމަލާތަކުގެ ޝިކާރަ އަކަށް އެތައް ކުޑަ ކުދީން ވެފައިވާ ކަމަށާ، ހަމާސް ހަނގުރާމަ ވެރިން، ޔަހޫދީ އަންހެނުން "ރޭޕް" ކުރާ ވާހަކައިގެ އިތުރުން، އިޒްރޭލުގެ މިޔުޒިކް ހަފްލާއެއްގެ ތެރެއިން 200 އަށްވުރެ ގިނަ މީހުން، މަރާލި ކަމުގެ ވާހަކައެވެ.

މިކަންކަމުގެ ހަގީގަތާއި ހަމައަށް ދިޔުމަށް، މީސްމީޑިއާގައި މިހާރުވެސް ދައުރުވަމުންދާ އެ މިޔުޒިކް ހަފްލާގެ ތެރެއިން ހިނގި ކަންކަމުގެ ވީޑިއޯތަކުން ހުޅަނގުގެ މީޑިއާތަކުން އެ ފަތުރާ ފަދަ ކަންކަން ހިނގާފައިވާތަން ފެންނާކަށް ނެތެވެ. ހަމާސް ހަނގުރާމަވެރިން އެތަނަށް ދިޔުމުން، އެތަނުގައި ތިބި މީހުން ފިލަން ދުވާތަނާއި އެތަނުން އެއްބަޔަކު ހިފަހައްޓާތަން ވީޑިއޯ ތަކުން ފެނުނަސް، އެ އެންމެން މަރާލާފައިވާ ކަމުގެ އެއްވެސް ހެއްކެއް ފެންނާކަށް ނެތެވެ. 

އަދި ހަމައެހެންމެ، ހަމާސްގެ ހަނގުރާމަވެރިން 40 އަށްވުރެ ގިނަ އިޒްރޭލުގެ ކުޑަކުދިން މަރާލާފައިވާ ކަމަށާ، އަންހެނުން ރޭޕް ކޮށްފައިވާ ކަމަށް ހުޅަނގުން ބުނާ އިރު، އެފަދައިން އެ ބުނި، ނޫސްވެރިޔާވެސް އެހެން ބުނެފައިވަނީ، ޔަހޫދީ އިޒްރާއިލް ގެ ސިފައިންގެ މިހަކާއި ހަވާލާދީފައެވެ. އެ ނޫސްވެރިޔާއަށްވެސް މަރާލެވިފައިވާ ކުއްްޖެއްގެ ފޮޓޯގަނޑެއްވެސް ނުދެއްކުނެވެ. 

މީގެ އިތުރުން އަންހެނުން، ރޭޕް ކުރާ ކަމަށް ސާބިތު ކުރާން ހުޅަނގުގެ މީޑިއާ ތަކަށް ކަމެއް ކުރެވިފައި ނުވާއިރު، އެ މީޑިއާ ތަކަށް، އިޒްރޭލުގެ އަންހެނުން ދީފައިވާ އިންޓަވިއުތަކުން އެނގިގެން ދިޔައީ އެފަދަ ކަމެއް ނުހިނގާ ކަމެވެ. 

އެގޮތުން ހުޅަނގުގެ މީޑިއާ އަކަށް އިޒްރޭލުގެ އަންހެނަކު ދިން އިންޓަވިއުއެއްގައި އޭނާ ވަނީ، ހަމާސް ހަނގުރާމަ ވެރިން އޭނާ ނުމަރާނެ ކަމަށް ބުނެފައިވާ ކަމަށާ، އެ ހަނގުރާމަވެރިންނަކީ މުސްލިމުން ކަމުން، ހަނގުރާމައިގެ ތެރެއިންވެސް އަންހެނުންނަށް އަނިޔާ ނުކުރާނެ ކަމަށް އެމީހުން ބުނެފައިވާ ކަމަށް އެ އަންހެން މީހާ ބުނެފައި ވެއެވެ. 

އަދި މީގެ އިތުރުން، ހަމާސް ހަނގުރާމަ ވެރިންނަށް "ޓެރަރިސްޓް" ގެ ލަގަބު ދީ އިންޓަވިއު ދިން އަންހެން މީހާ ކިޔައިދިން ވާހަކަ ތަކުންވެސް އެ ހަނގުރާމަ ވެރިން އޭނާ ގަޔަށް އަތްލައި އަނިޔާ ނުކުރާކަން ކަށަވަރު ވެގެންދެއެވެ. ޚުދު އޭނާވެސް، އޭނާ މަރާ ނުލައި ދޫކޮށްލީ ކީއްވެކަން ނޭނގޭ ކަމަަށް އެތައް ފަހަރަކު އިންޓަވިއުގައި ބުނެފައި ވެއެވެ. 

"އަހަރެން އޮތީ އަލަމާރީގެ ތެރޭގައި ފިލާ. އަހަންނާއެކު ފިރިހެނަކުވެސް އޮތް އޭގައި. ހަމާސް ހަނގުރާމަވެރިން އައިސް އަލަމާރީގެ ދޮރު ހުޅުވާލައި، ފިރިހެން މީހާ ގަޔަށް ބަޑި ޖެހި. އަހަރެން ކައިރީ ބުނީ އަލަމާރިން ނުކުމެ، ނިވާ ވުމަށް. ދެން އަހަރެން ނުކުމެ، ސްކާފަކުން އަތާއި، ބޯވެސް ނިވާ ކުރިން. ކުރީމާ، އަހަރެން ގެންދިޔައީ އެހެން ތަނަކަށް. އެތަނުގައި ހުރި 5 އަހަރުގެ ކުއްޖަކާއި، ދެ އަހަރު ނުވާ ތުއްތު ކުއްޖެއް. އެ ދެ ކުދިން އަހަރެންނާއި ހަވާލު ކުރި. ދެން އަހަރުމެން އެންމެ ގޮވައިގެން އެތަނުން ވަރަށް ދުރަށް ގެންދިޔަ. ގެންގޮއްސަ ބުނީ ދާށޭ. އެމީހުން އަހަރެން ގަޔަށް ބަޑިއެއް ނުޖަހާ. މަރައެއް ނުލާ. އެންމެންވެސް އެބަ އަހާ މަރާ ނުލާ، ބަޑި ނުޖެހީ ކީއްވެހޭ. އަހަރެންނަކަށް އެއްގޮތަކަށްވެސް ނޭނގެ ކީއްވެ ކަމެއް މަރާ ނުލީ. އަދި ބަޑި ނުޖެހީވެސް. އެކުދިންވެސް ތިބީ ހެޔޮ ހާލުގައި." އިޒްރޭލުގެ އަންހެނަކު ހުޅަނގުގެ މީޑިއާއަކަށް ދިން އިންޓަވިއުއެއްގައި ބުނެފައިވެއެވެ. 

މިފަދަ އެތައް އިންޓަވިއުއެއްގައި އިޒްރޭލުގެ އަންހެނުން އެމީހުންނަށް އަނިޔާ ނުކޮށް ދޫކޮށްލި ވާހަކަތައް ކިޔައިދީފައި އެބަ ހުއްޓެވެ. 

މިކަންކަމުން އަނެއްކާވެސް އެނގި ހާމަވެގެން ގޮސްފައިވަނީ ހުޅަނގު މީޑިއާ ތަކުގެ މުނާފިގު ކަމެވެ. އަދި އެމީހުން މުސްލިމުންނާއި ދެކޮޅަށް ފަތުރަމުންދާ ދޮގުތަކާއި އެމީހުންގެ ނުބައި ޕްރޮޕެގެންޑާ ތަކެވެ.